
Bi deh hezaran kes ji bo kongreya HDP’ê li Enqereyê ne

2022-07-03 09:56:19


	ENQERE - Bi deh hezaran kesên ji bo 5’emîn Kongreya Asayî ya Mezin a HDP’ê ji her çar aliyên welêt ber bi Enqereyê ve herikîn, bi dirûşma “Bê Serok jiyan nabe” peyama xwe ya ewil dan.&nbsp;

	&nbsp;

	Ji Colemêrgê heta Edîrneyê, ji Trabzonê heta Îzmîrê, ji Amedê heta Stenbolê û ji her çar aliyên welêt, bi deh hezaran kes ji bo 5’emîn Kongreya Asayî ya Partiya Demokratîk a Gelan (HDP) hatin Enqereyê. Ji 7 salî heta 70’ê salî hemû kesî berê xwe dan Eywana Werzîşê ya Arenayê û li pêşiya eywanê goven gerandin.&nbsp;

	&nbsp;

	Ji serê sibehê saet derdora 8.30’an ve bi hezaran kes ji hêla Parka Ciwanan bi dirûşm û alayên HDP’ê ketin eywana kongreyê. Di dema ketina eywanê de dirûşmên “Bê Serok jiyan nabe” û “HDP gel e û gel ki vê derê ye” berz kirin. Jinên bi şaxên zeytûnan ku sembola aştiyê ne ketin eywanê, li dijî zextan peyama têkoşînê dan.&nbsp;

	&nbsp;

	AZADÎ BO GIRTIYAN XWESTIN&nbsp;

	&nbsp;

	Beşdaran li eywanê peyamên “HDP gel e û gel li vê derê ye” û “HDP hêvî ye û hêvî li ser pêya ne” dan. Her wiha bi daxwaza azadiya girtiyan û yên înfaza wan hatine şewitandin jî dirûşma “Bijî berxwedana zindanan” berz kirin. Beşdarên ku bal kişandin ser tecrîda li Îmraliyê, dirûşmên “Bijî Serok Apo” û “Jin jiyan azadî” berz kirin.&nbsp;

	&nbsp;

	KELECANÊ DEST PÊ KIR

	&nbsp;

	Bi hezaran kesên ji bo kongreyê ji rê û deravên dûr hatine Enqereyê, bi coş û kelecaneke mezin beşdarî kongreyê bûn. Jinên ku laçikên spî û cil û bergên kurdî li xwe kiribûn, beşdarî horonê bûn. Beşdarên ku di saetên zû yên serê sibehê de dest bi gerandina govendê kirin, bi dirûşma “Bijî Serok Apo” peyama xwe dan.&nbsp;

	&nbsp;

	Beşdariya kongreyê berdewam dike û girseya bicoş govend û dirûşmên xwe didomînin.

	&nbsp;