Di 3’yê Hezîrana 2024’an de li Şaredariya Colemêrgê ya DEM Partiyî qeyûm hate tayînkirin. Hevşaredarê Colemêrgê Mehmet Siddik Akiş jî di 5’ê Hezîranê de hate girtin. Walîtiya Amedê piştî biryarê, ji bo hemû çalakî û xwepêşandanên di navbera 3 û 7’ê Hezîrana 2024’an de biryara qedexeyê da. 

 

Baroya Amedê, bi sedema “Biryara qedexeyê li gorî xala 34’an a Destûra Bingehîn û xala 11’an a Peymana Mafên Mirovan a Ewropayê binpêkirina mafê azadiya civîn û xwepêşandana ye, kiriyara heyî neheq û derhiqûqî ye”, bi daxwaza betalkirina biryarê serî li dadgehê da. 

 

‘SÎNORÊ RAYEYA XWE DERBAS KIR’

 

3’yemîn Dadgeha Îdareyê ya Amedê, biryara betalkirina biryara qedexeyê da. Dadgehê, di hinceta biryara xwe de got: “Biryara qedexeyê li gorî xala 17’an a Qanûna Hejmar 2911’ê hatiye dayin lê di xala 19’an a heman qanûnê de biryara qedexeyê bi sînorê bajar an jî bi çendek navçeyan hatiye bisînorkirin. Di bûyera şênber de Walîtiya Amedê ji bo tevahiya bajar ev biryara qedexeyê daye.” 

 

Di hinceta biryarê de hate gotin ku bi vî awayî, biryara qedexeyê ya hatiye dayin nabe ku li gorî xala 17’an were dayin. Hat gotin ku li gorî xala 19’an walîtî dikare tenê ji bo hinek herêmên diyarkirî biryarê bide lê sînorê rayeya xwe derbas kiriye û ji bo tevahiya bajar ev biryar daye. Hat destnîşankirin ku biryara qedexeyê hatiye dayin li dijî xalên 17 û 19’an ên Qanûna Hejmar 2911’ê û xala 11/C’ê ya Qanûna Hejmar 5442’yê ye û got “Bi vê boneyê biryar hiqûqî nîne.” 

 

Dadgehê, bi van sedeman jî bi şertê ku rêya îstînafê vekirî be biryara betalkirina biryarê da. 

 

MA / Rûkiye Payîz Adiguzel