Mehmet Ocalan: Aqilê dewletê divê li gorî gotinên xwe tevbigere 

2024-11-07 10:59:31


	 

	RIHA - Mehmet Ocalan diyar kir ku tecrîda li Îmraliyê didome û ev tişt anî ziman: “Serok tu caran tiştên nerewa qebûl nake. Aqilê dewletê gotinên xwe bi cih nayîne.” 

	 

	Tecrîda girankirî ya li ser Rêberê PKK’ê Abdullah Ocalan ku li Girtîgeha Tîpa F a bi Ewlekariya Bilind a Îmraliyê tê ragirtin didome. Piştî tecrîda mutleq a 43 mehan, biraziyê Abdullah Ocalan, Omer Ocalan pê re hevdîtin kir. Abdullah Ocalan di hevdîtinê de got ku tecrîd didome û wiha gotibû: “Heke şert û merc ava bibin, ez xwedî wê hêza teorîk û pratîkim ku pêvajoyê ji pevçûn û tundiyê derbasî zemîna hiqûqî û siyasî bikim.” Serlêdanên malbat û parêzeran ên piştî hevdîtina behsa xeberê jî hêj nehatine bersivandin. Her wiha derket holê ku “cezayê disiplînê” yê ji bo 3 mehan li Abdullah Ocalan hatiye birîn. 

	 

	Birayê Abdullah Ocalan, Mehmet Ocalan têkildarî qedexeyên hevdîtinê yên ji ber tecrîdê û “cezayên disiplînê” ji ajansa me re axivî. 

	 

	'TECRÎD HÊJ DIDOME’ 

	 

	Mehmet Ocalan, hevdîtina dawî erênî nirxand û wiha got: “43 meh bûn me agahî jê nedigirt û nedizanî çi dibe. Em hevdîtina dawî erênî dibînin lê tecrîd hêj berdewam dike. Vê yekê tenê em nabêjin. Serok jî dibêje. Aqilê dewletê jî qebûl kir. Domandina tecrîdê rast nîne. Ev hiqûqî nîne. Tecrîd, bi biryara siyasî tê domandin. Heke em li welatekî demokratîk bin, wê demê divê hiqûq ji bo her kesî wekî hev be. Lê li Îmraliyê tune ye. Bila li bendê nebin ku em vê qebûl bikin.” 

	 

	Têkildarî “cezayê disiplînê” yê dawî jî Ocalan wiha got: “Di esasê xwe de tecrîd ev 25 sal in didome. Li gel Serok, her wiha 3 kesên din jî li Îmraliyê tên ragirtin. Malbatên wan kesan jî hene. Ew jî nikarin bi xizmên xwe re hevdîtinê bikin. Ma çi tiştê vê hiqûqî û însanî ye?” 

	 

	'DIVÊ DEWLET GAVÊN AQLÊSELÎM BIAVÊJE’ 

	 

	Ocalan bal kişand ser nîqaşên têkildarî pêvajoya nû û tayînkirina qeyûman û ev tişt anî ziman: “Devlet Bahçelî got; ‘Me destê xwe dirêj kir’, ‘Bila bê li Meclisê biaxive.’ Lê qeyûman tayînî şaredariyên kurdan dikin. Ev çi nakokî ye? 15 salan ez gelek caran çûm serdana Serok. Yek ji kesên herî zêde baş Serok nas dike ez im. Serok tu caran tiştên nerewa qebûl nake. Hem em hem jî dewlet bi vê baş dizane. 3 mehan qedexeya hevdîtina bi malbatê re dane. Aqilê dewletê, gotinên xwe bicih nayîne. Em li bendê ne ku dewlet gavên aqlêselîm biavêje. Nexwe dê zirar bigihije kurd û tirkan.” 

	 

	Mehmet Ocalan, wiha dirêjî da axaftina xwe: “Serok ne tenê serokê kurd û tirkan, serokê her kesî ye. Serok, pira di navbera gelan de ye. Tayînkirina qeyûm a li Xelfetî, Mêrdîn û Êlihê vê rastiyê naguherîne. Hevşaredarekî Xelfetiyê tirkmen (Mehmet Karayilan), hevşaredara din (Saniye Bayram) kurd e. Dewlet bi vê gavê peyamê dide kurdan. Ev rast nîne, nayê qebûlkirin.” 

	 

	BANGA ‘MEZINKIRINA TÊKOŞÎNÊ’ KIR

	 

	Ocalan, anî ziman ku Rojhilata Navîn dişewite û axaftina xwe wiha qedand: “Divê kurd, tirk, ereb, faris û gelên din ên Rojhilata Navîn bi aqilekî selîm tevbigerin û dawî li tecrîdê bînin. Malbat, parêzer, ji bo aştiyê êdî kî pêwîst bike biçe... Divê bi Serok re hevdîtinê bikin. Hêviya me ya ji gel ev e; her kes çi ji dest tê bila li ser zemîneke demokratîk bike. Heke em têkoşîna xwe mezin nekin, yek ji me taşê be yê din dê bibe firavîn û şîv. Divê her kes li ser zemîneke demokratîk rabe ser pêyan. Divê têkoşîna demokatîk were mezinkirin. Heke em vê bikin dê pirsgirêka kurd jî bi rêbazên demokratîk were çareserkirin.” 

	 

	MA / Emrûllah Acar