RIHA - Rojnameger Dîlan Dîlok rewşa dawî ya li Bakur û Rojhilatê Sûriyeyê nirxand û got: “Tirkiye dixwaze hêj pergal rûneniştî destkeftiyên kurdan tune bike.” 

 

Êrişên Heyet Tehrîr el Şamê di 27’ê Mijdarê de dan destpêkirin, bi hilweşîna rejîma BAAS a 61 salî biencam bûn. Dema HTŞ’ê ji bo hilweşandina rejîmê dest bi êrişan kirî, li hêa din koma paramîlîter a SMO’yê ku girêdayî dewleta tirk e jî herêmên Rêveberiya Xweser a Bakur û Rojhilatê Sûriyeyê hedef girt. 

 

Rojnameger Dîlan Dîlok geşedanên dawî yê li Sûriyeyê nirxand û da zanîn ku rêveberên cemaweriyê û hêzên leşkerî yên li Bakur û Rojhilatê Sûriyeyê teslîmî Rêveberiya Xweser bûne. Dîlan Dîlok, diyar kir ku şirîkê rejîma BAAS’ê Rûsyayê jî winda kir û wiha got: “Rûsan, hêzên xwe yên li Kobanê, Dêrazor û Minbicê vekişandin devera Balafirgeha Qamişloyê. Wisa xuyaye dike ku li gel Beşar Esad, Rûsyayê jî li Sûriyeyê winda kir.” 

 

 

Bi domdarî Dîlan Dîlok got ku piştî Heleb û Hema ketin destê HTŞ’ê, hikûmeta Sûriyeyê dest bi teslîmkirina rêveberiyê kir û wiha pê de çû: “Ji bilî şerê dewleta tirk li dijî kurdan daye destpêkirin, piraniya pevçûnan bi dawî bûne. Hêzên muxalîf niha alîgirên rejîmê, derdorên elewî, bi kurtasî bi înfazkirin, îşkencekirin û girtina kesên ne ji xwe ve mijûl e. Pevçûnên li dijî kurdan jî raste rast bi destê çeteyên girêdayî dewleta tirk re tên kirin. Niha bi HTŞ’ê re şerekî raste rast tune ye.” 

 

'TIRKIYE BI XWE KETIYE DEWRÊ’ 

 

Di berdewamê de Dîlan Dîlok anî ziman ku Tirkiye hewl dide di vê pêvajoya guherînê de armancên xwe pêk bîne û wiha dirêjî da axaftina xwe: “Lê ya herî girîng ew e ku Tirkiye hewl dide hêj li Sûriyeyê pergala nû rûneniştî destkeftiyên Kurdan tesfiye bike. Heke nebe jî dixwaze komên çete yên paramîlîter ku bi dijminatiya kurdan tije kiriye bi ser Kurdan de bişîne. Piştî ku van nekarî tiştekî bikin, îcar bi balafirên şer, SÎHA û topan ew bi xwe kete dewrê.” 

 

Dîlan Dîlok, wiha domand: “Êrişên Tirkiye û koma paramîlîter SMO’yê yên ser Kantona Minbicê 14 rojan domiyan. Tirkan digotin qey dê di demekî kin de encamê bi dest bixin. Lê li hemberî berxwedana xurt a Meclisa Leşkerî ya Minbicê ji ‘serkeftina’ xwe ya ji berê ve ragihandibûn paşvegav avêtin. Lê belê bi rêya çapemeniyê taktîkên şerê taybet pir zêde bi kar anîn û xwestin binhişeke cuda ava bikin. Pir zêde SÎHA, balafiran û topan bi kar tînin. 13 rojan nekarîn berxwedanê têk bibin û li hinek cihên ketibûnê jî hatin derxistin. Niha li Minbicê şerekî dijwar heye. Li hinek cihan şerê eniyê heye lê piranî bi taktîka gerîlatiya nû şer tê domandin.” 

 

'DIXWAZIN LI DIJÎ KURDAN BIXIN NAVA LIV Û TEVGERÊ’ 

 

Rojnameger Dîlan Dîlok got; “Dema li şêweyê berxwedana Minbicê tê nihêrtin, di rojên pêş de çi dibe bila bibe dê dewleta tirk û çeteyên wê hêzê di xwe de nebînin ku pêngaveke nû biavêjin. Armanca esasî ya Minbicê ew bû ku berê nîjadperestiya ereban a li Bakur û Rojhilatê Sûriyeyê bidin kurdan. Hinek aloziyên li deverên çolter ên Reqa, Tebqa û Dêrazorê ku pir biçûk in, pir mezin nîşan didin û parve dikin. Dixwazin aloziyekê çêbikin. Lê belê Hêzên Asayîşê yên li herêmê li wir serwer in.” 

 

ÊRIŞÊN ÎSRAÎLÊ

 

Dîlan Dîlok, bi lêv kir ku Îsraîl ji bo rêveberiya nû kapasîteya xwe ya leşkerî zêde neke ji 8’ê Mijdarê ve tesîsên leşkerî, balafirgeh û cihên ji rejîmê yên li Sûriye û Bakur û Rojhilatê Sûriyeyê bombebaran dike û ev tişt anî ziman: “Ev çendek roj in Îsraîlê Golan jî derbas kir û hêzên xwe li hinek cihên Sûriyeyê bi cih kir. Tesîsên pir krîtîk ên li qada Sûriyeyê ku tesfiye dike û dixwaze di destê rêveberiya nû de tu tiştekî nehêle. Bi qasî tê dîtin, Îsraîl dê yekser daxilî pergala nû ya li Sûriyeyê bibe. Îxtîmal e ku demekî kaotîk bê jiyîn.” 

 

'PÊŞNIYARA KURDAN ÇARESERIYA HERÎ ÎDEAL E’ 

 

Dîlan Dîlok, da zanîn ku armanca HTŞ'ê avakirina dewleteke li ser bingeha şerîetê ye û axaftina xwe wiha qedand: “Lîderê HTŞ’ê Colanî bi peyamên nerm hewl dide xwe weke kesekî li gel lihevkirinê nîşan bide. Lê tevî vê jî dema mirov li endamên qebîneya hikûmeta nû dinêre, dibîne ku xwe dispêre şerîetê û hewl didin dewleteke îslamî ava bikin. Ev rewş dê ji bo dema pêş bi xwe re pirsgirêkên pir cidî bîne. Mimkin nîne gelên Sûriyeyê û hêzên navneteweyî vê jinedîtî ve bên. Her çend dewleta tirk li ser dijminatiya bi kurdan re hewl bide xwe daxilî pêvajoya li Sûriyeyê bike jî, eşkere ye ku pêşniyarên kurdan çareseriya herî îdael e. Dewleta tirk vê rewşê dibîne lewma berê çeteyan dide kurdan, dixwaze kurdan qels bike û nehêle ev pêşniyar bê qebûlkirin.” 

 

MA / Emrûllah Acar