STENBOL - Ji bo tehliyeya Mehmet Edîp Taşar ê ku 19 caran anjiyo bûye û ATK’ê 3 caran rapora "dikare di girtîgehê de bimîne" dayê, carekî din serlêdan hate kirin.

 

Ji bo berdana Mehmet Edîp Taşar ê 70 salî ku di lîsteya "girtiyên nexweş ên giran" a Komeleya Mafên Mirovan (ÎHD) de ye, carekî din serlêdan hate kirin. Taşar di Girtîgeha Tîpa L a Hejmar 5 a Marmarayê de tê ragirtin û ji ber nexweşiya dil rojê çend caran dibin nexweşxaneyê. Taşar herî dawî di 11’ê Sibatê de cara 19’emîn anjiyo bû. Tevî ku 8 stent di dilê wî de hene û rîtma dilê wî xera bûye, Saziya Tiba Edlî (ATK) 3 caran rapora "dikare di girtîgehê de bimîne" dayê. Li ser vê yekê, parêzerên Taşar ji bo taloqkirina înfazê carekî din serî li Serdozgeriya Komarê ya Bakirkoyê dan.

 

BIRYARÊN NETEWEYÎ Û NAVNETEWEYÎ HATIN BIBÎRXISTIN

 

Di serlêdanê de hat destnîşankirin ku Taşar nikare bi tena serê xwe jiyana xwe bidomîne û bi kursiya biteker diçe hevdîtina parêzeran. Hate diyarkirin ku ev rewş li dijî "qedexeya îşkence û sepana xerab" e û di vê mijarê de xala 17’emîn a Destûra Bingehîn û xala 3’yemîn a Peymana Mafên Mirovan a Ewropayê (PMME) hatin bibîrxistin. Di serlêdanê de wiha hat gotin: "Li gorî xala 3’yemîn a PMME’yê, dewlet mecbûr e ku şert û mercên girtina kesekî li gora rûmeta mirovahiyê amade bike û tenduristiya wî biparêze."

 

DAXWAZA TALOQKIRINA ÎNFAZÊ

 

Di serlêdanê de hate daxwazkirin ku Taşar bişînin saziyekî tenduristiyê, raporekî nû jê re bê dayîn û li gorî xala 16’emîn a Qanûna bi Hejmara 5275’an, înfaza wî bê taloqkirin û bê berdan.

 

'REWŞA WÎ PIR XIRABE ÊDÎ NAYÊ NASKIRIN'

 

Parêzerê Taşar diyar kir ku rewşa muwekîlê wî gelekî giran e û wiha axivî: "Ez dikarim rewşa dawî ya Mehmet Edîp Taşar wiha vebêjim: Taşar beriya çend rojan dîsa anjiyo bû. Nêzî 4 rojan di nexweşxaneyê de ma û paşê şandin girtîgehê. Rewşa wî ya tenduristiyê niha gelekî krîtîk e. Nikare bi tena serê xwe xwarinê bixwe û dermanên xwe vexwe. Hevalên wî yên li girtîgehê alîkariya wî dikin. Malbata wî di hevdîtina dawî de diyar kir ku ew qas zeîf bûye ku êdî nayê naskirin û di dema hevdîtinê de Taşar serê xwe her tim daniye ser masê û nekarî nefesê bigire."

 

MA / Omer Îbrahîmoglû