WAN - Raporên girtiyê nexweşiya penceşêrê Abdurrahman Gemîcîoglû yên ji bo sewqkirina ATK’ê hêj nehatine amadekirin. Elîf Gemîcîoglû got ku êdî bavê wê bîra xwe winda dike.
Abdurrahman Gemîcîoglû yê 67 salî ku ji Colemêrgê ye, piştî Dadgeha Bilind cezayê wî erê kirî, tevî nexweşiya xwe ya giran jî di 3’yê cotmehê de hate girtin û şandin Girtîgeha bi Ewlekariya Bilind a Wanê. Nexweşiyên Gemîcîoglû yên weke penceşêra rûviya stûr, prostat û dil hene. Gemîcîoglû ji roja hatiye girtin heta niha her roj sewqî nexweşxaneyê tê kirin. Di 25’ê cotmehê de rewşa wî aloz bû û rakirin beşa lênihêrîna awarte ya Nexweşxaneya Lêkolînê ya Fakûlteya Tipê ya Zanîngeha Yuzuncu Yilê. Ev 18 roj in tedawiya Gemîcîoglû didome.
DÊ RAPORAN JI ATK’Ê RE BIŞÎNIN
Di çarçoveya raporên bijîşkan de biryar hate dayin ku Gemîcîoglû sewqî Saziya Tipa Edlî (ATK) ya Stenbolê were kirin. Lê belê biryar hate dayin ku ji ber nexweşiyên giran dê Gemîcîoglû neyê şandin lê tenê dê raporên wî bên şandin. Hat diyarkirin ku ji ber ku hêj tetkîkên gelek nexweşiyên Gemîcîoglû nehatine girtin, dê rapora Gemîcîoglû ji ATK’ê re dereng were şandin.
RAPORÊ ATK’Ê AMADE NÎNIN
Elîf Gemîcîoglû têkildarî rewşa bavê xwe axivî û got ku rewşa wî krîtîk e. Gemîcîoglû, da zanîn ku ew li benda nimûneyên rapora ATK’ê ne. Gemîcîoglû, wiha domand: “Tedawiya wî didome lê rewşa wî roj bi roj xerabtir dibe. Jixwe nexweşê nav nivîna ye û nikare rabe ser pêyan. Nikare sexbêra xwe bike. Beriya binçavkirin me ji bo tetkîkên kolonoskopiyê randevû standibû. Ji ber ku hate girtin me nebir û êdî randevû nehat girtin. Tedawiya wî nîvco ma lewma penceşêr pêş ket. Bijîşkê onkolojiyê dîsa biyopsî xwest. Piştî ev encam derketin jî dê ji ATK’ê re bên şandin. Niha dê ji bo kolonoskopiyê nimûneyek were girtin û piştre dê rapor ji ATK’ê re bê şandin.”
DÊ TEDAWIYA KEMOTERAPIYÊ BIBE
Gemîcîoglû, wiha domand: “Di girtîgehê de enfeksiyonê girt lewma gelek nexweşî lê peyda bûn. Enfeksiyona laşê wî ji sedî sed zêde bû. Sexbêra wî baş nehat kirin lewma gelek nexweşiyên wî zêrhan. Ji 25’ê cotmehê ve li beşa lênihêrîna awarte tê tedawîkirin. Piştî xwe hinek komî ser hev kir dê kemoterapî dest pê bike. Destên wî kelemçekirî ne û leşker ser serê wî hene. Di rewşekî wiha de me dê başiya tedawiyê çawa be? Bijîşk û her kes dibêje nikare di girtîgehê de bimîne lê dîsa jî nayê berdan.”
NAHÊLIN ENDAMÊN MALBATÊ PÊ RE HEVDÎTINÊ BIKIN
Gemîcîoglû da zanîn ku ji malbatê dihêlin tenê kesek pê re hevdîtinê bike û axaftina xwe wiha qedand: “Li girtîgehê jî mafê hevdîtinê heye lê li vir nahêlin em yek carê bibînin. Ev hefteyeke bavê min bîra xwe winda dike. Carnan ji bîr dike ku girtî ye û li ku ye. Êdî kes nayên bîra wî.”