Di ser gengeşeyên "di pirsgirêka kurd de pêvajoya nû" re ku di 2'yê Cotmehê de li Meclisê Serokê Giştî yê MHP'ê Devlet Bahçelî bi destê Hevserokê Giştî yê Partiya Wekhevî û Demokrasiyê ya Gelan (DEM Partî) Tûncer Bakirhan girt û merheba kir dest pê kirin, mehek derbas bû. Di vê demê de asat êrişan zêdetir bûn. 

 

Binpêkirinên li dijî kurdan û muxalifan ên ku di navbera 1 û 31’ê Cotmehê de ku gengeşeyên “pêvajoya nû” dest pê kirin,çêbûn bi vî rengî ne:

 

1 Cotmeh: Li navçeya Şirnex Hezex û Erziromê di serdegirtina malan de Hevserokê Partiya Herêmên Demokratîk (DBP) yê Erziromê Ramazan Karakaş jî di nav de 6 kes hatin binçavkirin. Di serdegirtinên li gundê Hespîst ê navçeya Hezexê de 4 kes hatin binçavkirin. Welatiya bi navê Sadiye Tekîn a hat binçavkirin hat girtin.

 

2 Cotmeh: Girtiyê bi nexweşiya giran Abdulkadîr Kûday ê ku li Girtîgeha Tîpa R ya Metrîsê girtî tevî hemû hewldanan nehat berdan, li girtîgehê jiyana xwe ji dest da.

 

 3 Cotmeh: Welatiyê bi navê Adem Purnek di çarçoveya lêpirsîna ku ji aliyê Serdozgeriya Komarê ya Agiriyê ve hatibû destpêkirin de hat binçavkirin.

 

4 Cotmeh: Abdurrahman Gemîcîoglûyê 67 salî ku nexweşînên giran pê re hene, piştî ku 8 sal û 9 meh cezayê girtîgehê yê lê hatibû birîn ji aliyê Dadgeha Bilind ve hat erêkirin, ew bi ambûlansê birin girtîgehê. Li Taxa Esenler a Çanakkaleyê danê sibehê di serdegirtina malan de 3 kes hatin binçavkirin.

 

 7 Cotmeh: Di çarçoveya lêpirsîna ku li Stenbolê hat destpêkirin de danê sibê di serdegirtina malan de endamên Konfederasyona Sendîkayên Kedkarên Cemaweriyê (KESK) jî di nav de herî kêm 10 kes hatin binçavkirin. Li Amedê hunermendên kurd Helîm Omerî û Azad Bedran hatin binçavkirin.

 

8 Cotmeh: Li navçeyên Artûklû, Qoser û Nisêbînyên Mêrdînê di serdegirtina malan de 22 kes hatin binçavkirin. Li Yukari Mahallesi ya navçeya Hezex a Şirnexê kesê bi navê Şahîn Ogûz di serdegirtina malê de hat binçavkirin. Hevşaredara Misircê ya Sêrtê Sadiye Aktin, Hevseroka Partiya Wekhevî û Demokrasiyê ya Gelan (DEM Partî) ya navçeya Misircê Salîha Sak, Hevseroka DBP'ê Sûltan Yorûlmaz, Endama Meclisa Şaredariya Misircê Mehşare Yeşîlbaş û Gulbahar Îvdîl hatin binçavkirin.

 

 10 Cotmeh: Polîsan avêtin ser avahiya RêxistinaDEM Partiyê ya Îdirê. HevserokêÎdirê Mehmet Selçuk û 7 kes hatin binçavkirin. Hevserokê Îdirê yê DEM PArtiyêê Mehmet Selçûk, Salîha Agirî û kesekî ku navê wî nehat hînkirin hatin binçavkirin. Li navçeya Semsûrê Kolikê di serdegirtina malan de Hevserokê DEM Partiyê yê Kolikê Saît Dîlek jî di nav de 4 kes hatin binçavkirin. Li Êlihê di serdegirtina malan de 3 endamên Meclisa Ciwanan a DEM Partiyê hatin binçavkirin. Hunermendê Navenda Çanda Mezopotamyayê (NÇM) Engîn Cengîz li Stenbolê hat binçavkirin. Belavkarê Rojnameya Yenî Yaşamê Îbrahîm Çitaş hat binçavkirin. Hevserokê Navçeya Dîlokê ya Mezmaxor (Şahînbey) yê DEM Partiyê Mustafa Tûç, Hevserokê DBP'ê yê Dîlokê Mehmet Ozkan û Hevserokê DBP'ê yê Navçeya Mezmaxor Muslum Denîzhan hatin binçavkirin.

 

 11 Cotmeh: Li Amedê rêveberê DFG’ê Serhildan Andan jî di nav de 15 kes hatin binçavkirin. Vazîre Abdûlkerîm a 77 salî ku nexweşîna dil pê re heye gava bi hevjîna xwe re ket Deriyê Sînor ê Xabûrê yê li navçeya Şirnex Silopiya (Silopiya), hat binçavkirin.

