Pîrozbahiyên Newrozê yên îsal ku bi dirûşma "Newroza Azadî û Yekitiya Demokratîk" û "Newroza Azadî û Demokrasiyê" tên lidarxistin, dê ya dawî di 21’ê Adarê roja Şemiyê de li Parka Newrozê ya Amedê bê pîrzkirin. Di pîrozbahiyê de koma kemençeyê, Koma Agirê Jiyan û Alend Hazîm dê derkevin ser dikê. Hevberdevkê Înîsiyatîfa Yekitiya Demokratîk Mehmet Kamaç, bang kir ku her kes bi rûhê yekitiyê tevli Newrozê bibe û anî ziman ku dê beşdariyekê pir xurt çêbibe.

 

YEKITÎ JI BO JIYANÊ GIRÎNG E

 

Kamaç, destnîşan kir ku yekitiya gelê Kurd di hedefa hêzên emperyalîst de ye û ev tişt got: "Newroza îsal xwedî girîngiyekê dîrokî ye. Ji bo paşeroja gelê Kurd Newrozekê girîng e. Ev Newroz dê bi wesîleya yekitiya demokratîk û yekitiya Kurdan were avakirin. Gelê Kurd an dê yekitiya xwe ava bike, an jî dê bibe qurbana projeya emperyalîstan a ji bo dîzaynkirina Rojhilata Navîn. Li ser destkeftî û qirkirina Kurdan planek hatiye danîn. Plana ku li ser Rojava hatibû danîn, niha dixwazin li ser Rojhilat, Bakur û Başûr jî bixin dewrê. Ji bo vê yekitiya gelê Kurd girîng e."

 

YEKITÎ Û NEWROZ

 

Kamaç, diyar kir ku gelê Kurd li dora yekitiyê kom bûye û lîstikên emperyalîstan têk biriye û wiha pê de çû: "Rûhê yekitiyê yê li Rojava derket holê, planên wan têj bir. Pergala wan serûbin kir. Êrişên ku têkoşîna pêkvejiyana li Rojava hedef digirtin, bêencam man. Têkoşîna yekitiyê ya gelê Kurd li vir bi ser ket. Li vir carekê din derket holê ku yekitî çiqas girîng e. Newroz ji bo yekitiya gelê Kurd xwedî cihekî girîng e. Newroz cejna yekitî û vejînê ye."

 

NEWROZA AZADÎ Û DEMOKRASIYÊ

 

Kamaç, anî ziman ku ew ê bi rûhê Newrozê li dijî pergala ku li ser înkara gelê Kurd hatî avakirin li ber xwe bidin û wiha axaftina xwe bi dawî kir: "Newroza azadî, yekitî û demokrasiyê, dê bibe Newroza azadî û misogerkirina statuya gelê Kurd. Em bang li gelê xwe dikin ku bi rûhê yekitiyê li qadên Newrozê bin. Em ji bo Newroza aştî, azadî, statu û yekitiyê li benda hemû gelê xwe ne."

 

MA / Fethî Balaman