Rêxistina Partiya Demokratîk a Gelan (HDP), ji bo pêkaninên dijdemokratîk pêvajoya çalakiyên demkoratîk dabû destpêkirin. Di çarçoveya çalakiyên demokratîk de di navbera 15-20'ê Tîrmehê de ji milê Colemêrg û Edîrneyê "Li dijî darbeyan meşa demokrasiyê" li gel hemû astengiyan meşiyan û gihiştin Enqereyê. Meşvanan duh li Parka Meclîsê ya (Mîllî Egemenlik) daxuyanî dan û deklerasyona demokrasiyê aşkere kir. Têkildarî meşê meşvanên demokrasiyê Parlamenterê HDP'ê Musa Pîroglu û Endamê Lijneya Rêveber ê HDP'ê (MYK) Velî Saçilik armanc û serpêhatiyên meşê axivîn. Pîroglu ku di milê meşê yê Edîrneyê de cih girt, anî ziman ku kesên îtîrazên wan û daxwazên wan ên demokratîk hene ji bo çareseriyê berê xwe didin Enqereyê û wiha got: "Ji ber ku Enqere kirdeya siyasetê ye berê xwe didin Enqereyê. Dema em derketin rê em rastî gelek astengiyan hatin. Eskeran meşa me asteng kir. Polîsan jî xwest meşê terorize bikin û binçav bikin. Li wir alozî derket. Armanc û hewldana dewletê meşê asteng bikin û bi dawî bikin. Dixwestin çawa dest pê kir wisa bi dawî bikin. Dîmenên ku TOMA dêde xuya dikir, sanneya dawî bû. Helwesta polîsan pir hişk bû. Lê biryar jî bir xurt bû. Ji bo xwedîderketin û hezkirina gel a li hemberî meşê asteng bike hemû tedbîr girtibûn. Lê gel her tişt da ber çavên xwe û hatin karwan silav kirin."  

 

'MUXALEFETA CIVAKÎ JI XEWA MIRINÊ HIŞYAR DIBE'

 

Pîroglu, anî ziman ku li Kadikoyê girseyek mezin hebû û wiha got: "Vê yekê heviya mirovan xurttir kir. Piraniya girsê kesên dengê xwe dabûn HDP'ê. Yên Tirkiyeyî li vir pir bûn. Polîs neçar man ku destûr bidin. Dewletê wisa hîs kir ku meş mezintir bibe dê veguhere tiştekî din. Min ev yek li Esenyurt û Kadikoyê hîs kir. Vê meşê moral û coşek mezin da girsê. Ev çalakî ji pêvaoya OHAL'ê heta niha çalakiyên herî xurt bûn. Li gel dorpêçê dîsa mirov hatin beşdarî karwan bûn. Medya hawiz jî hat meş şopand û xwest kriminalize bike. Lê bi ser neket. Me berê jî gelek çalakî li dar xistin. Lê piranî bi parlamenteran bi sînor man. Niha dewlet, hêza muxalif û çivak hatin hemberî hev. Wekîl û gel bi hevre bûn. Em her dem rastî vê helwesta medya îqtîdarê tên. Tişta ew berovajî dikin mafê bindestan ê berxwdanê ye. Dema gundî axa xwe diparêze, cendirmeyan li hemberî xwe dibîne. Dema karkerên SOMA dimeşin Enqereyê polîsan li hemberî xwe dibînin. Dema karkerên Yuvo li pêş fabriqeyê çalakiyê li dar dixin vê carê polîsên TEM'ê li hemberî xwe dibînin. Dema jinek li mafê xwe digere bi zora dewletê diçe. Lê em têkoşîna li dijî zorê mafekî rewa dibînin. Di navbera me û mêrê ku jinê qetil dike mesafe heye. Di navbera me û patronê ku keda karker dixwe de mesafe heye. Em li dijî zora dewletê alîgerê gel in. Ji ber vê yekê medya îqtîdarê dixwaze me wekî dijmin bide nîşandan. Meşvanên Enqereyê nîşan dan ku bingeh û sedema sereke ya pirsgirêkên li vî welatî îqtîdar bi xwe ye. Ji ber ku îqtîdar alîgirê sermayedaran e. Xwedî feraseta mêtîngerî û karakterê mêrê zordest e. Heta ku ev karekterê zordest neyê guhertin, demokrasî pêş nakeve. Ji ber ku kirdeyê pirsgirêkan Siyaseta Enqereyê ye em meşiyan Enqereyê. Sedema sereke ya meşa HDP’ê ev e. Ev destpêka meşek demdirêj e. Destpêka têkoşînek demdirêj e. Rêwîtiya siyasetek demdirêj e. Muxalefeta civakî ji xewa mirinê hişyar dibe." 