 

14 Cotmeh: Li 36 bajaran di serdegirtina malan de 269 kes hatin binçavkirin. Çalakiya "azadî" ya ku di 13'ê Cotmehê de li Amedê ji aliyê Platforma Saziyên Demokratîk ve bi beşdariya bi hezaran kesî hat lidarxistin, wekî hinceta binçavkirinan hat nîşandan. Li navçeya Silopiya ya Şirnexê leşkeran êrişî çalakiya "Şer na, aştî niha" kirin û dayikên aştiyê jî di nav de 3 rojnameger û 18 kes binçav kirin.

 

16 Cotmeh: Li Amedê di serdegirtina malan de 15 kes hatin binçavkirin. Di serdegirtinên malan de eşya hatin belavkirin. Hat diyarkirin kes bi hinceta “propagandaya rêxistinê" hatine binçavkirin.

 

 19 Cotmeh: Girtiyê bi navê Serhat Temîzer, roja ku biryara berdana wî hat dayîn, li girtîgehê bi awayekî gumanbar jiyana xwe ji dest da.

 

20 Cotmeh: Piştî qedexeya derketina derve ya li taxên Elfan û Barman ên gundewar ên navçeya Stewrê ya Mêrdînê, 4 kes hatin binçavkirin û ew birin Fermandariya Cendirmeyan.

 

 23 Cotmeh: Li Dêrsim, Bedlîs û Manîsayê di serdegirtina malan de 9 kes hatin binçavkirin.

 

  24 Cotmeh: Piştî êrişa li dijî TUSAŞ'ê ya li navçeya Kazan a Enqereyê, li dijî Bakur û Rojhilatê Sûriyeyê, Şengal û Mexmûrê êrişên hewayî hatin destpêkirin. Di êrişên ku nexweşxane û cihên sivîlan hedef girtin de zarok jî di nav de 27 sivîlan jiyana xwe ji dest dan û zêdeyî 40 kes jî birîndar bûn.

 

 25 Cotmehê: Mûhlîse Karaguzel a ji bo dermankirinê înfaza wê hat taloqkirin, bi daxwaza girtinê ya Serdozgeriya Mûşê li Amedê hat binçavkirin û girtin. Der barê serdegirtinên malan ên li gelek bajaran de ji aliyê Wezareta Karên Hundir ve daxuyanî hat dayîn. Wezîr Alî Yerlîkaya ragihand ku li 31 bajaran 176 kes hatine binçavkirin. Endamê Şaxa Komeleya Hiqûqnasên Ji bo Azadiyê (OHD) a Stenbolê Bedîrhan Sarsilmaz li salona dadgehê hat binçavkirin. Di heman rojê de li gelek navçeyên Stenbolê di serdegirtina malan de 38 kes hatin binçavkirin û 19 kes jî bi hinceta "endamên rêxistinê ne" hatin girtin.

 

 26 Cotmeh: Li bajaroka Ereban û gundên Dane, Delavê Kasrê yên navçeya Hezex a Şirnexê di serdegirtinên malan de 9 kes hatin binçavkirin. Di çarçoveya lêpirsîna Serdozgeriya Komarê ya Enqereyê de bi îdiaya "propagandaya rêxistinê" ji bo 33 kesan biryara binçavkirinê hat dayîn.

 

29 Cotmeh: Li Deşta Çemêkarê ya herêma Herekolê ya navçeya Berwarî ya Sêrtê operasyona leşkerî hat destpêkirin. Leşkeran li qada operasyonê 24 şivan û koçer binçav kirin. Piştre jî 5 kes hatin binçavkirin. Hejmara binçavkiriyan derket 29'an.

 

30 Cotmeh: Li navenda Şirnexê û bajarokên Dêrgûl û Cizîrê di serdegirtina malan de 8 kes hatin binçavkirin. Di serdegirtinan de polîsan Abdulkerîm Uzen û hemû malbata wî derb kirin.  Hevşaredara Dêrikê ya berê Sabahat Çetînkaya piştî cezayê lê hatibû birîn ji aliyê Dadgeha Bilind ve hat erêkirin, li navenda tenduristiyê ya ku ji bo dermankirinê çûbûyê hat binçavkirin û paşê hat girtin.

 

* Şaredarê Esenyûrtê Ahmet Ozer ku di hilbijartinên 31'ê Adarê de bi "Lihevkirina Bajêr" ji Partiya Gel a Komarê (CHP) hatibû hilbijartin û solîsta Koma Hevrayê Zeynep Dogan jî di nav de herî kêm 14 kes hatin binçavkirin. Şaredarê Esenyûrtê Ahmet Ozer bi îdiaya "endamtiya rêxistinê" hat girtin. Li şûna Ozer ku piştî hat binçavkirin, qeyûm tayînî Şaredariya Esenyûrtê hat kirin.

 

31 Cotmeh: Alîkarê Waliyê Stenbolê Can Aksoy wekî qeyûm tayînî Şaredariya Esenyûrtê hat kirin. Xebatkara Rojnameya Yenî Yaşamê Azîme Bozkûrt li Dêrsimê hat binçavkirin.

 

MA / Delal Akyuz