Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari di mitînga “Ji bo aştiyê azadî” ya li Mêrsînê de axivî. Tulay Hatîmogûllari, diyar kir ku ew ji bo azadiyê û aştiyê bi hev re ne. Tulay Hatîmogûllari, bal kişand ser hevşaredarên Akdenîzê û tayînkirina qeyûm şermezar kir. 

 

‘ÇAVÊ HER KESÎ LI ÎMRALIYÊ YE’ 

 

Bi domdarî Tulay Hatîmogûllari bal kişand ser hevdîtinên li Îmraliyê û got: “Her kes peyama birêz Ocalan mereq dike. Gelo ev pêvajo dê derbasî qonaxeke çawa bibe? Her kes van pirsan dike. Di serî de dixwazim silavên birêz Abdullah Ocalan bi rêya şandeya me ji we re şandin ji we re bibêjim. Gelo di demeke qeyûm tên tayînkirin û girtin û binçavkirin didomin de ma dê aştî bibe? Şaredariya Akdenîzê yek ji şaredariyên mînak a welêt bû. Em li vir careke din dibêjin ku hûn nikarin îradeya me xesp bikin. Qeyûm, derbeya siyasî ye, xespkirina îradeyê ye, nenaskirina gel e û binpêkirina mafê bijartin û hilbijartinê ye.” 

 

JI BO HER KESÎ AŞTÎ

 

Tulay Hatîmogûllari, dayikên tev li mitîngê bû silav kir û got ku tevî gelek bedelên giran û êşan jî têkoşîna xwe ya ji bo aştî û azadiyê didomînin. Tulay Hatîmogûllari, destnîşan kir ku heke pirsgirêka Kurd çareser bibe dê pêşiya demokrasiyê vebe, Tirkiye demokratîk bibe û lêçûnên şer êdî ji bo gel bên xerckirin. 

 

ROJNAMEGERÊN HATINE QETILKIRIN

 

Bi domdarî Tulay Hatîmogûllari bal kişandin ser rojnameger Nazim Daştan, Cîhan Bîlgîn û Azîz Koyluoglû ku ji hêla dewleta tirk ve bi SÎHA’yan hatin qetilkirin û got: “Ez temamiya rojnameeger û kedkarên çapemeniyê yên hatine qetilkirin birêzdarî bibîrtînim.” Tulay Hatîmogûllari, girtin û binçavkirina rojnamegeran bi bîr xist. 

 

MAFÊ HEMWELATIYA WEKHEV

 

Tulay Hatîmogûllari, ew ji bo mafê hemwelatiya wekhev têdikoşin û dixwazin li gel hemû gel û baweriyên cuda li ser zemîneke demokratîk bijîn. Tulay Hatîmogûllari, bang li her civaka Elewî û hemû derdoran kir ku bêhtir xwedî li têkoşîna aştiyê derkevin. 

 

‘DESTÊ AŞTIYÊ YÊ HATIYE DIRÊJKIRIJ GIRÎNG E’

 

Tulay Hatîmogûllari, anî ziman ku ew bi hêvî ne ku piştî peyama Abdullah Ocalan ji bo aştiyê pêşketinek çêbibe û wiha domand: “Lê ev bi rûniştina li malê nabe. Em li 42 navendan bi gel re civiyan. Niha jî mitîngan lidar dixin. Em li mala xwe nasekinin. Em ê di vê pêvajoyê de ji xwe û ji birêz Ocalan bawer bin. Hûn nikarin li rexekî bibêjin aştî li rexa din Rojava bombebaran bikin û qeyûman tayîn bikin. Em bang li hikûmetê dikin ku dev ji zilm û zextan berde. Ev destê aştiyê yê hatiye dirêjkirin girîng e. Em dikarin vê sedsalê bi aştiyê tacîdar bikin. 

 

GELO PROJEYA ÇARESERIYÊ YA ÎKTÎDARÊ ÇI YE? 

 

Birêz Ocalan ev 26 sal in di hucreyeke 12 metrekareyan de bi şev û roj ji bo van rojan dixebite. Dibêje; ‘ji bo rehettir bixebitim divê derfet bên amadekirin ku bi her kesî re hevdîtinan bikim.’ Em jî bi vê daxwazê re ne. Ji bo l ser pêvajoya aştiyê cidî were axaftin, dive tecrîda li ser birêz Ocalan tavilê were rakirin. Di demeke li ser aştiyê tê axaftin, her kes peyama ji Îmraliyê gelek mereq dike. Di vê rewşê de tu çi dikî ey îktîdar? Projeya te ya çareseriyê çi ye? Em li bendê ne ku gavên şênber û pêbawer biavêje. Birêz Ocalan amadekariya bangekî dîrokî dike û vê ji bo aştiyê dike. Gelê Kurd, Elewî, muxalefet aştiyê dixwaze. Baş e ey îktîdar tu çi dixwazî? Bersiva vê pirsê bide.

 

EM Ê WELAT BI HEV RE AVA BIKIN

 

Em bi navê aştî, azadî, wekhevî û edaletê silav û hurmetên xwe ji Îmraliyê re dişînin. Em ji bo zarokên xwe aştiyê dixwazin. Em li vir soza vê didin. Em ê welatekî azad, demokratîk û aştiyane bi hev re ava bikin.”

 

Piştî axaftina Tulay Hatîmogûllari, mitîng bi dawî bû.