Rêberê Dêra Protestan a Amedê Ahmet Guvener, banga tevlîbûna Newrozê kir ku îsal tê payîn li herî kêm 53 navendan bi girseyî were pîrozkirin. Guvener diyar kir ku ew ê daxwazên xwe li qadên Newrozê biqîrin. Guvener anî ziman ku Newroz ji bo gelan mizgîniya biharê ye û di biharê de hêvî geş dibin û îro hewcedariya herî mezin bi vê yekê heye. Guvener destnîşan kir ku ew gelek caran tevlî pîrozbahiyan bûye û Newroz bi coşa cejnên berê, bi coşekê mezin tên pîrozkirin.

 

ROJA KU DAXWAZ TÊN ZIMAN

 

Guvener anî ziman ku Kurd di Newrozan tenê pîrozbahî û şahiyê nakin, di heman demê de daxwazên xwe jî tînin ziman, lewma Newroz ji bo Kurdan rojekê polîtîk e û ev tişt got: "Newroz cihê daxwazan e, daxwaz lê tên ziman. Helbet rojekê siyasî ye, lê ji bo ciwanan jî rojek e ku bi hevalên xwe re govendê digirin, şahînatê dikin û soza 'Salek din em dîsa li vir bicivin' didin hev. Lê ji bo siyasetmedaran bi rastî jî pencereyek heye. Heke derî ne be jî, herî kêm ev pencere fersendek e ku em dengê xwe bidin bihîstin. Em jî perçeyekî vî welatî ne. Kurd dibêjin, 'Di mijara aborî, nasname û ziman de daxwaza me ya qebûlkirinê heye'. Dema mirovên li rojavayê welat vê fêm nakin, Kurd xemgîniya nefêmkirinê dijîn."

 

Güvener bal kişand ser Pêvajoya Aştî û Civaka Demokratîk û got: "Em dua bikin da ku ev pêvajo bibe mîna ronahiya li dawiya tunelê. Ez hêvî dikim Newrozên salên pêş, bi coşa cejnê de be ku hemû nasnameyên etnîkî werin cem hev. Niha em wek Xiristiyan jî di vî welatî de di nava têgeha hemwelatiyiya wekhev de cih nagirin. Heke gel û bawerî di vî welatî de ji wekheviyê sûdê bigirin, wê demê cejn dê bi rastîn werin jiyîn."

 

CEJNA VEJÎNÊ

 

Guvener diyar kir ku her çend ne rojekê polîtîk be jî, wekî Cejna Newrozê ya Kurdan, Cejna Vejînê ya Xiristiyanan jî heye û wiha pê de çû: "Îsa Mesîh roja Înê tê darexaçkirin, roja Yekşemê vedije. Wê demê em wê vejînê pîroz dikin. Ew jî dikeve dawiya Adarê an jî serê Nîsanê. Em jî qala wateya cejnê dikin. Em dibêjin 'Hêvîdar im ev cejn ji bo her kesî bibe wesîleya aştiyê'; piştre em daxwazên me tînin ziman. Ev jî nîşan dide ku heman hewcedarî derdikeve holê."

 

BANGA TEVLIBÛNA NEWROZA AMEDÊ

 

Guvener banga tevlibûna Newroza Amedê kir û wiha axaftina xwe bi dawî kir: "Heke li wir tevlibûnekê ku biratiyê xurt dike û derdixe pêş hebe, ez bawer dikim ku dê lez û enerjiyê bide pêvajoya çareseriyê. Beşdariya nêzî mîlyonek mirovî, dê cesaretê bide siyasetmedaran jî. Lewra pêvajoya çareseriyê heye. Heke siyasetmedar bibinin ku gel di pêvajoya çareseriyê de piştgiriyê dide wan, ev ê hêviyê bide siyasetmedaran."

 

MA / Rûkiye Payîz Adiguzel