RIHA - Di çarçoveya lihevkirina di navbera Rêveberiya Xweser û Şamê de, amadekariyên ji bo vegera bi ewle û plankirî ya efrîniyan temam bûn. Di qonaxa ewil de dê 400 malbat vegerin Efrînê. 

 

Kombenda Efrîn a Civakî, Meclisa Koçberên Efrîn û Şehbayê û nûnertiya civaka sivîl a Ewropayê li pêşiya avahiya Meclisa Koçberên Efrîn û Şehbayê ya li bajarê Qamişlo derbarê vegera bi ewle ya koçberên Efrînê de daxuyaniyek da. Daxuyanî ji aliyê Endamê Rêvberiya Kombenda Efrîn a Civakî Îbrahîm Heftaro ve hate dayîn. Îbrahîm Heftaro, diyar kir ku ew ji dema destpêkirina koçberiyê heta niha, ji bo vegera bi ewle di nava liv û tevgerê de bûn.

 

‘VEGER ÎRO DEST PÊ DIKE’ 

 

Îbrahîm Heftaro, da zanîn ku piştî ku peymana 29’ê Çileyê ya di navbera HSD û hikûmeta demkî ya Suriyeyê de hat îmzekirin, wan jî li gorî xala peymanê ya têkildarî vegera koçberan, dest bi amadekariyan kiriye û îro (16 Sibata 2026) radigihînin ku ewê dest bi şandina koçberên Efrînê bikin.

 

‘JI BO PIRSGIRÊK DERNEKEVIN EM BEŞ BI BEŞ DIŞÎNIN’ 

 

Bi domdarî Îbrahîm Heftaro destnîşan kir ku beriya destpêkirina vê pêvajoyê civînên wan bi Meclisa Koçberên Efrîn û Şehbayê, nûnertiya Neteweyên Yekbûyî (NY) û hikumeta demkî ya Sûriyeyê re çêbûne. Îbrahîm Heftaro, got: “Em dixwazin bi hezaran xelkê xwe bişînin Efrînê, lê ji ber rewşa hewayê û ji bo ku xelk rastî zehmetiyan neyên, em ê pêvajoya vegerê beş bi beş pêk bînin. Em ê vegera bi ewle, bi hevkariyeka hevbeş a hikumeta Şamê û NY’ê re pêk bînin. Em bi hêvî ne ev pêvajo bi temamî pêk were.”

 

‘JI EWIL DÊ 400-500 MALBAT BÊN ŞANDIN’

 

Îbrahîm Heftaro da zanîn ku wê wekî beşa yekemîn nêzî 400-500 malbat ji bo vegerê werin şandin, lê dema vegerê hîn nehatiye diyarkirin ew ê di demeke nêz de pêk were.

 

Li ser navê nûnertiya civaka sivîl a Ewropayê Hêmen Qirdaxî ku ew jî beşeke ji hevkariya vegera bi ewle ye jî axivî û diyar kir ku wan jî ev 2 hefteye dest bi amadekariyan kiriye û ev agahî dan: “Dê 150 malbatên ji navçeya Cindirêsê, 150 malbat ji navçeya Mabata û 100 jî ji navçeya Şiyê vegerin.”