
Li quntarê Çiyayê Gomanê pîrozbahiya Newrozê: Ronahiya roja me bi têrî me tevan dike 

2024-03-23 15:48:48


	&nbsp;

	COLEMÊRG - Gelê Şemzînanê bêyî ku guh bide baran û heriyê, li quntarê Çiyayê Gomanê pîrozbahiya Newrozê li dar xist û got: “Ne ronahiya ampûlê, ronahiya roja me bi têrî me tevand dike.”&nbsp;

	&nbsp;

	Pîrozbahiya Newrozê ya Şemzînan a Colemêrgê, bi dirûşma “Rabe dema azadî û serkeftinê ye” hat lidarxistin. Xelkê navçeyê bêyî guh bide baran û heriyê herikî qada Newrozê ya Pêsanê. Welatî bi kiras û fîstanan, bi şel û şepikên xwe tev li bûn. Tevî baranê jî coşeke mezin hebû. Qada Newrozê bi alên DEM Partiyê û flalamayên kesk, sor û zer hatibû xemilandin. Her wiha pankart û dovîzên “Rabe DEM hat”, “Dem Dema Şemzînan’ê ye”, “Hezar silav ji zindanan re”, “Jiyan em in yên birêve dibin dê em bin”, “Ne ronahiya ampûlê, ronahiya rojê bi têrî me tevan dike” û “Dem dê were, dewran dê biguhere” hatin vekirin. Pîrozbahî bi deqeyek rêzgirtinê dest pê kir. Girseyê gelek caran dirûşmên “Bijî berxwedana zindanan”, “Jin, jiyan azadî” û “Şemzînan bi ser serbilind e” berz kir.&nbsp;

	&nbsp;

	Namzeta DEM Partiyê ya Şemzînanê Nazdar Opengîn di pîrozbahiyê de hêvî kir ku Newroz bibe wesîleya aştiya gelan û got ku Newroz roja serhildana li dijî Dehakan e. Opengîn, diyar kir ku dema şaredarî bi dest xistin dê bi gel re birêve bibin û got: “Serkeftin a me ye, serkeftina 31’ê Adarê dê ya me be.”&nbsp;

	&nbsp;

	EM PIRSGIRÊKAN BI GEL RE ÇARESER BIKIN&nbsp;

	&nbsp;

	Namzetê hevşaredariyê Naîf Erogûz jî da zanîn ku ev zêdetirî 2 meh in mal bi mal digerin û wiha got: “Em ê di 31’ê Adarê de şaredariya xwe ya bi hîleyan hatiye standin bigirin û diyarî gelê xwe bikin. Em ê ji gelê xwe re xizmetê bikin. Em ê şaredariya xwe bi gelê xwe re, bi rûspî û saziyên xwe birêve bibin. Em ê hemû pirsgirêkên navçeyê bi gel re çareser bikin. Em ê di 31’ê Adarê de bersiva pêwîst bidin. Em ê şaredariyeke gelparêz ava bikin. Em dixwazin her kes biçe ser sindoqan û xwedî li îradeya xwe derkeve.”&nbsp;

	&nbsp;

	‘BÊYÎ ŞERM BIKE STRANÊN BI KURDÎ VEDIKE’&nbsp;

	&nbsp;

	Parlamenterê DEM Partiyê yê Colemêrgê Onur Duşunmez jî gel silav kir û ev tişt anî ziman: “Di vê roja Remezana mibarek de AKP bêyî ji xwedê bitirse, li dijî kurdan polîtîkayên qirêjî dimeşîne. AKP di wesayîta hilbijartinê de stranên kurdî vedike. Yê nezane jî dê bibêje qey kesên li Meclisê kurdî qedexe dikin AKP nîne, yên konserên kurdî qedexe dike AKP nîne. Îcar bêyî şerm bikin li Şemzînanê stranên kurdî vedikin. Dê gelê me bersiva pêwîst di hilbijartinê de bide wan.”&nbsp;

	&nbsp;

	‘AKP ŞIRÎKÊ KOMKUJIYÊN LI DIJÎ KURDAN E’

	&nbsp;

	Duşunmez, diyar kir ku bi hezaran kes ji bo bersivê bidin “polîtîkayên qirêjî yên AKP’ê” daketiye qadan û wiha domand: “AKP, şirîkên hemû zilm, komkujî û talana li Kurdistanê tê kirin e. Em neviyên Şêx Seîd û Ubeydullah Nehrî ne. Neviyên Şêx Seîd weke terorîst pênase dikin. Di wê baweriyê de me ku hûn dê bersiva pêwîst bidin van kesên kal û pîrên we weke xayîn nîşan didin.” &nbsp;

	&nbsp;

	Piştî axaftinan jî Hozan Serwan, Hozan Cevdet Şemzînî, Adem Şemzînî û Îzzet Şemzînî derketin ser dikê û coş derxistin lûtkeyê. Pîrozbahî bi govendê bi dawî bû.&nbsp;

	&nbsp;