Bi armanca şermezarkirina 26'emîn salvegera komploya navneteweyî ya 15’ê Sibatê ya li dijî Rêberê PKK’ê Abdullah Ocalan, bi pêşengiya Tevgera Jinên Azad (TJA) li Qada Azadiyê ya navçeya Bakirkoy a Stenbolê daxuyanî hate dayin. Aktîvîstên TJA’yê, parlamenterên Partiya Wekhevî û Demokrasiyê ya Gelan (DEM Partî), rêveberên DEM Partiyê, nûnerên saziyên sivîl û gelek jin beşdarî daxuyaniyê bûn. 

 

Di daxuyaniyê de pankarta "Jin ber bi azadiyê ve dimeşin" hat hilgirtin. Di daxuyaniyê de bê navber dirûşmên "Ji şer na, aştî a niha", "Bijî Serok Apo", "Bê Serok jiyan nabe", "Bijî berxedana Rojava" û "Jin, jiyan, azadî" hatin berzkirin.

 

Parlamenter Çîçek Otlu di daxuyaniyê de bal kişand ser tayînkirina qeyûm a li Şaredariya Bajarê mezin a Wanê û diyar kir ku xelkê Wanê li dijî qeyûm li ber xwe da. Çîçek Otlu piştre bal kişand ser komployê û got: "26'emîn salvegera komploya li dijî birêz Ocalan e. Hêzên navneteweyî, rejîmên paşverû yên Rojhilata Navîn, ji bo meşa azadiyê ya gelê Kurd bê veger tesfiye bikin, qanûn paşguh kirin û birêz Ocalan radestî Tirkiyeyê kirin. Weke Kurd, kedkar, jin û ciwan me 26 berê got em komployê nas nakin, îro jî dibêjin em careke din komployê nas nakin."  

 

Sevcan Kadîroglu jî axivî û ev tişt anî ziman: “Em îro di qonaxeke girîng a ji bo dabînkirina aştî û mercên jiyana demokratîk ji bo gelê xwe ne. Ji nû ve destpêkirina pêvajoya diyalogê ji bo gihiştina çareseriyeke mayînde bêyî windakirina demê, di xaleke girîng a diyarkirina paşeroja gelên herêmê de ye. Ji bo aştiyeke bi rûmet û çareseriyeke adil şertê pêwîst ew e ku birêz Abdullah Ocalan azadiya fîzîkî bi dest bixe û bi awayekî azad siyasetê bike. Em îro careke din komploya 15’ê Sibatê şermezar dikin."

 

Di daxuyaniyê de dirûşmên li dijî tayînkirina qeyûm û şermezarkirina komployê hatin berzkirin. 

 

Dema girse belav dibû polîsan êriş kirin. Di êrişê de 10 kes hatin binçavkirin.