Hevseroka Giştî ya Partiya Herêmên Demokratîk (DBP) Çîgdem Kiliçgun Uçar, di mitînga 8’ê Adarê Roja Jinan a Cîhanê ya li Amedê de axivî. Çîgdem Kiliçgun Uçarê, anî ziman ku êdî dirûşma “Jin, jiyan, azadî” li her çar aliyên cîhanê olan dide û ev dirûşm, li dijî tarîtiyê bû qêrîna azadiyê ya jinan. 

 

Bi domdarî Çîgdem Kiliçgun Uçarê îşaret bi jinên hatine qetilkirin kir û bi bîr xist kul di Çileyê de 20 jin hatine qetilkirin. 

 

'EM XWEDÎ MÎRATEYEKE XURT IN’  

 

Bi domdarî Çîgdem Kiliçgun Uçarê avêtina cenazeyê şervana HSD’ê Denîz Çiya ji avahiyeke Helebê bi bîr xist û got: “Niha şerê sêyemîn ê cîhanê heye. Jinan, li dijî vî şerî keziyên xwe vehand. Li Rojava, jinan bi destê xwe azadiya xwe ava kir. Azadiya jinan, civakan û gelan girêdayî hev e. Jinan, bêyî li benda alîkariya hin kesan bin ev serkeftin bi dest xist. Ne tenê li Rojava, li her çar aliyên cîhanê jinan li dijî vî şerî keziyên xwe vehand. Li gel vê, li Rojava şoreşek hûnand. Ev têkoşîn niha jî li rojhilatê Kurdistanê tê domandin. Dema em li Rojhilat dinêrin, Jîna Emînî, Şîrîn Elemhûlî û ‘jin, jiyan, azadî’ tê bîra me. ‘Jin, jiyan, azadî’ êdî li her çar aliyên cîhanê olan dide. Li dijî tarîtiyê, bû dengê qêrîna jinan.  Em gelek serbilind in ku xwedî mîrateyeke mezin a ji Zerîfayan, ji Sarayan, ji Bêrîtanan û ji Denîz Çiyayan ji me re mayî ne. Em bi vê mîrateyê azadiyê bi dest dixin. Roja Jinan li we tevan pîroz be.”