QERS - Seroka Şaxa ÎHD'ê ya Qersê Guldane Kiliçê destnîşan kir ku ji bo çareseriya pirsgirêka kurd beriya her tiştî divê tecrîd bi temamî were rakirin û rêyên muzakereyê bên vekirin.
Parlamenterên Partiya Wekhevî û Demokrasiyê ya Gelan (DEM Partî) Pervîn Buldan û Sirri Sureyya Onder duh ji bo cara duyemîn bi Rêberê PKK'ê Abdullah Ocalan re hevdîtinê pêk bînin çûn Girtîgeha Girtî ya Tîpa F a Ewlekariya Bilind a Îmraliyê. Peyama Abdullah Ocalan a ji 7 xalan pêkhatî, piştî hevdîtina yekemîn a 28'ê Kanûnê bi raya giştî re hat parvekirin, lê têkildarî naveroka hevdîtina duh pêk hat hêj tu daxuyanî nehatine dayîn. Seroka Şaxa Komeleya Mafên Mirovan (ÎHD) a Qersê Guldane Kiliçê gengeşeyên li ser çareseriya pirsgirêka kurd û peyamên Abdullah Ocalan nirxandin.
'MAFÊ HÊVIYÊ' YÊ ABDULLAH OCALAN
Guldane Kiliçê destnîşan kir ku di muzakereyan de tu mafekî xwezayî nabe mijara bazariyê û got ku di nava van mafan de "mafê hêviyê" yê sereke ye. Guldane Kiliçê anî ziman ku mafê navborî mafekî ku di peymanên navneteweyî de hatiye qebûlkirin û ji ber ku Tirkiye ew pêk neaniye ew rexne kir. Guldane Kiliçê got: "Dema ku ev maf tê rojevê, divê li sûc neyê nihêrtin û demildest ev maf bê tetbîqkirin. Desthilat bi fiktra siyasî şerhê datîne û pêk nayne. Gava mirov li paşperdeya vê şerhê jî dinêre, dibîne ku polîtîkayên ewlehîparêz ên di meseleya kurd de ne. DMME'yê gelek caran ji ber nepêkanîna vî mafê Tirkiyeyê mehkûmî tazmînatê kiriye. Tirkiyeyê jî tazmanîta daye û bêhiqûqîtiya xwe domandiye."
‘DIVÊ RÊYA MUZAKEREYÊ BÊ VEKIRIN'
Guldane Kiliçê diyar kir ku tecrîda li Îmraliyê didome û bi bîr xist ku heta niha jî destûr nayê dayîn ku Abdullah Ocalan bi parêzer û malbata xwe re hevdîtinê bike. Guldane Kiliçê got: "Tecrîdeke bi salan e tê meşandin. Pêşî divê ev tecrîd bê rakirin û di dema pêş de rêyên muzakereyê bên vekirin. Divê çarçoveya 'mafê hêviyê' bê gengeşekirin."
Guldane Kiliçê anî ziman ku di navbera salên 2013-2015'an de welêt aram bûye, lê bi dawîbûna pêvajoyê re zilm, wêranî, mirin û girtin ketine dewrê. Guldane Kiliçê got: "Pêvajoyeke trajîk heye. Tevî hemû tiştên qewimîn jî banga aştiyê ya ji Îmraliyê tê, gelekî watedar dibînim. Lê mixabin ji ber tiştên neyînî yên qewimîn, fikarên civakê hene. Heya em aştiya civakî belav nekin, heya em pêvajoyê bi zelalî nemeşînin û heya derfeta beşdariya gelan a li vê pêvajoyê çênebe wê aştî çênebe."
‘DIVÊ HEMÛ GEL XWEDÎ LI ÇARESERIYÊ DERKEVIN'
Guldane Kiliçê anî ziman ku ji bo aştiyeke mayînde divê tecrîda li Îmraliyê bi dawî bibe û ji bo çareseriyê jî hawîrdoreke biîstiqrar bê peydakirin û wiha dawî li axaftina xwe anî: "Di hawîrdoreke demokratîk de wê derdorên nakokî ji holê rabin, gel bi rehetî fikrên xwe bînin ziman. Li cihê ku zilm tune be, nakokî çênabe. Di vî warî de, ez wiha difikirim ku divê mirov vê daxwaza aştiyê tenê di çarçoveya meseleya kurdan de nenirxîne. Beriya her tiştî divê hemû gelên Tirkiyeyê xwedî lê derkevin. Ev aştiya li Tirkiyey geş bibe wê bandorê li gelên Rojhilata Navînê jî bike."
MA / Mehmet Guleş