Di daxuyaniyê de pankarta "Serokê xwe azad dikin komployê têk dibin", "Ji komployê re na, azadî ji Birêz Ocalan re" hatin vekirin û dowîzên "Ji bo aştiyeke birûmet", "Bijî biratîya gelan", "Bê serok aştî nabe", "Berxwêdana gel komployê pûç dike", "Bê serok aştî şaşitî ye", "Ji sermuzakerevan Birêz Ocalan re azadî" hatin hilgirtin. 

 

Girseya ku xwest ber bi Parka Saraçhaneyê bimeşe, ji aliyê polîsan ve hat dorpêçkirin. Di dema rageşiyê de welatiyên i aliyê polîsan ve hatin tahmdan û ketin erdê, birîndar bûn. 

 

Hevseroka DEM Partiyê ya Stenbolê Arîfe Çinarê ku bertek nîşanî astengiyê da û got: "Em bi tecrîdeke ku li ser sermuzakerevan Birêz Ocalan re rû bi rû ne. Birêz Ocalan 27 sal in di bin tecrîdê de ye. Heya tecrîda li ser birêz Ocalan ranebe û bi awayekî fizîkî azad nebe, em ê bitêkoşin." 

 

Parlameneterê DEM Partiyê yê Stenbolê û endamê Komisyona MEclisê Cengîz Çiçek jî anî ziman ku komplo tenê ne li dijî Abdullah Ocalan e û got ku aştiyeke rasteqîn ancax bi rêzgirtina li jiyanê û nasnameyê dest pê dike. Çiçek ku bal kişand ser tecrîda li ser Abdullah Ocalan got: "Birêz Ocalan 27 salan di hucreya yekkesî de îdeolojiya Komara Demokratîk ava kir."

 

Metna daxuyaniyê ji aliyê Rêvebera DEM Partiyê ya Stenbolê Gîzem Kuzulukê ve hat xwendin.  

 

Gûzem Kuzulukê wiha got: “9ê Cotmeha 1998an, ne tenê destpêka komployeke navneteweyî ye ku li dijî birêz Ocalan hatibû plankirin. Di heman demê de mîladek e ji bo êrîşeke berfireh a li dijî hêviyên aştiyê yên gelên Kurdistanê û Rojhilata Navîn. Ev komplo, operasyoneke navneteweyî bû ku li dijî îradeya azadiyê ya gelê Kurd, li dijî ramaneke ku dikaribû di Rojhilata Navîn de bibe pêşengê veguherîna demokratîk, hatibû plankirin.

 

Ji ber ku raman û paradîgmaya ku birêz Ocalan, Ocalan pêş xistibû, li hemberî sîstema şer, îstîsmar û serdestiyê ku gelan rû bi rû dihêle, bi perspektîfa Kurdistana azad û Rojhilata Navîn a demokratîk, derketineke aştiyê bû. Navendên modernîteya kapîtalîst xwestin vê ramanê teslîm bigirin û îradeya azad a gelan dîl bigirin. Lê belê, tevî şertên giran ên tecrîdê yên ku 26 sal in li Îmraliyê didomin, berxwedana birêz Ocalan, weke rawestiyeke ramanî û siyasî ya di asta dîrokî de armanca komployê pûç kiriye.

 

Gelê Kurd ji zêdetirî sedsal e li dijî polîtîkayên înkar û îmhayê li ber xwe dide. Têgîna ‘Kurd tune ne’, bûye îdeolojiya hevpar a avakirinê ya her çar netewe dewletan, her hewldana mafdarî bi tundî hatiye tepisandin. Lê belê kevneşopiya berxwedanê ya li ser vê axê, her carê ev tarîtiye parçe kiriye. Derketina birêz Ocalan a li ser qada dîrokê, mohra ‘em hene’ ya gelê ku zincîrên înkarê lê hatibûn danîn e. Qonaxa dîrokî ya ku gelê Kurd bi têkoşîna xwe ya azadiyê ya 52 salan gihîştiye, êdî demeke wisa afirandiye ku tu hêz nikare bibêje ‘Kurd tune ne.’ Îro îradeya gelê me, ramana wî û rêxistinbûna wî, nîşana herî berbiçav a vê rastiyê ye.

 

Lê em vê yekê dizanin ku; azadiya gelekî ku rêberê wî dîl girtiye, kêm dimîne. Tecrîda giran a ku birêz Ocalan salan e li Îmraliyê tê re derbas dibe, ne tenê li ser kesekî lê êrişek e li dijî hêviya aştiyê ya gelekî ye. Ji ber vê yekê, azadiya fizîkî ya birêz Ocalan, ji bo paşeroja demokratîk a gelê Kurd û hemû civaka Tirkiyeyê, pêdiviyeke neçar e. Îro gelê Kurd li meydanan bi gotina ‘Bê Serok jiyan nabe” vê rastiyê bilind dike. Ev gotin ne tenê dirûşmek e; daxuyaniya îradeyê ye ku têkiliya diyalektîk a di navbera jiyana azad û rêbertiya azad de, bi awayekî herî zelal tîne ziman. Di Cotmeha 2025’an de, Kampanyaya Azadiyê ya Cîhanî ku sala duyemîn tijî dike, bi armanca misogerkirina azadiya fizîkî ya birêz Ocalan, belavkirina tarîtiya ku komployê afirandiye û gihandina gelên Rojhilata Navîn ber bi asoyê aştiyê ve, mezin dibe. Em jî weke parçeyek ji vê kampanyaya dîrokî, di biryardariya mezinkirina têkoşîna gelê Kurd û hemû hêzên demokrasiyê de ne. Hewldanên modernîteya kapîtalîst ên ji bo vemirandina agirê azadiyê yê ku birêz Ocalan pêxistibû, pûç derketin; berevajî vê, ev agir roj bi roj zêdetir geş bûye û îro bûye meşaleyek ku rêya azadiyê ya gelê Kurd û hemû gelên Rojhilata Navîn ronî dike.

 

Niha erkê ku dikeve ser milê me ew e ku em vê meşaleyê dest bi dest bigerînin, li çar aliyên cîhanê belav bikin û rêya azadiya birêz Ocalan vekin. Azadiya birêz Ocalan, ji bo aştiya gelan û paşeroja demokratîk gaveke herî berbiçav e. Dema ku em li dijî komployê dengê xwe bilind dikin, bila em dengê azadî û aştiyê jî bi hev re mezin bikin.” 

 

Piştî daxuyaniyê dorpêça polîsan demeke dirêj dewam kir. Piştî dorpêç bi dawî bû, girse belav bû.