WAN - Li 10 navçeyên Wanê li dijî tayînkirina qeyûman çalakî hatin lidarxistin û banga mezinkirina têkoşîna hevpar hate kirin. 

 

Partiya Wekhevî û Demokrasiyê ya Gelan (DEM Partî), Partiya Herêmên Demokratîk (DBP) û Tevgera Jinên Azad (TJA) li dijî xespa qeyûman li navçeyên Erdîş, Qelqelî, Elbak, Seray, Miks, Payîzava, Ebex, Westan, Şax û Bêgiriyê yên Wanê daxuyanî dan. 

  

ERDÎŞ

 

Daxuyanî li pêşiya avahiya DEM Partiyê ya Erdîşê hate dayin. Rêveberiya bajar û navçeyan a DBP’ê, Hevşaredara Erdîşê Guler Temel û endamên Meclisa Şaredariyê û gelek kes tev li bûn. Di daxuyaniyê de gelek caran dirûşmên “Jin, jiyan, azadî”, “Dê roj were AKP dê hesabê bide gel”, “Bijî berxwedana gelê kurd” hatin berzkirin. Ji rêveberên DBP’a Erdîşê Yilmaz Îşleyen diyar kir ku bi tayînkirina qeyûman re şaredarî ji gel re hatine girtin û bi bloqên betonan re veguherîne navenên alîgirên îktîdarê. Îşleyen, anî ziman ku şaredarî yên gel in û bi zîhniyeteke dij-demokratîk hatine xespkirin. 

 

BAL KIŞAND SER TÊKOŞÎNA HEVPAR

 

Îşleyen, got ku nûnerên gelê kurd tune tên hesibandin û wiha domand: “Ji bo bidawîkirina rejîma qeyûman ku sindoq û edaleta hilbijartinê, mafê xwebirêvebirinê desteser dike, hewcehî bi sererastkirineke qanûnî heye. Partiya me hemû hêzên demokrasiyê yên li Tirkiyeyê û kesên xwedî wijdan vedixwîne têkoşîna hevpar. Werin em bi hev re li dijî vê sepana neheq û derhiqûqî bisekinin û têbikoşin.”

 

Daxuyanî, piştî çalakiya rûniştinê bi dawî bû. 

 

QELQELÎ

 

Li Qelqeliyê jî li pêşiya avahiya DEM Partiyê daxuyanî hate dayin. Rêveberiyên DBP’ê yên bajar û navçeyê, Hevşaredarên Qelqeliyê Sakîne Kutpinar û Ecevît Ceylan û endamên Meclisa Şaredariyê û gelek kes tev li bûn. Rêveberê DEM Partiyê yê navçeyê Mehmet Uçar got ku qeyûm, xespkirina vîna gelê kurd e. 

 

Daxuyanî, bi dirûşma “Bijî berxwedana gelê kurd” bi dawî bû. 

 

EBEX

 

Daxuyaniya li Ebexê li pêşiya avahiya DEM Partiyê hate dayin. Hevserokê DEM Partiyê yê navçeyê Farûk Tirak, Hevşaredarê Ebexê Fettah Hasçelîk, rêveberên partiyê, endamên Meclisa Şaredariyê û gelek kes tev li bûn. Tirak, di daxuyaniyê de got ku tayînkirina qeyûman li dijî demokrasiyê ye û ev tişt anî ziman: “Îktîdara AKP-MHP’ê di nenaskirina mafên demokratîk û siyasî yên gelê kurd de israr dike û qebûl nake gel bi xwe îradeya xwe hilbijêre.” 

 

Daxuyanî, bi dirûşm û çepikan bi dawî bû. 

 

ELBAK

 

Daxuyanî li pêşiya avahiya DEM Partiyê hate dayin û gelek kes tev li bûn. Hevserokê DEM Partiyê yê navçeyê Şahîn Dîlara daxuyanî xwest û got ku divê îktîdar ne ji bo qeyûman lê ji bo demokrasiyê biisrar be. Dîlara, bang li hemû gel, nivîskar, rewşenbîr, rojnameger, akademîsyen û partiyên siyasî yên Tirkiyeyê kir ku ji bo çareseriya meseleya kurd tecrîdê bi dawî bikin, dawî li sepanên tayînkirina qeyûman bînin û mercên axaftina çareseriyê ya bi muxatabên wê re amade bikin. 

 

Daxuyanî piştî çalakiya rûniştinê bi dawî bû. 

 

Li navçeyên Westan, Şax, Serav û Payîzavayê jî metna hevpar a daxuyaniyê hate xwendin û hat gotin ku dê destûrê nedin xespa qeyûm.