Rêxistinên jinan ên Kurdistanê: Em ê tecrîdê bişkinin û Ocalan azad bikin 2023-04-01 09:06:14 ŞIRNEX - Rêxistinên jinên kurd ên li çar parçeyên Kurdistanê têdikoşin diyar kirin ku li dijî tecrîda girankirî bêtir pêwîstî bêtir bi tekoşîna jinan heye û gotin: "Heta ku Rêber Apo azad nebe pirsgirêkên Rojhilata Navîn çareser nabin. Em tevgerên jin em soz didin ku em ê tecrîdê bişkinin."    Tecrîda girankirî ya li ser Rêberê PKK'ê Abdullah Ocalan ku di Girtîgeha Îmraliyê ya Tîpa F'yê de berdewam dike. Herî dawî Ocalan, di navbera 2-22’yê Gulanê, di navbera 12-18’ê Hezîranê û di 7’ê Tebaxa 2019’an de bi parezerên xwe re hevdîtinê kiribû. Ji wê rojê heta niha jî destûra hevdîtinan a bi parêzeran re nayê dayîn. Abdullah Ocalan cara ewil di 27’ê Nîsana sala 2020’î de sûd ji mafê hevdîtina bi telefonê ya bi malbata xwe re girt. Piştî vê, gava têkildarî Abdullah Ocalan li ser medyaya civakî çend agahî hatin belavkirin, bertekên raya giştî zêde bûbûn. Li gel bertekan Abdullah Ocalan di 25’ê Adara 2021’ê de bi birayê xwe Mehmet Ocalan re bi ser telefonê axivîbû. Lê belê hevdîtina wan di nîvî de hatibû qutkirin. Ji wê rojê heta niha ku nêzî 3 sal qediyane, tu agahî ji Ocalan û girtiyên din ên li Îmraliyê Omer Hayrî Konar, Veyseî Aktaş û Hamlî Yildirim nayê standin.    Bertekên li dijî tecrîda girankirî li kolan, tax û bajaran dewam dikin. Li tevî vê bêdengiya saziyên mafên mirovan ên navneteweyî jî dewam dike. Tecrîda ku her ku diçe kûr dibe bi xwe re alozî, şer û pêvçûnan jî tîne.    Ocalan ku 24 sal in rojbûna xwe di nava çar dîwaran de pêşwazî dike, îsal jî dê bi girseyî rojbûna wî li cihê ku lê ji dayik bûye, li Amarayê bê pîrozkirin. Jinên ku ji bo şikandina tecrîda girankirî li çar perçeyên Kurdistanê li hemû qadên jiyanê têdikoşin û li dora felsefeya jinê ya Ocalan xwe birêxistin dikin, der barê tecrîta girankirî de ji Ajansa Mezopotamya (MA) re axivîn.    TJA: TECRÎDÊ BI XWE RE GELEK NEYÎNÎ ANÎN   Aktivîsta Tevgera Jinên Azad (TJA) Guler Tunç anî ziman ku bi girankirina tecrîdê tê xwestin ku şerê heyî kûrtir bibe û wiha axivî: "Ev 2 sal in ku li ser birêz Ocalan tecrîdeke girankirî heye. Ne bi malbata xwe re ne jî bi parêzerên xwe re nikare hevdîtinê bike. Ev çend sal e ku em tu agahiyê jê nastînin. Li tevî tecrîda girankirî bi awayekî keyfî cezayê disîplînê li birêz Ocalan tê birîn. Ya rastî ev tecrîd bi hilweşandina maseya muzakereyê kûrtir bû. Vê tecrîdê bi xwe re gelek tişt anîn. Li Kurdistanê û Rojhilata Navîn yekem sedema pirsgirêk û aloziyan tecrîda girankirî ya li ser birêz Ocalan e. Ji ber vê îro tu gel nikare bi awayekî azad doza mafê xwe bike, kes nikare bi awayekî azad li ser axa xwe bijî. Piştî pêvajoya çareseriyê di nava gelên Tirkiyeyê û Kurdistanê de xetimandineke gelek mezin çêbû. Armanc jî ew bû ku her du gelan bînin hemberî hev. Dixwazin ku ew pira di nava gelên Tirkiyeyê û Kurdistanê de hilweşinin. Dixwazin ku ev xeta ku hatiye çêkirin bênefes bihêlin. Ji ber ku dewlet dizane ger birêz Ocalan biaxive dê li Kurdistan, Tirkiye û Rojhilata Navîn çareserî pêk bê, guhertin çêbibin. Dewlet dizane ku aştî û azadiya gelan li Îmraliyê dest pê dike. Dewlet naxwaze ku gelên Rojhilata Navîn bigihîjin van deskeftiyên xwe û ji ber wê jî bi qasî ku ji destê wan tê hewl didin ku Îmraliyê bêdeng bikin. Bêdengkirina Îmraliyê wan li ser pêyan dihêle."   