MÊRDÎN – Çalakiya Nobedê ku li ser sînorê Nisêbîn-Qamişloyê li hemberî êrîşên li ser Bakur û Rojhilatê Sûriyeyê hatine destpêkirin didome. Parlamentera DEM Partiyê Sumeyye Boz di çalakiya nobedê de axivî û wiha got: "Bêyî azadiya fîzîkî ya Birêz Ocalan em nikarin bêjin 'gavek hatiye avêtin'. Divê êdî gavên berbiçav bên avêtin.”
Çalakiya Nobedê ya li ser sînorê Qamişlo û navçeya Nisêbîn ya Mêrdînê li dijî êrîşên dewleta tirk yên li ser Bakura û Rojhilatê Sûriyeyê hatine destpêkirin di roja 20’emîn de didome. Di roja ewil ya sala nû de gelê Mêrdînê û heyeke ku ji Mûşê hatibû piştgirî dan çalakiyê. Parlamenterên Partiya Wekhevî û Demokrasiyê (DEM Partî) Sumeyye Boz, Kamuran Tanhan û Bêrîtan Guneş, rêveberên DEM Partî yên Mûş û Mêrdînê jî amade bûn. Di çalakiyê de pankartên "Rojava rûmeta me ye", "Bi rihê seferberiyê em ê şoreşa Rojava biparêzin" û "Rojava rûmeta me ye" hatin vekirin û wêneyên rojnameger Cîhan Bilgin û Nazim Daşdan hatin hilgirtin.
‘ROJAVA NE TENÊ YE’
Hevserokê DEM Partiyê yê Mûşê Ahmet Tanriverdî di çalakiyê de axivî û destnîşan kir ku Bakur û Rojhilatê Sûriyeyê ne bi tenê ye. Tanriverdî wiha got: “Berxwedana Rojava wê heta dawiyê bidome. Her kes û bila gelê Rojava bizanibe ku ew ne bi tenê ne. Rojava rûmeta Rojhilata Navîn e. Çawa ku heta niha li ber xwe daye, em ê ji niha û pê ve jî li dijî êrîşan li ber xwe bidin. Bi zilm û zordariya li ser kurdan tu kes negihîşt encamekê. Ji vir em careke din berxwedanê silav dikin."
‘BÊYÎ OCALAN ÇARESERÎ NE MIMKUN E’
Piştre Parlamentera DEM Partiyê ya Mûşê Sumeyye Boz axivî û diyar kir ku bêyî Rêberê PKK'ê Abdullah Ocalan çareserî ne mimkun e û wiha got: “Kedkarên Çapemeniya Azad ku rastiyê ji hemû cîhanê re radigihînin, ji aliyê SÎHA’yên Tirkiyeyê ve tên qetilkirin. Têkoşîna Cîhan û Nazim a heqîqetê wê bidome. Dixwazin li Rojava nasnameya kurd tune bikin. Çawa ku bi salan nikarin me bi hîle û şerên qirêj teslîm bigirin, ji niha û pê ve jî wê nikaribin serî bi me bidin tewandin. Ji ber ku dizanîbûn mifteya çareseriyê Îmralî ye bang li birêz Abdullah Ocalan kirin. Ew dizanin ku ev rê bêyî wî nayê meşandin. Ji ber vê yekê em banga xwe dubare dikin; divê demildest tecrîd bi dawî bibe. Ji ber ku hîna tecrîd didome. Em nikarin bibêjin ku bêyî misogerkirina azadiya fîzîkî ya Birêz Ocalan gav hatiye avêtin. Divê êdî gavên berbiçav bên avêtin û pirsgirêka kurd bi rêyên demokratîk bê çareserkirin. Niha dema demokratîkbûnê ye. Çareseriya pirsgirêka Kurd tê wateya demokratîkbûna Tirkiye û Rojhilata Navîn. Ji bo şer bi dawî bibin divê aştiyeke mayînde pêk were. Çawa ku dengê me ji vir diçe Qamişlo, dengê wê derê jî ji vir tê bihîstin. Ev deng dengê azadiyê ye.”
Piştî axaftinan meşa ku wê sibe ji Parka Aştiyê ya Nisêbînê heta sînorê Qamişlo bê lidarxistin hate bibîrxistin û banga xwedîderketina Bakur û Rojhilatê Sûriyeyê li her kesî hate kirin.
Çalakî bi dirûşmeyan bi dawî bû.