Li seranserê cîhanê jin, ji bo pîrozbahiyên 8’ê Adarê Roja Jinan a Cîhanê xebaên amedekariyê dikin. Bajarê ku amedekarî lê tên kirin yek jê Riha ye. Li bajêr, ji bo mitînga 8’ê Adarê ya ku dê ji aliyê jinên Kurd, Tirkmen, Ereb û Êzidî ve li Pirsûsê bê lidarxistin amedekarî tên kirin.

 

Ji aliyekî ve jî ji bo vekirina qadên nû yên ji bo jinan xebat didomin. Di vê çarçoveyê de Şaredariya Wêranşarê ya di destê Partiya Wekhevî û Demokrasiyê ya Gelan (DEM Partî) bi dirûşma “Gotina me hêj neqediyaye, em ê bi hevre tundiyê rawestînin” Navenda Piştevaniyê ya Jinan” vekir. 600 selêdan ji bo bavenda ku piştgiriyên derûnî û hiqûqî dide jinan, hate kirin. 

 

Pinar Çelîk a ku di Mudiriyeta Polîtîkayên Jinan a Şaredariya Wêranşarê de dixebite, têkildarî xebatên ku li navçeyê kirine axivî.

 

‘DIVÊ EM TÊKOŞÎNA XWE MEZIN BIKIN’

 

Pinar Çelîkê anî ziman ku li Wêranşarê ji bo jinan qadên nû yên jiyanê ava kirine û ev tişt got: “Em bi jinan re di nava piştevaniyê de ne, ji bo jin karibin li ser pêyan bisekinin dibin alîkar. Nexasim em ji bo jinên tundî li wan hatiye kirin, piştigiriyên hiqûqî û derûnî didin.” 

 

Pinar Çelîkê diyar kir ku 8’ê Adarê têkoşîna jinan tîne bîra wan û wiha pê de çû: “Felsefeya ‘Jin, jiyan, azadî’ felsefeya jiyanê ye. Ji bo ev felsefe bê jiyîn û destkeftiyên nû divê em rêxistinbûna jinan xurt bikin.”  

 

‘JIN ÊDÎ DIZANIN NE BI TENÊ NE’  

 

Bêrîvan Cîn a ku li Navenda Piştevaniyê ya Jinan a girêdayî Şaredariya Wêranşarê dixebite got: “Em ji bo jinên tundî li wan hatiye kirin xizmetên piştevaniyê pêşkêş dikin. Ji sala bihurî heta niha dora 600 serlêdan ji bo navendê hatin kirin. Em ji bo jinên tên vir piştgiriya derûnî û hiqûqî didin. Jinên li wan tundî dihate kirin nikaribûn dengên xwe bidin bihîstin, lêbelê êdî hest dikin ku ne bi tenê ne. Jin êdî dizanin ne bi tenê ne. Ev yek jî hêz û baweriyê dide wan. Jin dema dibin yek dikarin mafên xwe bi dest bixin. Ji bo vê divê em rêxistinbûna xwe xurt bikin.”

 

MA / Omer Akin