'DIVÊ KU JIN DENGÊ XWE BÊTIR DERBIXÎNIN'   Tunçê diyar kir ku ji vê tecrîdê herî zêde jin bandor dibin û wiha domand: "Birêz Ocalan ji jinan re xetek daye avakirin. Ev xet jî paradîgmaya jinên azad e. Îro bi mîlyonan jin li dora vê paradîgmaya azad civiyane û li qadan li ber xwe didin. Bi vê paradîgmayê jinan serî rakir, li ber xwe dan û tekoşîna xwe heta roja me ya îro anîn. Dewlet jî dizane ku ev paradîgma ji nava çar dîwaran derkeve ew ê nikaribe ku pêşiya jinên azad bigire. Ji ber ku jinên kurd bi vê paradîgmayê dimeşin û bi saya vê paradîgmayê li ser lingan in. Dibe ku birêz Ocalan îro di nav çar dîwaran de be, lê ew paradîgmaya ku wî daye pêşiya me kêlî bi kêlî pêk tê. Her çi qasî bi tecrîdkirinê qirkirinên jinan, aloziyên civakî zêde bibin jî em li ber xwe didin. Şikandina vê tecrîdê ne hesan e. Lê bi têkoşîn û berxwedana xwe em ê bikaribin bişkînin. Şikandina tecrîdê her tim di rojeva me de ye. Çawa ku di gelek serkeftinan de me jinan pêşengtî kiriye, ev tecrîde jî dê bi destê me jinan bê şikandin. Ew hêz û bawerî di me de heye. Em ê vê 4'ê Nîsanê bikin roja şikandina tecrîdê. Em jin dê 4'ê Nisanê ji bo şikandina tecrîdê berê xwe bidin Amarayê. Banga me ji bo jinan; bên Amarayê û li dijî vê tecrîdê dengê xwe bilind bikin. Îro di şexsê birêz Ocalan de tecrîd li ser jina ye, li ser paradîgmaya jinê ye. Ji ber wê divê em jin dengê xwe bêtir derxînin."   TAJÊ: TECRÎT DI ŞEXSÊ WÎ DE LI ÇAR PERÇEYÊN KURDISTANÊ YE   Ji Şengalê ji Tevgera Azadiya Jinên Êzidî (TAJÊ) Neam Bedelê jî bi lêv kir ku bi felsefeya Ocalan bi mîlyonan jin ji xewê rabin û ev tişt got: "Di şexsê Ocalan de li ser tevahiya gelên bindest tecrîteke girankirî heye. Ev tecrîd îro li ser her çar perçeyên Kurdistanê heye. Îro bi milyonan mirov di bin vê tecrîdê de ne. Îro ev tecrîd bandorê li her kêliyeke jiyana me dike. Divê pêşî li vê tecrîdê bê girtin û ji bo şikandina wê bêtir têkoşîn bê dayin. Em ê îradeya xwe bi destê tu kesî de bernedin."   Bedelê destnîşan kir ku tecrîd şer e, pêvçûn e û mirin e û wiha pê de çû: "Heger ku ev tecrîda girankirî tunebûna, îro Şengal nedihat bombebarankirin. Erka her jineke kurd e ku li hemberî vê tecrîdê rabe. Heta ku ev tecrîda li ser birêz Ocalan bi dawî nebe divê em jin li malên xwe rûnenên. Ev tecrîd piralî ye. Ji ber wê jî divê jinên çar perçeyên Kurdistanê rabin ser pêyan û qadan terk nekin. Felsefeya Ocalan pêşiya jinan vekir. Bû sedem ku jin bikaribin mafê xwe bi dest bixin û ji bo mafê xwe tebikoşin. Ew jinên ku di civakê de tune dihatin hesibandin îro pêşengiya civakekê dikin. Ev bi saya Ocalan çêbû. Em hêvî dikin ku 4'ê Nîsanê bibe roja azadiya rêber Ocalan. 4'ê Nîsanê li her çar perçeyên Kurdistanê pîroz be. "   KONGREYA STAR: HETA EM WÎ AZAD NEKIN EM JÎ DÊ AZAD NEBIN   Endama Koordînasyona Kongreya Star a Kantona Hesekê Rîma Îsa Mehmûdê jî bal kişand li ser rol û mîsyona Ocalan a li Rojhilata Navîn û wiha axivî: "Em tecrîda li ser Rêber Apo şermezar dikin. Di qanûnên tu dewletan de tişteke wiha tune ye. Rêber Apo di girtîgehê de tecrîda li ser tecrîdê dibîne. Çima tecrîdê giran dikin? Ji bo îradeya gelên Rojhilatê Kurdistanê bişkînin, giran dikin. Lê îradeya gelê kurd bi van pêkanînan nayê şikandin. Îro bi mîlyonan kurd re ereb, suryan, tirkmen û çi gelê ku zor û zehmetî dîtine, îro daxwaza azadiya Rêber Apo dikin. Azadiya me bi azadiya Rêber Apo ve girêdayî ye. Heta ku Rêber Apo azad nebe pirsgirêkên Rojhilata Navîn çareser nabin û azad nabe."   