Serokê PEN a Navneteweyî: Dixwazin çapemenî bibe dengê serdestan  

2024-12-26 10:59:34


	NAVENDA NÛÇEYAN - Serokê PEN a Navneteweyî Burhan Sonmez, diyar kir ku qetilkirina rojnamegerên Kurd û zextên li ser wan nîşaneya bêperwatiyê ye û wiha got: “Ji bo nixûmandina rastiyan rojnamegeran hedef digirin.” 

	Êrişên dewleta tirk û koma wê ya paramîlîter a SMO’yê yên li ser Bakur û Rojhilatê Sûriyeyê berdewam in. Kedkarên Çapemeniya Azad Nazim Daştan û Cîhan Bîlgîn ku êriş dişopandin, ji hêla dewleta tirk ve bi SÎHA’yan ve hatin qetilkirin. Êrişên li dijî rojnamegeran li Kurdistan,  Tirkiye û gelek cihan hatin şermezarkirin. 

	 

	Serokê PEN a Navneteweyî Burhan Sonmez bertek nîşanî qetilkirina rojnamegeran da û têkildarî êrişan ji ANF’ê re axivî. 

	 

	Burhan Sonmez, diyar kir ku qetilkirina rojnamevan Nazim Daştan û Cîhan Bîlgîn nayê qebûlkirin, ev yek di heman demê de bêser û beriya êrişên li ser Rojava jî nîşan dide û ev tişt anî ziman: “Cîhan Bîlgîn û Nazim Daştan dema ku li pey çêkirina nûçeyan bû hatin qetilkirin. Ev yek ji aliyekî ve êrişa li ser çapemeniya azad nîşan dide, ji aliyê din ve jî bêser û beriya êrişên li ser civaka Kurd a li Rojava radixe pêş çavan. Em hemû bi wê gotinê zanin, 'Di şer de beriya her tiştî rastî tê kuştin.' Ji bo rastî bê nixumandin, yanî êriş li wan mirovan tê kirin ku nûçeyan amade dikin. Ev rewşa ku li her devera cîhanê diqewime, mixabin li Rojhilata navîn hîn bi şênberî tê dîtin."

	 

	'HÊZÊN GLOBAL DIKARIN BI HÊSANÎ KURDAN FEDA BIKIN' 

	 

	Sonmez bal kişand ser rola bêdengiya civaka navneteweyî ya li pêşberî êrişên li ser civak û rojnamevanên Kurd û wiha domand: “Dema ku civaka navneteweyî dengê xwe nake, hêzên xwecihî yanî hikûmet an jî rêxistin bi rengekî hîn bê perwa tevdigerin. Ji ber ku zextê nabînin û dema plana êrişê dikin dudilî tevnagerin. Ev yek rastiyeke, li platformên navneteweyî bi têrkerî xwedî li pirsgirêka Kurd nayê derketin. Ne zehmet e ku mirov sedemên polîtîk ên vê yekê texmîn bikin. Dema ku berjewendiyên aborî û polîtîk ên hêzên mezin dibin mijara gotinê, dikarin Kurdan bi hêsanî feda bikin. Di vê serdema dîroka ji sed salî de tiştekî guherî nîne. Halbûkî yekane tişta ku Kurd dixwazin û pêwîstiya xwe pê heye, ji tiştê ku mafê her kesî ye cuda nîne. Dixwazin li ser paşeroja xwe xwedî gotin be û xwedî il çanda xwe derkeve. Ev mafê mirovî yê bingehîn jî ji wan re zêde tê dîtin."

	 

	'JI BO PARASTINA ROJNAMEVANAN HEWLDANÊN ME DEWAM DIKIN'

	 

	Sonmez diyar kir ku ji bo rojnamevan bêne parastin PEN a Navneteweyî di nava hewldanan de ye û axaftina xwe wiha qedand: “PEN a Navneteweyî ji ber vê yekê li zêdeyî çil welatî bi hezar endamên xwe têdikoşe. Karê me yê sereke azadiya nivîskar û wêjeyê ye. Lê belê êrişên li ser çapemeniyê di asteke welê de zêde bûye ku em jî tev li piştevaniya wan rêxistinan dibin ku ji bo rojnamevanan dixebitin. Hejmara rojnamevanên sala dawî li Filistînê hatin kuştin ji hejmara giştî ya rojnamevanên li tevahiya cîhanê hatine kuştin zêdetir e. Ji bo parastina rojnamevanan em hewl didin torên piştevaniyê ava bikin û zexta dîplomatîk li hikumetan bikin. Em hewl didin saziyên li Neteweyên Yekbûyî û Yekîtiya Ewropayê bixin nava liv û tevgerê û di mijara pirsgirêkên rojnamevan û azadiya çapemeniyê de li wan deveran tevkariyê li kar dikin.”