RIHA - Rojnameger Nazim Daştan got ku armanca ji êrişên li dijî Bakur û Rojhilatê Sûriyeyê ew e ku hêviya pêşeroja demokratîk tune bikin. 

 

Rojnameger Nazim Daştan têkildarî mudaxileyên hêzên navneteweyî yên piştî rûxandina rejîma BAAS’ê ji Ajansa Mezopotamyayê (MA) re nirxand. Daştan, got ku Tirkiye hewl dide ji nediyariya siyasî sûd bigire û li dijî kurdan qirkirinê bike. 

 

Daştan, anî ziman ku bi 8’ê Kanûnê ve li Sûriyeyê qonaxeke nû dest pê kiriye û wiha pê de çû: “Rast nîne ku mirov bibêje her tişt qediya. Sûriye di 8’ê Kanûnê de li serdemeke nû hişyar bû. Hêzên navneteweyî mudaxile kirin û HTŞ a bi navê xwe yê berê El Nusra ji Helebê dest pê kir û xwe gihand Şamê. Vê jî Sûriyeyeke ku hevsengiyên wê serûbin bûyîn derxist pêşiya me. Nirxandina, hêj nediyar e dê hevsengiyên heyî çawa teşe bigirin rastir e. Rejîma BAAS’ê hilweşiya lê êrişên dagirkeriyê didomin. Dê piştî BAAS’ê hevsengiyên nû bên avakirin. Di demên berê de hevkêşeyên weke Îran û Rûsyayê hebûn lê niha bandora wan pir kêm e. Ji Şamê heta Heleb û sînorê Iraqê hêzên Îranê hebûn û xeyalên Rûsyayê ji bo Behra Spî hebûn.” 

 

Rojnameger Nazim Daştan

 

‘MESELE NE TENÊ MINBIC E’

 

Daştan, got ku operasyona HTŞ’ê, operasyoneke NATO’yê ya li dijî Rûsya û Îranê bû û wiha dirêjî da axaftina xwe: “Di encama ve operasyonê de her du hêz hema hema hatin tunekirin. Tirkiye jî dixwaze di vê pêvajoyê de destkeftiyên kurdan û dostên wan tune bike. Di vê çarçoveyê de tevî komên xwe yên paramîlîter êrişî Kantona Minbicê kirin. Mesele ne tenê Minbic e. DAIŞ’ê di sala 2014’an de êrişî Kobanê kiribû û êşa Tirkiyeyê heye. Minbic, parastina Kobanê û Reqayê ye. Minbiceke dagirkirî, amadekirina bingeha dagirkeriya Kobanê. Êrişên ser Qereqozaq û Tişrînê jî di vê çarçoveyê de tên kirin. Qereqozak, deriyê li Kobanê vedibe ye. Ji gelek aliyan ve bi çekên giran êriş tên kirin. Ji bo mirov bibêje her tişt qediya hêj pir zû ye. Ev êriş dibe ku li cihên pir cuda belav bibin. Di sala 2011’an de rejîm hema hema hildiweşiya lê 13 sal piştre bi temamî hilweşiya. Niha jî pêvajoyeke wiha dest pê kir.” 

 

‘SIYASETA ENTEGREBÛNÊ TÊ FERZKIRIN’ 

 

Bi domdarî Daştan bi lêv kir ku mudaxileyên navneteweyî ne tenê ji bo bisînorkirina Rûsya û Îranê têne kirin û wiha dirêjî da axaftina xwe: “Her wiha li dijî gelên di şerê navxweyî yê Sûriyeyê de birêxistin kirin, entegreyî bloqên NATO û Rûsya-Îranê nebûn jî tê kirin. Rêveberiya Xweser a Bakur û Rojhilatê Sûriyeyê gelek caran îspat kir ku çareseriya aloziya heyî ye. Dixwazin bi awayekî teşe bidinê. Bi tevgerên dadgirkeriyê dixwazin bifetisînin û li hinek tiştan razî bikin. Bi ambargoyê dixwazin entegreyî siyaseta xwe bikin. Heta niha li ser stratejiya şerê gel ê şoreşgerî gelek caran şer hate kirin. Berxwedaneke ev 13 sal in didome heye. Tirkiye dixwaze vê berevajî bike û berê HTŞ’ê bide gelê kurd û destkeftiyên wê hedef digire. Kurdan di van 13 salan de nîşanî cîhanê dan ku jiyaneke demokratî pêkan e. Ew dixwazin vê hêviyê tune bikin.” 

 

‘POLÎTÎKAYA QIRKIRINA KURDAN DI MERIYETÊ DE YE’ 

 

Rojnameger Daştan, êrişên dewleta tirk ên bi destê komên paramîlîter dide kirin weke “qirkirina Kurdan” pênase kir û wiha got: “Dixwazin bajaran dagir bikin û hêviya pêkvejiyanê tune bikin. Di êrişan de pergala Bakur û Rojhilatê Sûriyeyê hedef tê girtin. Dixwazin planên xwe yên Mîsaqi Mîllî û neo-osmanî bi cih bînin. Nikarin bi artêşa xwe vê bikin lewma komên mirovan serjê dikin, jinan tecawiz dikin, demografyaya herêmê diguherînin, talan û wêraniyê dikin bi kar tînin. Polîtîkaya qirkirina kurdan di meriyetê de ye.” 

 

MA / Emrûllah Acar