Mehmûdê ku got "Em tevgera jinê ya Rojavayê Kurdistanê em soz didin ku em ê tecrîdê bişkinin" axaftina xwe wiha domand: "Heta ku em vê felsefeyê azad nekin em ê azad nebin. Ew dewletên ku dibêjin em mafê mirovan diparêzin çima li hemberî vê tecrîdê xwe bêdeng dikin? Bi tecrîdê re êrîşên dewleta tirk ê bi çekên kîmyewî zêde dibin. Bi van êrîşan dixwazin ku îradeya li çiyê bişkînin. Bi şer, bombardiman û tunekirinê hewl didin ku îradeya kurd bişkinin. Lê ev îrade bi hêsanî nayê şikandin. Rewşa tenduristiya Reper Apo çawa ye, di rewşeke çawa de ye, em nizanin. Bi salan e ku tu agahî jê nayên standin. Îro tevahiya Rojhilat li ser pêyan e. Îro tevahiya gelên Rojhilatê Kurdistanê doza azadiya wî dike. Îro bi mîlyonan kes li ser pêyan in û doza rêber Apo dikin, doza azadiya wî dikin. Divê daxwazên gelên Rojhilat bên guhdarkirin û bên pêkanîn. Yê ku ev gel azad kir Rêber Apo ye, kesê ku xwedî li vî gelî derket Rêper Apo bû. Heta ku ev gel Rêberê xwe azad bibîne dê li ser pêyan be. Em bang li dewletên ku heq û hiqûqên mirovahiyê diparêzin dikin; heger ku heq û hiqûqa wan hebûya tecrîdê qebûl nedikirin. Em tevgera jinan dibêjin; heta ku Rêber Apo azad nebe em ê li ser pêyan bin. Heta ku em rêberê xwe azad nekin em jî dê azad nebin."   KJAR:BI PARADÎGMAYA WÎ SERHILDAN ÇÊBÛ   Ji Rojhilatê ji Jinên Azad a Rojhilatê Kurdistan (KJAR) Ferîba Şekohniyayê jî anî ziman ku paradîgmaya Ocalan li Rojhilat bû sedema serhildaneke nû û got ku hêza vê serdemê ya guhertinê bi jinan re heye û wiha axivî: "Ev 2 sal in tu agahî ji Rêber Apo nayên girtin û tevî hemû hewldan û daxwazên malbat û parêzeran jî bi ser neketin. Dewleta tirk gelek caran îdia kir ku li Îmraliyê tecrîd tune ye. Eger wisa be nehiştina hevdîtina malbat û parêzerên wî çi ye? Ocalan li pişt dîwaran jî, bi daxuyaniyan û diyarkirina helwesta xwe ya siyasî pêşengiya vê tevgera civakî kir. Ocalan tevî zextên fizîkî û derûnî, îşkenceyên giran jî berxwedan û sekneke bêhempa nişan da. Mafê gelê kurd parast. Di rastiyê de dewleta tirk û Erdogan bi tecrîdkirina Ocalan re dixwazin ku kurdan ji holê rakin. Rêber Apo ne tenê ji bo neteweya kurd ji bo yekîtiya hemû neteweyan tekoşiya û ji ber wê jî kesekî pir bi bandore. Helbet bandora wî li ser jinan jî heye. Bi dirûşmeya 'Jin Jiyan Azadî' jina azad afirand û di rastiyê de paradîgmaya modernîteya demokratîk a pêşketî weke alternatîf hat rojevê."   Şekohniyayê wiha domand: "Di modernîteya kapîtalîst de jin weke giraniyeke bingehîn a afirandina dibîne û di nirxandinên xwe de jî diyar dike ku'bêyî azadiya jinê civak azad nabe' azadiya Kurdistanê azadiya jinê de dibîne. Û îro bi vê dirûşmeya ku wî afirand serhildanek çêbû. Di şoreşa Rojhilat de yek dengî ev dirûşme tê bilind kirin. Hebûna jinê hem li çar parçeyên Kurdistanê û hem jî li Rojhilata Navîn êdî gelekî girînge. Mînaka vê jî şerê li Kobanê û Şengalê ku bi çeteyên DAIŞ’ê re bû. Jinên kurd bi vê paradîgmayê xwe careke din îspat kirin.Yekîtiya Ewrupa di bin zextê de ye û ji bo wê jî li hemberî tecrîtê xwe bêdeng dike. Di rastiyê de divê jinên Kurd ji bo azadiya Rêber Apo tekoşîna xwe mezintir bikin. Heta Rêber Apo azad nebe Rojhilata Navîn jî azad û aram nabe.4'ê  Nîsanê ne tenê rojbûna Rêber Apo ye, di heman demê de rojbûna neteweya kurd e. Ev roj destpêkeke nû ye. Hêvîdarim ku rojbûna wî bibe roja azadkirina wî. 4'ê Nîsanê li çar perçeyên Kurdistanê pîroz be."