NAVENDA NÛÇEYAN -Li Baselê, ji aliyê Navenda Civaka Kurd a demokratîk a Baselê, panela bi sernavê "Ciwan û Rêbertî" û "Divê çawa bê jiyîn" hat lidarxistin.
Tevgera Ciwanên Şoreşger (TCŞ) û Jinên Ciwan ên Têkoşer (TekoJIN) li bajarê Basel ê Swîsreyê di çarçoveya Pêngava “Ji Abdullah Ocalan re azadî, ji pirsgirêka kurd re çareserî” ku ji aliyê dostên gelê Kurd ve hatiye destpêkirin, konferansek li dar xist. Gel di meha cotmehê de û bi Newrozê re ket qonaxa duyemîn. Rojnamevan Gulan Botan û Rojnamevan û Nivîskar Sefkan Kobanê weke qiseker beşdarî panela ku li salona konferansê ya Navenda Civaka Kurd a Demokratîk a Baselê (CDK-BL) bi sernavên "Ciwan û Rêbertî" û "Divê çawa bê jijîn" hat lidarxistin bûn.
Aktîvîsta TCŞ'ê Leyla Aktaş a ku axaftina vekirinê kir, berpirsyariyên ciwanên kurd ên di pêvajoya dijwar de bi bîr xist û got: "Hemû ciwanên li vir dizanin ku em bi dilê xwe ji Kurdistanê derneketine. Ciwanan xewn û xeyalên xwe terikandine û di şert û mercên kampê de dijîn. Li welatê me kesek ji me nikarîbû bi zimanê xwe yê zikmakî bixwîne. Berê dema ku li Kurdistanê pirsgirêk hebûn, çewisandin an jî êrîş li ser çanda me hebû, ciwanan refleks nîşan didan, lê niha sîstem me ji van dûr dixe. Di demên dawî de întîxar hene, divê em karibin sedemên van nîqaş bikin."
EM KOÇBERIYÊ TENÊ FÎZÎKÎ NAJÎN’
Adar Gulan anî ziman ku divê ciwan pirsên “Em kî ne û ji ku derê hatine?” bipirsin û wiha berdewam kir: “Em ji axa xwe qut bûne, dûrketina ji axa xwe di me de kesayetek çawa diafirîne? Em koçberiyê tenê bi fîzîkî najîn; Di kesayet û nefsa me de guhertin hene. Em ji rastiya xwe dûr dikevin. Rêber Apo her tim dibêje, ‘Min tu carî îxanet li xeyalên xwe yên zarokatiyê nekir.’ Di wan salên ku têkoşîn geş bû, bi navê Kurdayetiyê tiştek tune bû. Kurdayetî li çiyayê Araratê di gorekê de hat veşartin û bi betonê hat pêçandin. Werin em van pirsan ji xwe bikin, nemaze ji yên ku li Ewropayê dijîn. Divê çawa bê jiyîn? Çi bê bikirin? Li ku derê dest pê bike? Ger em ji dil bersivê bidin van yekan, em ê gelek tecrûbe bikin. Ez ji her kesî re pêşniyar dikim ku dîroka Cihûyan bixwînin."
Piştî bêhnvedanê ciwanan mafê axaftinê girt, nêrînên xwe anîn ziman û pirs pirsîn.
Sefkan Kobanê der barê tecrîda li Îmraliyê û kampanyaya azadiyê de axivî. Kobanê da xuyakirin ku 3 sal in tu agahî ji Rêberê PKK'ê Abdullah Ocalan nayê girtin û got: "Divê ciwan zêdetir piştgiriyê bidin Rêber Apo."
‘CIWAN LI EWROPAYÊ ÇAWA DIJÎN?’
Kobanê da zanîn ku Abdullah Ocalan di temenekî pir ciwan û bi bawerî de dest bi têkoşînê kir û got: “Rêbertî bi meraq dest bi vê têkoşînê kir, lê tenê di gotinê de nema. Di pratîkê de jî pêdiviyan pêk anî. Ji Hakî Karer re ev tişt gotibû: ‘Em ê ji bo welatekî azad têbikoşin’, ev bawerî ye. Têkoşîna ku li Rojava û li çiyayan berdewam dike ruhê ciwantiyê ye. Divê ciwan têkiliyên xwe bi hevalên xwe re xurt bikin."
‘EM FIKRÊN RÊBERTÎ BELAV BIKIN’
Sefkan Kobanê bi bîr xist ku zêdetirî 3 sal in Abdullah Ocalan di bin tecrîdeke giran de ye, lê bi tena serê xwe li ber xwe dide û wiha dewam kir: “Li ser me ye ku em rast bijîn. Ji ber ku em tevgereke komînal in. Ger em tenê li xwe bifikirin û xwe bi sîstemê ve bigrin, em ê bibin wek masiyek ji avê. Em ji welatê xwe dûr ketine lê dîsa jî em bi zimanê xwe biaxivin. Werin em fikrên Serokatiyê belav bikin. Yên ku dijminên Rêbertî ne dipirsin ku PKK'ê çi kiriye. Ger em li Rojava û qadên din ên Kurdistanê li ber xwe didin, ji ber fikrên Rêber Apo ye. Em ê ji fikra Rêbertî ya konfederalîzma demokratîk paşve gav navêjin. Me di vê hilbijartinê de dît ku hilbijartin li Kurdistanê çiqas xurt bû. Partiyên faşîst gotin ku wê Kurd têk biçin. Kurd weke her carê li ber xwe dan, bi fikir û felsefeya Rêbertî bi ser ketin.”
Di dawiya konferansê de beşdaran bi hilgirtina posterên Rêberê PKK'ê Abdullah Ocalan û berzkirina dirûşmeyên "Bijî Serok Apo" û "Bê Serok jiyan nabe" piştgirî dan pêngava "Ji Abdullah Ocalan re Azadî, Ji Pirsgirêka Kurd Re Çareserî”.