Zêdetirî 45 rojan e ku bi Rêberê Gelê Kurd Abdullah Ocalan re hevdîtin nehatiye kirin. Her wiha, di 12 salan de der barê biryara Dadgeha Mafên Mirovan a Ewropayê (DMME) ya 2014'an a li ser "mafê hêviyê" de tu gav nehatiye avêtin. Platforma Saziyên Demokratîk dê di 25'ê Çileyê de li Amedê mîtînga "Hêvî û Azadî" li dar bixe û daxwaza "mafê hêviyê" û azadiya fizîkî ya Abdullah Ocalan bike.

 

Endamê Şaxa Komeleya Hiqûqnasên Ji Bo Azadiyê (OHD) a Amedê Şemdîn Şahîn, der barê tecrîdê, "mafê hêviyê" û mîtînga plankirî de axivî û diyar kir ku hem mafên girtiyan hem jî yên hikumxwaran li gorî qanûnên Tirkiyeyê li ser bingeheke takekesî nayên guhertin. Şahîn destnîşan kir ku ev qanûn dema ku dor tê ser Girtîgeha Îmraliyê nayên sepandin û bal kişand ser rewşa bêhempa ya li wir û tecrîda giran a ku 27 sal in berdewam dike.

 

‘TERÎD DIDOME'

 

Şahîn diyar kir ku her çend ji Banga Aştî û Civaka Demokratîk a 27'ê Sibatê vir ve hin serdan hatibin hêsankirin jî, hîn jî tu nîşanek tune ku serdanên malbat û parêzeran bi rêkûpêk bên kirin û got: "Ji destpêka pêvajoyê ve hevdîtin pêk tên. Lêbelê, serdanên heftane yên malbat û parêzeran hîn jî pêk nayên; ew tên astengkirin. Nêzîkî mehekê ye, ji ber rewşa siyasî ya heyî tu hevdîtin nehatine kirin. Ev pêvajoya tecrîdê, ku 27 sal in berdewam dike, hîn jî berdewam dike."

 

Şahîn got ku Girava Îmraliyê li cîhanê bêmînak e û got: "Em qala girtîgehekê dikin ku kompleks, tecrîd û her tiştê wê bi taybetî hatiye sêwirandin. Dema ku em dibînin ku ne tenê avahî, lê tevahiya derdora wê jî li gorî wê hatiye sêwirandin, em dikarin bibêjin ku tecrîda giran berdewam dike."

 

Şahîn bal kişand ser "mafê hêviyê" û destnîşan kir ku her çend ev maf divê li gorî qanûnên herêmî û navneteweyî tavilê were bicîhanîn jî, mafên di qanûnên herêmî de jî nayên bicîhanîn û tecrîd berdewam dike. Şahîn got: "Em qala mafê hêviyê dikin, lê şert û mercên tecrîda giran hene. Em bawer dikin ku divê ev şert û merc tavilê werin çareserkirin."

 

NEAVÊTINA GAVAN

 

Şahîn destnîşan kir ku pêwîstiya pêkanîna "mafê hêviyê" heye û bi bîr xist ku ji bo pêkanîna biryara DMME'yê gelek caran dem ji Tirkiyeyê re hatiye dayîn. Şahîn diyar kir ku ji banga 27'ê Sibatê vir ve bangên ji bo fesixkirin PKK'ê, tunekirina çekan û vekirina rêya siyaseta demokratîk hatine bicîhanîn û got: "Birêz Ocalan hemû gavên ku jê dihatin hêvîkirin bi cih aniye. Bi heman awayî, banga Bahçelî jî di cîh de bû. Di vî warî de, dewlet hewce dike ku mekanîzmayên xwe biguherîne. Pêdivî ye ku rêziknameyên qanûnî yên pêwîst bike. Lê di vê qonaxê de, li hember neavêtina gavan berxwedan heye."

 

‘DEMILDEST DIVÊ ŞERT Û MERCÊN FIZÎKÎ BÊN RASTKIRIN'

 

Şahîn got: "Birêz Abdullah Ocalan xwedî şiyana şekildana siyaseta Rojhilata Navîn e ji hêla statu, hêz û bandora xwe ve." Şahîn bilêv kir ku ev yek hem ji hêla Tirkiyeyê ve û hem jî ji hêla mekanîzmayên navneteweyî ve tê naskirin. Şahîn her wiha diyar kir ku her kes Abdullah Ocalan wekî aktorê sereke û kesayetiya diyarker di vê pêvajoyê de nas dike û wiha domand: "Di vê çarçoveyê de, eşkere ye ku dema ku dewlet hevdîtinên yek bi yek dike, divê şert û mercên fizîkî jî werin baştirkirin. Ev tiştek e ku divê ji hêla exlaqî û qanûnî ve were kirin. Divê şert û mercên fizîkî tavilê werin baştirkirin. Em bawer dikin ku ev ê hem ji bo siyaseta Rojhilata Navînê û hem jî ji bo Tirkiyeyê bandorên erênî bike."

 

Şahîn diyar kir ku aktorên sereke yên di van pêvajoyan de gel in û destnîşan kir ku divê gel bi awayekî çalak beşdarî van pêvajoyan bibe da ku mekanîzmayan pêşve bibe. Şahîn anî ziman ku divê hemû beşên civakê ji bo rêveçûna saxlem a pêvajoyê li Qada Îstasyonê ku dê mîtînga "Hêvî û Azadî" lê were lidarxistin, amade bin û destnîşan kir ku divê gel daxwazên xwe yên ji bo aştî û demokrasiyê li qadê bînin ziman. Şahîn bilêv kir ku "mafê hêviyê" ne mafek e ku dikare were danûstandinkirin û got: "Divê azadiya fizîkî ya birêz Ocalan tavilê were misogerkirin. Em vê yekê wekî mijareke danûstandinê nabînin. Ji ber vê yekê, divê her kes beşdarî mîtînga 25'ê Çileyê bibe. Em bawer dikin ku azadiya fizîkî ya birêz Ocalan ji bo avakirina aştiyê bivênevê ye. Di vî warî de, em her kesî vedixwînin mîtîngê."

 

MA / Rûkiye Payîz Adiguzel