Rojnamevan Cîhan Bîlgîn:Turbe hincet e, armanc dagirkerî ye

2024-12-19 09:22:46


	RIHA - Rojnameger Cîhan Bîlgîn diyar kir ku êrişên li dijî Bakur û Rojhilatê Sûriyeyê her ku diçe zêde dibin û got: "Êriş li ser Bendava Tişrîn û herêma Qereqozaxê hene. Divê gelên cîhanê jî li dijî van êrişan dengê xwe bilind bikin." 

	Êriş û gefên Tirkiye û ANS'yê yên li dijî Rêveberiya Xweser a Bakur û Rojhilatê Sûriyeyê dewam dikin. Rojnameger Cîhan Bîlgîn ku geşedanên li bendava Tişrîn û herêma Qereqozax a nêzî Kobanê ku êrîş û berxwedan lê zêde bûne, ji nêz ve dişopîne, diyar kir ku êrişên Tirkiyeyê yên li dijî Bakur û Rojhilatê Sûriyeyê bênavber didomin.

	 

	‘POLÎTÎKAYÊN DIJMINATIYÊ'

	 

	Cîhan Bîlgîn bi bîr xist ku piştî têkçûna DAIŞ’ê ya li Dêra Zorê di sala 2019’an de, Tirkiyeyê êrişên xwe bi curbicurkirina rêbazên şer berdewam kiriye û got: “Piştî têkçûna DAIŞ’ê hemû rêbazên şer ceribandine. Hewldanên ji bo çalakirina şaneyên razayî hê jî berdewam in. Li Kampa Holê û herêma Dêra Zorê em gelek caran bûne şahidê hewldanên bi vî rengî. Her wiha dixwazin bi rêya eşîran siyaseta dijminatiyê di navbera kurd û ereban de bimeşînin. Lê belê tevî van hemû êrişan jî berxwedana gel ev polîtîka pûç kir."

	 

	Rojnameger Cîhan Bîlgîn

	 

	‘KOÇBERIYÊ FERZ DIKIN'

	 

	Bilgin da zanîn ku armanca Tirkiyeyê bi gefa komkujiyê koçberkirina gel e, bi taybetî li Minbicê û derdora û got ku bendava Tişrînê hatiye bombekirin û herêm bê ceyran maye. Cîhan Bîlgîn diyar kir ku armanca van rêyan şikandina berxwedana gelê herêmê ye û got: “Ji bo şikandina berxwedana gel hem binesaziyê hedef girtin, hem jî derewan dikin ku ev der hatine desteserkirin. Lê tevî van êrişan jî ne gel koç kir û ne jî Rêveberiya Xweser gav paşde avêt. Meclisên Til Rifat û Şehba ji bo ewlehiya gel biryar dan ku ji herêmê derkevin. Welatiyên sivîl bi awayekî ewle li herêmên Rêveberiya Xweser hatin bicihkirin. Gelê li vir bêyî piştgiriya saziyên navneteweyî pêdiviyên xwe bi Rêveberiya Xweser û hevgirtina gel pêk tînin."

	 

	‘HERÊM DI BIN KONTROLA HSD'Ê DE YE'

	 

	Cîhan Bîlgîn îşaret bi wê yekê kir ku hewldanên Tirkiyeyê yên ji bo girtina herêma Qereqozaxê berdewam dikin û got: “Li herêmê şerekî mezin tê meşandin. Çeteyên ku Tirkiye piştgiriya wan dike li dijî hêzên HSD, YPJ û meclisên xwecihî êrişan pêk tînin. Lê belê çete nikarin tu pêşketinan pêk bînin. Berovajî di nav kesên ku di pevçûnan de teslîm bûne de, yên ku reviyan, cenazeyên xwe li pey xwe hiştin jî hene. Di vir de rastî propagandaya ku Tirkiye di medyayê de dike berovajî dike. Ev ax hê jî di bin kontrola HSD’ê de ne. Êrişli ser Bendava Tişrîn û herêma Qereqozaxê pêk tên. Bi van êrişan armanc dikin ku Rêveberiya Xweser tune bikin. Ev tenê beşek in ji êrîşên sîstematîk ên ku piştî têkbirina DAIŞ'ê hatine destpêkirin."

	 

	Cîhan Bîlgîn bal kişand ser gengeşeyên veguhestina tirba Silêman Şah ji bo cihê wê yê kevin jî û wiha got: “Ev rewş parçeyek ji hewldanên Tirkiyeyê yên ji bo desteserkirina herêmê ye. Tirkiye dixwaze bi çekên giran leşkeran bişîne herêmê û tirbê weke hincet bi kar bîne. Bi awayekî eşkere ev hewldaneke dagirkeriyê ye. Lê Rêveberiya Xweser her hewldana dagirkeriyê red dike. DAIŞ, di sala 2014’an de li van axan têk çû. Çawa ku berxwedana gel wê demê êrişê pûç kir, îro jî heman têkoşîn berdewam dike. Tirkiye bi çalakirina propagandaya reş û şaneyên DAIŞ’ê hewl dide berxwedana gel bişikîne. Lê belê ev kes kolanên xwe û nasnameya xwe diparêzin."

	 

	Cîhan Bîlgîn bi bîr xist ku gelên Bakur û Rojhilatê Sûriyeyê tarîtiya DAIŞ’ê têk birine û bang li raya giştî ya navneteweyî kir ku li dijî êrişan bêdeng nemîne. 

	 

	MA / Delal Akyuz