 

'QOR BI QOR ESKER RÊZ KIRIBÛN 

 

Velî Saçilik ê meşa milê Colemêrgê şopand jî anî ziman ku dema ku mirov li bajarên Kurdan bin rastî muameleyek girantir tê û wiha got: "Mirov li bajarê Kurdan li gorî Stenbol û Edîrneyê rastî muameleyek pir xerabtir tê. Hemû gir, kolan û rê bi panzer û TOMA'yan hatibûn girtin. Her der esker bûn. Ji ber ku em li wir bûn, li kolanan Qor bi Qor esker rêz kiribûn. Dema çûn Geverê, li gel polîsan Midûrê Giştî yê Polîsan jî hatibû wir. Timên Tevgera Taybet Midûrê Giştî yê Polîsan diparat. Ji bo meşa HDP’ê asteng bikin hatibûn wir. Heta ku em li wir bûn ew jî li wir bûn. Li ser fermana MYK'a AKP’ê hatibûn wir. Ji bo destûr nedin gelê Kurd û HDP bê cem hev û hêza HDP'ê xuya bibe hatibûn wir. Ji bo hezkirina gel a li hemberî HDP'ê asteng bike hatubûn wir. Destûr nedan ku navçe jî bên Colemêrgê. Lê tevî hemû astengiyan em li Colemêrgê bi coşek mezin hatin pêşwazîkirin. Welatiyan binçavkirin, girtin û lêdan dan ber çavên xwe û hatin em pêşwazî kirin û oxir kirin. Tevî ku polîsan mudaxaıle kir jî me çalakiya xwe berdewam kir. Li ser rêya Colemêrgê 5-6 dayikan astengiyên polîsan derbas kirin û hatin em pêşwazî kirin. Hatin maşîna Mîthat Sancar rawestandin û ew hembêz kirin. Tîmên taybet reviyan hatin mudaxale bikin. Dema dayikan û Sancar hev hembêz kirin wekî ku du artêş bên hemberî hev ew qas tirsiyan. Nexwestin dîmenekî wisa bê xuyakirin. 

 

'GELÊ KURD BAŞ DIZANE DÊ ÇAWA LI ZIMAN, ÇAND Û NASNAMEYA XWE XWEDÎ DERKEVE' 

 

Her kes xwedî feraseta Kurdbûnê ye. Lê dewlet wisa difikire ku bi qedexekirina her tiştî û hevkariya AKP -MHP'ê Kurd tepisandine. Rêxwistina HDP'ê bi binçavkirin û zextan zerar dîtiye. Li gel ew qas endam û rêveberên HDP’ê hatine binçavkirin û girtin jî, hestiyarî, hişyarî û ruhê gelê Kurd zindî ye. Politîkayên AKP-MHP'ê li wir bi ser neketine. Gelê Kurd baş dizane ku dê çawa li ziman, çand û nasnameya xwe xwedî derkeve. Yê AKP'ê çekên wan hene. Lê yê HDP’ê jî gel heye. Li Colemêrgê her kes ji hevre dibêjin 'Başkan' Ji ber ku heta niha gelek Serokên rêxistina partiyê hatine binçavkirin û li şûna wan yekî din hatiye hilbijartin. Bi xwezayî dest ji erka 'Serokatiyê' bernedane. Ji bo kesek bibe serok divê binçavkirin û girtinê bide berçavên xwe. Li gel her tiştî mirov zêde kom bûn. Dema em hatin Wanê jî xwestin me rast di dorpêçê de bibin ber avahiya HDP'ê û gel me nebîne. Çawa em ketin kolanê û gel Hevserokê Giştî Mithat Sancar dît gel herikî kolanê.

 

'POLÎS NEBÛYA DÊ 100 HEZAR KOM BÛBÛYA' 

 

Gel dirûşmeya ‘HDP gel e, gel li vir e' berz kirin. Polîs ketin nava tirsek mezin. Ji xwe ber girse mezin bû. Gel bû lehî û herikî qadê. Polîsan li hemberî vê yekê êrîşî gel kir. Em du kîlometre bi meşê hatin. Bê navber dirûşme berz kirin. Li çepikan xistin û lîrandin. Ger ku polîs nebûya dê 100 hezar mirov li dora me kom bûbûya. Li Bismilê em rastî êrîşê hatin. Nezî 200 mirovên kom bûbûn xwestin li gel me bimeşin. Lê mudaxale kirin. Li Rihayê jî em rasti heman dîmenê hatin. Her ku girse kom dibû mudaxaleyî wan dikirin û belav dikirin.

 

AKP BÛYE DELET, HDP BÛYE GEL 

 

Dema em hatin Amedê girsê em pêşwazî kirin. Li jêr gel û li jor JET hebûn. Dengê JÊT û tililîyên gel tev li hev dibû. Yên wan JET'ê wan hene. lê bi rastî yê me gelê me heye. AKP bûye dewlet, lê HDP gel e. Li bajarê Kurdan AKP tenê dewletê temsîl dike. Wisa difikirin ku bi şûrê xwe her tiştî bikin. Lê ew şûr nikare dilê gel fetih bike. Ev yek li Amedê pir zelal xuya bû. Her çend mesafeyek fîzîkî têxin nava me jî dil yek e. Nikarin HDP’ê ji dil, aqil û hişê me bibin. Êdî ji bo AKP'ê her tişt ji berê bêtir zortir e. Ji me re dibêjin mesafeyê têxin nava xwe û terorê. Me demek dirêj e navber xistiye navbera xwe û terora AKP'ê. Em bi AKP'ê re hevdîtinan nakin. Ger ku qala terorê bikin divê qala AKP-MHP'ê bikin. Ji ber ku tişta min dît hişmendiya li bajarê Kurdan li ser Kurdan terorê dimeşinin AKP ye. Meşa me carek din aşkere kir ku li Tirkiye muxalefeta herî mezin HDP ye. Ev yek dê hemû plana qesrê xera bike. 

 

MA / Deniz Nazlim - Berîvan Altan