Êrişên ku HTŞ, DAIŞ û komên girêdayî Tirkiyeyê di 6’ê Çileyê de li dijî Rojavayê dabûn destpêkirin, li Kobanê veguherî dorpêçê û ev dorpêç hêj bi tevahî nehatiye rakirin. Ev rewş hem pergala tenduristiyê asteng dike hem jî ji ber nebûna ava paqij dibe sedema belavbûna nexweşiyan. Nûnerê Weqfa Mafên Mirovan a Tirkiyeyê (TÎHV) yê Wanê Huseyîn Yavîç li ser mijarê axivî û got: “Ji bo çareseriyê, divê şer tavilê bi dawî bibe, şert û mercên guncav ên stargehê werin amadekirin û gihîştina xwarin, av û pêdiviyên bingehîn were dabînkirin.”

 

‘DI GIHÎŞTINA TENDURISTIYÊ DE ASTENGIYÊN MEZIN HENÊ’

 

Huseyîn Yavîç diyar kir ku dorpêç bi tevahî nehatiye rakirin û ev yek dibe sedema koçberiyê û wiha pê de çû: “Bi pêvajoya şer a li Kobanê û herêma Rojavayê re, Kobanê ket bin dorpêçê. Ev dorpêç hêj bi temamî nehatiye rakirin. Ji ber şer û koçberiya ji herêmên din, nifûsa Kobanê zêde bû û krîzek derket holê. Binesaziya tenduriistiyê ya Kobanê zirarekî mezin dît. Nexasim di peydakirina dermanên bingehîn û alavên tibî de krîzekî giran heye. Ji ber ku depoyên dermanan vala bûne û derman nayên veguhestin, pêvajoyên tedawiyê bi neyînî bandor dibin.”

 

‘JINÊN DUCANÎ Û ZAROK DI XETEREYÊ DE NE’

 

Yavîç bal kişand ser jiyana zarokan û rewşa jinên ducanî û wiha axaftina xwe domand: “Ji ber ku xizmetên tendurustiyê di şert û mercên asayî de nayên dayîn, bandora herî mezin li ser zarok û jinên ducanî dibe. Li gorî agahiyên ku Heyva Sor û saziyên din ên serbixwe dane, zarokên ku ji ber nebûna tedawiyê jiyana xwe ji dest dane hene. Ji ber nebûna ava paqij, nexweşî derketine holê. Herwiha şopandina nexweşiyên kronîk û pêvajoya zayînê ya bi xeternak bûye pirsgirêkekî mezin. Li deverên ku ewlehî tune ye, gihîştina mirovan a ji bo saziyên tendurustiyê ne hêsan e. Nexasim gihîştina kesên kal ên nexweşiya wan a kronîk heye, hatiye astengkirin.”

 

‘DIVÊ DORPÊÇ WERE RAKIRIN’

 

Yavîç destnîşan kir ku divê mercên ewle were avakirin û wiha axaaftina xwe bi dawî kir: “Pêdivî bi vekirina korîdorekî alîkariyê heye da ku ji deriyên sînor ên herî nêz alîkariyên bingehîn derbasî Kobanê bibin. Divê bi lez derman werin şandin, binesaziya saziyên tenduristiyê were nûkirin û amûrên tibî werin peydakirin. Heke ev dorpêç neyê rakirin, dibe ku em li Kobanê bi krîzekî hîn kûrtir re rû bi rû bimînin. Bi bidawîbûna şer û dabînkirina pêdiviyên bingehîn, ev pirsgirêk dê çareser bibin.”