WAN - Di çalakiya nobetê ya li pêşiya Şaredariya Bajarê Mezin a Wanê de daxuyanî hate dayin. Di daxuyaniyê de hat xwestin ku her kes guh bide daxuyaniya tê payin Abdullah Ocalan bide û hat xwestin her kes ji vîna gel re rêzdar be. 

 

Çalakiya nobetê ya li pêşiya Şaredariya Bajarê Mezin a Wanê ku li dijî hewldana tayînkirina qeyûm hatiye destpêkirin di roja 3’yemîn de didome. Tevî hewayê sar jî gel bênavber nobeta xwe didomîne. Gelek hevşaredaran jî piştgirî dan nobetê. Di nobetê de daxuyanî hate dayin. Parlamenterên DEM Partiyê, hevşaredar û bi sedan welatî tev li daxuyaniyê bûn. 

 

‘MIJARA XESPKIRINA ÎRADEYA GEL NE TENÊ MESELEYA KURDA YE’

 

Di daxuyaniyê de ji ewil Hevseroka DEM Partiyê ya Wanê Gulşen Kurt axivî û da zanîn ku tevî hewayê sar jî nobeta wan di roja 3’yan de didome. Gulşen Kurt, çalakvan silav kir û wiha got: “Berxwedana me, têkoşîna me ya heq ev der pir germ kir. Beriya hilbijartinê em bi mehan derî bi derî geriyan û me kedekî mezin da. Di roja hilbijartinê de jî me mafê xwe yê demokratîk bi kar anî û hevşaredarên xwe hilbijart. Me her 14 şaredarî jî bi dest xist. Serkeftineke dîrokî bû. Mixabin dixwazin îro bi kompas û hûleyan îradeya gelê me xesp bikin. Biryara hatiye dayin biryareke neheq e. Em vê zilm û neheqiyê qebûl nakin lewma weke gelê Wanê dê li ber xwe bidin. Xespkirina îradeyê ne tenê meseleya gelê Kurd e, meseleya her kesên li gel heq û hiqûqê ye. Em ê bi berxwedana xwe bi ser kevin.” 

 

‘EM JI BO PIŞTEVANIYÊ HATIN’

 

Serokê Partiya Sosyalîst a Kurdistanê (PSK) yê Wanê Tayyîp Kizilyildiz jî got: “Divê ev sepana neheq tavilê bi dawî bibe. Em ji bo her cureyên piştevaniyê hatin vê derê. Mixabin ev kiriyarên nehiqûqî bûne qedera welatê me Kurdistanê.” 

 

‘XWE GELEK CERIBANDIN LÊ NEKARÎN’

 

Hevşaredara Bajarê Mezin a Mêrdînê Devrîm Demîr ku li şûna wê qeyûm hatiye tayînkirin jî di daxuyaniyê de got ku gelê Wanê bûye hêviya tevahiya Kurdistanê. Devrîm Demîr, berxwedana gelê Wanê ya ji bo mazbatayê bi bîr xist û ev tişt anî ziman: “Dewlet neçar ma ku paşvegavê biavêje. Lewma em bi we serbilind in. Kesek nikare xwe li ber vê bigire. Bila li dijî gelê me nekevin nava lîstikên qirêjî. Xwe gelek ceribandin lê nekarîn bi ser kevin û dê nekarin bi ser kevin. Dê gelê Wanê li ber xwe bide û em jî bi we re ne.” 

 

‘BILA ÎKTÎDAR GUH BIDE BANGA ABDULLAH OCALAN’ 

 

Parlamenterê DEM Partiyê yê Bedlîsê Huseyîn Olan jî bilêv kir ku îktîdar hewl dide bi komployên qirêjî îradeya gel xesp bike. Olan, got ku biryara li dijî Zeydan li dijî tevahiya gelê Wanê û gelê Kurd hatiye dayin. Olan, wiha dirêjî da axaftina xwe: “Gelê Kurd ne mîna berê ne. Êdî şiyar bûye û polîtîk e. Birêz Abdullah Ocalan hefteyek piştre dê peyamekî bişîne. Bila îktîdar baş lê guhdar be. Ji ber ku ji bo aştî û jiyaneke birûmet e.” 

 

‘BERXWEDANA LI DIJÎ ÎNKARÊ REWA YE’

 

Herî dawî jî Parlamenterê DEM Partiyê yê Îdirê Yilmaz Hun axivî û wiha got: “Bijartin û hilbijartin maf e. Van mafên me xesp dikin. Xespkirina îradeyê, hiqûqa mêtingeriyê ye. Înkara ziman, nasname û çanda Kurdan e. Berxwedana li dijî vê înkarê maf e. Ez serhildan û berxwedana we silav dikim. Em ê dîsa li ber xwe bidin û tu caran dev jê bernedin.” 

 

Çalakiya nobetê bi stran û govendan didome.