
Derbarê 10 kesan de ji ber êrişa mala polîsan a Mezîtliyê doz hat vekirin  

2023-03-31 13:00:30


	&nbsp;

	MÊRSÎN - Têkildarî êrişa li dijî Mala Polîsan a li Mezîtliyê endama HPG’ê Dilşah Ercan jî di nav de derbarê 10 kesan de doz hat vekirin. Îdianame daxuyaniyên Wezîrê Karên Navxweyî Suleyman Soylû ku piştî teqînê kirin, diderewîne.&nbsp;

	&nbsp;

	Li dijî Mala Polîsana li taxa Tece ya li navçeya Mezîtlî ya Mêrsînê di 26’ê îlonê de êriş pêk hatibû. Di êrişê de polîsek hatibû kuştin û gelek polîs birîndar bûbûn. Serdozgeriya Komarê ya Mêrsînê derbarê bûyerê de lêpirsîn dabû destpêkirin û ev lêpirsîn temam bû.&nbsp;

	&nbsp;

	Serdozgeriyê bi îdiayên wek “Sîleh û gule bêdestûr anîne welat, çêkirina wan û neqilkirin û firotina wan”, “Madeyên talûke bêdestûr li ser xwe gerandine”, “Kuştina wezîfedarê cemaweriyê bi sêwirandinê”, “Hewldana kuştina sêwirandî ya kes”, “Xesar dane mal û milk” û “xesar dane malê cemaweriyê” û “Xerakirina yekitiya dewletê û hevpariya welat” derbarê A.G., A.A., A.E., K.B., M.D., M.K., S.D., Z.O. yên girtî û F.S. ê negirtî û endama HPG’ê Dilşah Ercan de îdianame amade kir.&nbsp;

	&nbsp;

	Dozgeriyê îdianameyê pêşkêşî 2’yemîn Dadgeha Cezayê Giran a Mêrsînê kir. Dadgehê îdianame qebûl kir û derbarê 10 kesan de bi heman îdiayan doz vekir. Danişîna ewil a dozê dê di 26’ê gulanê de bê lidarxistin.&nbsp;

	&nbsp;

	Polîsê hatiye kuştin Sedat Gezer wek “maktul”, bekçî û polîs jî di nav de 12 kes wek “muştekî” û Midûriyeta Polîsan a Mêrsînê û Zanîngeha Mêrsînê jî wek “ji sûc xesarê dîtine” di îdianameyê de cih digirin.&nbsp;

	&nbsp;

	Îdianame ji 66 rûpelan pêk tê. 15 rûpel li ser avakirina PKK’ê û xebatên wê hatiye nivîsandin. Her wiha wêneyên ku endamên HPG’ê Dîlara Urper (Sara Tolhildan) û Emek Feremez Hisên (Rûken Zelal) ku di êrişê de canê xwe ji dest dan çawa hatine cihê bûyerê û çalakiyê çawa kirine di îdianameyê de cih digirin. Her wiha di îdianameyê de cih dane îfadeyên polîs û bekçiyên muştekî û hat destnîşankirin ku bi endamê HPG'ê re şer kirine.&nbsp;

	&nbsp;

	HPG Û TESTA DNA’YÊ GOT ‘NE DILŞAH ERCAN E’&nbsp;

	&nbsp;

	Tevî ku HPG’ê derbarê bûyerê de daxuyanî da û navê endamên xwe ku êriş pêk anîne eşkere kir jî lê dozgerî îdia dike ku ji her du endamên HPG’ê yek jê Dilşah Ercan e û li gorî îfadeyên îtîrafkarên bi navê A.D. ku di 27’ê ilonê de li emniyetê daye, îdia dike ku wî Dilşah Ercan nas kiriye.&nbsp;

	&nbsp;

	Li gel ku ji bo her du cenazeyan nîmûneya DNA’yê ji dayik û bavê Dilşah Erdan girt jî lê xwîna wan li ya her du cenazeyan jî nehat.&nbsp;

	&nbsp;

	Îdianameya ku hatiye amadekirin di heman demê de daxuyanî û gotinên Wezîrê Karên Navxweyî Suleyman Soylû diderewîne.&nbsp;

	&nbsp;

	Dozgeriyê di çarçoveya lêpirsînê de derbarê ferdên malbata Dilşah Ercan de jî biryara neşopandinê da.&nbsp;

	&nbsp;

	MA / Hamdullah Yagiz Kesen

	&nbsp;