MÊRDÎN - Serokê Komeleya Yekitiya Suryanan Yunanna Aktaş ku di çalakiya nobetê ya li ser sînorê Nisêbîn-Qamişloyê de cih digire, diyar kir ku Rêveberiya Xweser temînata nasnameyên cuda ye û wiha got: “Pêşeroja Sûriyeyê, girêdayî parastina Rêveberiya Xweser e.”
Li dijî êrişên dewleta tirk û koma wê ya paramîlîter a SMO’yê yên li ser Bakur û Rojhilatê Sûriyeyê, li ser sînorê Nisêbîn a Mêrdînê û Qamişloyê çalakiya nobetê hate destpêkirin û çalakî di roja 5’an de didome. Ji bajarên cuda gelek derdorên cuda tev li nobetê bûn û ev serdan didomin. Yek ji kesên beşdarî nobetê bûyî jî Serokê Komeleya Yekitiya Suryanan a bi KHK’ê hatiye girtin Yuhanna Aktaş e.
'LI SER AVADANIYA DEMOGRAFYAYÊ XETERE HEYE’
Yuhanna Aktaş, got ku armanca sereke ya êrişên ser Bakur û Rojhilatê Sûriyeyê, guherandina demografyaya herêmê ye. Bi domdarî Aktaş, anî ziman ku ji Qamişloyê heta Hesekê, Heleb û Şamê xelkê Suryan li xakeke berfireh dijî û ev tişt anî ziman: “Bi taybet jî piştî Şoreşa Rojava ji hêla demokratîk ve hinek reform hatin kirin. Suryan, erênî nêzî wan guherînan bûn. Lê belê piştî hefteyekê hinek komên girêdayî Tirkiyeyê dest bi êrişan kirin. Me bi gelê xwe yê Suryan re hevdîtin kirin û me fêm kir ku xetereya guherandina demografyayê heye. Heta min bi xizmên xwe yên li Qamişloyê re hevdîtin kir. Ji ber rewşa heyî fikarên wan hene. Terorîstên cîhadîst êrişî gelên li wir dikin. Lewma dibêjin bi xetereya guherandina demografyayê re rû bi rû ne.”
'RÊVEBERIYA XWESER TEMÎNATA NASNAMEYAN E’
Aktaş, destnîşan kir ku cihê Rêveberiya Xweser lê ye xelkê Suryan di ewlehiyê de ye û wiha dirêjî da axaftina xwe: “Niha li herêmê rewşeke nediyar heye. Xelkê me yê li Qamişlo, Hesekê, Dirbêsiyê û hwd. niha di ewlehiyê de ye. Lê ji ber êrişên çeteyên cîhadîst ên zilimkar bifikar in. Ji sala 2011'an ve xelkê me yê di bin sîwana Rêveberiya Xweser de di rêveberiyê de cih girtin. Xwedî gotin bûn. Xelkê me yê Suryan bi nasnameya xwe dijî. Dema mirov li guherîna demografyaya Sûriyeyê dinêre, gelê Suryan di bin sîwana Rêveberiya Xweser de bi ewle dijîn.”
Aktaş, diyar kir ku gelê Suryan yek ji gelên qedîm ên Sûriyeyê ne û wiha pê de çû: “Em nikarin Sûriyeyeke ku Kurd, Suryan, Ereb û Elewî ne tê de dijîn bifikirin. Heke wiha bibe dê rewşa wê mîna ya Iraqê bibe. Rêveberiya Xweser nûnertiya hemû gelan dike û em dixwazin bidome. Em jî dê li gel birayên xwe yên Kurd li dijî êrişan bisekinin. Bi vê mebestê em tev li nobetê bûn.”
'PÊŞEROJA SÛRIYEYÊ BI RÊVEBERIYA XWESER PÊKAN E’
Aktaş, banga xwedîderketina li Rojava li rêxistinên girseyî yên demokratîk ên li Tirkiyeyê kir û axaftina xwe wiha qedand: “Divê piştgiriyê bidin şêweyê rêveberiya herêmên xweser. Tekane rêya Sûriyeyê ji şêweyê rêvebirinê ya dijdemokratîk xelas bike, rêveberiya kul hemû gel bi nasnameya xwe dijîn e. Ew jî tenê di Rêveberiya Xweser de heye. Li herêmên xweser hemû gel û bawerî di meclisên xwe de xwe birêve bibin û îfade dikin. Pêşeroja Sûriyeyê bi parastina Rêveberiya Xweser pêkan e.”
MA / Ahmet Kanbal