ENQERE – Endama Lijneya Navendî ya Komeleya Mafê Mirovan (ÎHD) Nûray Çevîrmen xwest ku ji bo Şerîf Mesûtoglû ku di doza qaymeqam Fatîh Safîturk de cezayê muebeta giran lê hatibû birîn bi awayekî aşkera û zelal bê meşandin û jinûve bê darizandin.
Di 10’ê mijdara 2016’an de li navçeya Dêrika Mêrdînê qaymeqam Muhammed Fatîh Safîturk wek qeyûm tayînî şaredariyê hatibû kirin û di odeya şaredariyê de di encama teqîna bombeyê de Safîturk jiyana xwe ji dest dabû. Piştî êrîşê 70 kes hatibûn binçavkirin û 15 kes jî hatibûn girtin. Piştre 3’emîn Dadgeha Cezayê Giran a Mêrdînê di 22’ê cotmeha 2018’an de derbarê 14 kesan de biryara beraetê dabû. Ji bo Şefê Karê Nivîsan a Şaredariya Dêrîkê yê wê demê Şerîf Mesûtoglû jî 2 caran cezayê muebeta giran û 28 sal jî cezayê girtîgehê hatibû birîn.
Mesûtoglû di 2’ê îlona 2024’an de serî li 3’emîn Dadgeha Cezayê Giran a Mêrdînê da û daxwaza jinûve darizandinê kir. Mesûtoglû di serlêdana xwe de wek hincet jî diyar kir ku di kûmandaya bombeyê de şopa tîliya kesek din heye û ev li ber çavan nehatiye girtin. Daxwaza jinûve darizandinê di 17’ê îlona 2024’an de hat redkirin. Mesûtoglû bi hinceta ku darizandineke adil pêk nehatiye û ji bo bertek nîşanî biryarê bide di 30’ê îlona 2024’an de dest bi greva birçîbûnê kiribû. Mesûtoglû piştî 134 rojan greva birçîbûnê bi dawî kiribû.
Endama Lijneya Navendî ya Komeleya Mafê Mirovan (ÎHD) Nûray Çevîrmen ku di heman demê de hevseroka ÎHD’a Enqereyê ye têkildarî binpêkirina mafên Mesûtoglû axivî.
DAXWAZA DARIZANDINEKE ADIL
Çevîrmen da zanîn ku darizandina Mesûtoglû ji sala 2016’an vir ve bi awayekî ne adil dewam dike û wiha axivî: “Mesûtoglû di pêvajoyeke darizandina ne adil de derbas bû. Di dema darizandinê de gelek aliyên bûyerê nehatin zelalkirin. Divê derbarê mirinê de gelek delîl bihatana komkirin lê ev yek pêk nehat. Delîlên ku li cihê bûyerê hatin berhevkirin, avêtin sergoyê. Avahiya ku bombe hatiye teqandin ji aliyê îtfaiyeyê tê şûştin. Di encama van bûyeran de darizandineke adil çênebû. Delîl ji aliyê dozgeriyê hatin veşartin û piştî darizandinê hatin aşkerakirin. Derket holê ku şopa tilî ya ku li ser kûmandaya bombeyê hatiye dîtin aydî Mesûtoglû nîn e. Parêzer û malbatê li ser vê yekê bi daxwaza jinûve darizandinê serî li 3’emîn Dadgeha Cezayê Giran a Mêrdînê dan lê piştî demeke kurt daxwaz hat redkirin.”
‘KES DENGÊ MESÛTOGLÛ NABIHÎZE’
Nûray Çevîrmen da zanîn ku dema darizandinê de ji ber Mesûtoglû beşdarî danîşînê nebû, darizandin bêyî rêgeza darizandina rûbirû dewam kiriye û wiha got: “Di bin çavan de bi şîdeta fîzîkî û psîkolojîk re rûbirû maye, di dema binçavkirinê de xwestine sûc bigire ser xwe. Têkildarî çavkaniyên derve û çapemeniya ku şandine girtîgehê tu agahî nedane wî, ji aliyê rêveberiya girtîgehê ve hatiye qedexekirin û pêşkeşî wî nekirine. Hem dengê Mesûtoglû hem jî dengê malbata wî nayên bihîstin.”
‘GAV NAYÊN AVÊTIN’
Çevîrmen diyar kir ku daxwaza Mesûtoglû ya jinûve darizandinê bi tu awayî li ber çavan nehatiye girtin û wiha axivî: “Hem malbat û hem jî Mesûtoglû daxwaza darizandineke adil dikin. Raya giştî dizane ku Mesûtoglû bêsûc e. Lê ji bo darizandina adilane heta niha tu gav nehatine avêtin. Hem delîlên ku derketine holê û hemj î îdiayên malbata qaymeqam nayên lêkolînkirin. Gotina qaymeqam a ‘sûcdar li derve ne’ nîşan dide ku Mesûtoglû sûcdar nîn e. Ligel van geşedanan darizandina adil tê astengkirin. Ger Tirkiye xwe wek welatek hiqûqê pênase dike wê demê divê dosya aşkera û zelal be. Divê hemû delîl li ber çavan bên girtin, di çarçoveya hiqûqî de jinûve bên lêkolînkirin û pêvajoya jinûve darizandinê bê destpêkirin.”