
Li Şirnex û Erziromê xespkirina îradeyê hate protestokirin 

2024-11-24 13:34:23


	&nbsp;

	ŞIRNEX/ERZIROM - Tayînkirina qeyûman li Şirnex û Erziromê hate protestokirin. Hevserokê DEM Partiyê yê Şirnexê Abdullah Gungen got ku tayînkirina qeyûman, tirsa ji îradeya gel e.&nbsp;

	&nbsp;

	Rêxistinên Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP) yên Şirnexê û Tevgera Jinên Azad (TJA), tayînkirina qeyûman a li şaredariyên Dêrsim û Pulurê protesto kirin. Daxuyanî li pêşiya DEM Partiyê hate dayin. Parlamentera DEM Partiyê ya Şirnexê Nevroz Uysal Aslan, endamên Meclisa Dayikên Aştiyê, hevaşedarên Silopiya, Cizîr, Gundikê Melê û Deşta Darê û gelek welatî tev li bûn.&nbsp;

	&nbsp;

	Di daxuyaniyê de pankarta “Qeyûm biaxive, tu ji ku yî?” hate hilgirtin. Hevserokê DEM Partiyê yê Şirnexê Abdullah Gungen di daxuyaniyê de axivî û wiha got: “Îktîdara AKP’ê bi tayînkirina qeyûm a cara sêyemîn re dixwaze jinûve teşe bide civakê. Çawa ku rêbazên ewlehîperestiyê yên sed sal in tên ceribandin vala derketibin dê ev polîtîkaya qeyûman jî vala derkeve.”&nbsp;

	&nbsp;

	Bi domdarî Gungen da zanîn ku AKP dixwaze li cihên nekarî di hilbijartinê de tevî veguhestina leşker û polîsan jî bi dest bixe, bi rêya qeyûman xesp bike. Gungen, wiha pê de çû: “Li rexekî qala aştiyê dike li rexa din jî qeyûman tayîn dike. Îktîdara AKP’ê herî dawî jî qeyûm tayînî Dêrsim û Pulurê kir. Bi vê yekê re zîhniyeta xwe ya derbekar careke din piştrast kir. Tayînkirina qeyûman ne tenê xespkirina şaredariyan e, her wiha êrişeke li dijî dîrok, çand û nirxên gelê me ne.”&nbsp;

	&nbsp;

	'JI ÎRADEYA GEL DITIRSIN’

	&nbsp;

	Gungen, got; “qeyûm derbe ye, dizî ye” û wiha axivî: “Polîtîkaya qeyûm û îdiaya aştiya civakî hev nagirin. Girtina ji peywirê ya hilbijêrên gel, xespkirina siyaseta demokratîk e. Tayînkirina qeyûm a li Dêrsimê, nîşaneya tirsa wan a ji îradeya gel e. Ne Dêrsim ne jî bajarên me yên din bi rêya qeyûm nayên birêvebirin.”&nbsp;

	&nbsp;

	Parlamenter Newroz Uysal Aslan jî wiha got: “Colemêrg, berxwedan e. Êlih, cihê serhildanê ye. Mêrdîn nûnertiya baweriyan e. Xelfetî, ruhê lêgerîna azadiyê ye. Esenyurt, nûnerê daxwaza pêkvejiyanê ya gelan e. Dêrsim, ruhê berxwedanê yê gelê kurd e ku serî natewîne.”&nbsp;

	&nbsp;

	Daxuyanî bi dirûşmên “Qeyûm talan e, berxwedan jiyan e", "Bijî berxwedana Dêrsimê", "Jin jiyan azadî" û "Em ê bi berxwedanê bi ser kevin” bi dawî bû.&nbsp;

	&nbsp;

	ERZIROM

	&nbsp;

	Rêxistina DEM Partiyê ya Erziromê jî têkildarî tayînkirina qeyûman li pêşiya rêxistina Qereçobanê daxuyanî da. Di daxuyaniyê de pankarta “Şaredarî yên me ne, em ê destûrê nedin xespê” hate hilgirtin. Gelek partiyî tev li daxuyaniyê bûn. Rêveberê rêxistina bajar ê DEM Partiyê Yavuz Karabudak axivî û wiha got: “Gelê kurd polîtîkayên qeyûm red dike. Gelê me di hilbijartinan de DEM Partî weke îradeya xwe nîşan da. Îktîdara AKP-MHP’ê cihên nekarî di hilbijartinê de bi dest bixe, niha hewl dide bi derbeya qeyûm bi dest bixe. Ev sepan, êrişeke li dijî mafê bijartin û hilbijartinê yê gelê kurd e. Dorpêçkirina rêveberiyên herêmî, îlana bidawîkirina rewatiya demokratîk e.”&nbsp;

	&nbsp;

	Daxuyanî bi dirûşma “Bijî berxwedana Dêrsimê" bi dawî bû.&nbsp;