Kurdên li bajarê Konyayê dijîn, Cejna Newrozê li Qada Bazara Sêşemê ya li navçeya Selçûklûyê bi dirûşmên “Newroza azadî û yekitiya demokratîk” û “Newroza azadî û demokrasiyê” pîroz kir. Di saetên serê sibehê de welatiyan berê xwe dan qadê. Li qadê gelek caran dirûşmên “Bijî Serok Apo”, “Bijî Newroz” û “Jin, jiyan, azadî” hatin berzkirin. Bernameya Newrozê, bi deqeyek rêzgirtinê dest pê kir. 

 

‘AGIRÊ NEWROZÊ BI BEDENA XWE MEZIN KIRIN’ 

 

Wekîlê DEM Partiyê yê Şirnexê Mehmet Zekî Îrmez di pîrozbahiyê de axivî û got ku Newroz ji bo gelê Kurd sembola berxwedan û têkoşînê ye. Îrmez, anî ziman ku ew ê kesên dengê wan bilind kirî, agirê Newrozê bi bedena xwe mezintir kirin tu caran ji bîr nekin. Îrmez, wiha domand: “Ew, pêşengên têkoşîna azadiyê ya gelê Kurd in. Em ê heta dawiyê bi serfirazî li ser pêya bin. Armanc û hedefên wan rê nîşan me didin û em ê bi ser kevin. Gelek zilm li gelê Kurd hate kirin û me gelek êş kişand. Ji bo li ser xaka xwe azad, birûmet û serkeftî bijîn me gelek li ber xwe da. Êdî em gihiştin qonaxekê û tehemûla me nemaye. Em dibêjin êdî bes e. Azadî, mafê gelê me ye. Gelên dinyayê çawa azad dijîn, em jî dixwazin li ser xaka xwe azad bijîn. Sekreftin û azadiya gelê me nêz e.” 

 

BANGA AZADIYÊ

 

Îrmez, îşaret bi pêvajoya li Tirkiyeyê kir û got ku divê dewlet îradeya çareseriyê nîşan bide, mafê hêviyê yê Rêberê Gelê Kurd Abdullah Ocalan bicih bîne û ji hêla fîzîkî ve azad bibe. Îrmez, banga mezinkirina têkoşînê kir. 

 

Piştî axaftinan, hunermend Îhsan Xelîkan û Koma Navenda Çanda Anatoliyayê derketin ser dikê. Welatiyan, li ber stranan bi coşeke mezin govend gerand.