Qeymeqamê Bajêr Ozan Balcî ji aliyê Wezareta Karên Navxweyî ve wekî qeyûm tayînî Şaredariya Bajarê Mezin a Wanê hat kirin. Waliyên ku cara sêyemîn tayînî Şaredariya Bajarê Mezin a Wanê hatin kirin, li dû xwe gelek deyn hiştin û gendeliyên mezin kirin. 

 

Di hilbijartinên 31'ê Adarê de Namzetên Şaredariyê yên Partiya Wekhevî û Demokrasiyê ya Gelan (DEM Partî) Neslîhan Şedal û Abdullah Zeydan ji sedî 55,51 ê dengan wergirtin. Waliyê bajör Îbrahîm Taşyapan weki qeyûm tayînî şaredariyê hat kirin.

 

KARÊN EWIL ÊN QEYÛM

 

Taşyapan, ewilî têkiliya şaredariyê û gel qut kir. Taşyapan, dîwarên bilind lê kirin û li ketin û derketina şaredariyê lêgerîn dan destpêkirin. Taşyapan ku di dema qeyûmtiyê de bi sedan karker ji kar derxistin, yek bi yek yekeyên jin, ciwan, zarok, perwerdehî û çandê girtin. Gelek projeyên civakî yên wekî Navenda Jiyana Jinê, Navenda Çandê ya Nûda, Sitargeha Jinan, Malên Piştevaniya Perwerdehiyê û Zarokan ku di nava projeyên Partiya Herêmên Demokratîk (DBP) ên wê demê de bûn, hatin betalkirin.

 

NELIRÊTÎ

 

Zirara ku Taşyapan gihandiye şaredariyê, di raporên Dîwana Muhasebatê ya sala 2017'an de cih girt. Li gorî raporê; Taşyapan, di sala 2017'an 125 milyon TL deyn xist stuyê şaredariyê. Dîsa li gorî raporê derket holê ku di kirîna mal û xizmetan de mevzûat hatiye paşguhkirin û şaredarî xisiriye. 

 

Taşyapan ji ber ku pereyê di kaseya şaredariyê de qedand, xwest bi firotina hemû zeviyên şaredariyê "dahatê bi dest bixe." Taşyapan 500 wesayitên "Otoparka Pirqatî" ya bi qadeke 6 hezar û 662 metrekare û kargehên li otoparkê da ber firotinê. Qada 66 hezar û 392 metrekare ya ku aîdî şaredariyê ye û beriya 10 salan hat kirêkirin bi 17 milyon û 500 hezar TL'yî û VOTAŞ'ê ku yek ji tesîsên herî mezin a çandiniyê û sewalkariyê ya Tirkiyeyê bû, bi 19 milyon û 500 TL'yî û 80 dikanên li Cîty Van AVM'yê heya 3 salan da kirê. 

 

Piştî guhertina peywirê ya ku bi Biryara Lijneya Wezîran a 13'ê Hezîrana 2017'an, li şûna Taşyapan Waliyê Trabzonê Mustafa Zorluoglu wekî qeyûm hat tayînkirin. Zorluoglû jî rêya Taşyapan şopand.

 

Zorluoglû di heyama 2 salan a qeyûmtiya xwe de jî bêhiqûqî û zext berdewam kirin. Li bajêr di dema Zorluoglû de, daxuyaniyên çapemeniyê hatin qedexekirin, HDP'ê wê demê tenê karîbû daxuyaniyeke çapemeniyê bide. Zorluoglû her wiha polîs û cendirmeyan li tevahiya bajêr bi cih kir û cezayên trafîkê li welatiyan birî. Her wiha di serdema Zorluoglû de 13 hezar û 226 binpêkirinên mafan pêk hatin. Di dema qeyûm Zorluoglû de ku bi zextên xwe yên li ser rojnamegeran jî dihat naskirin, bi sedan siyasetmedar hatin binçavkirin.

 

KARKER JI KAR HATIN DERXISTIN

 

Serdema ewil a qeyûman hem ji aliyê Îbrahîm Taşyapan û hem jî ji aliyê Mûrat Zorluoglû ve bi qirkirina karkeran derbas bû. Di vê heyamê de nêzî 4 hezar karker ji kar hatin avêtin û der barê bi sedan karkeran de lêpirsîna “ewlehiyê” hat vekirin. Di bin navê lêpirsîna “ewlehiyê” de bi sedan karker bi îdiaya ku ew, malbatên wan an jî kesên derdora wan “endamên HDP’ê ne” ji kar hatin avêtin û li şûna wan kesên nêzî desthilatdariyê hatin bicihkirin.

 

Di hilbijartinên herêmî yên di 31'ê Adara 2019'an de, namzetên Hevşaredarên Bajarê Mezin ê Wanê yên Partiya Demokratîk a Gelan (HDP) Bedîa Ozgokçe Ertan û Mustafa Avcî ji sedî 53,83 ê dengan stendibûn. Lê piştî 4 mehan di 19'ê Tebaxa 2019'an de Waliyê Wanê Mehmet Emîn Bîlmez wekî qeyûm hat tayînkirin.

 

MAL Û MILK HATIN FIROTIN

 

Di 12'ê Gulana 2022'yan de li şûna Mehmet Emîn Bîlmez wekî qeyûm Ozan Balcî hat tayînkirin. Balcî jî li ser şopa qeyûmên berê dewam kir. Bi îlanên ku di Rojnameya Fermî de hatin weşandin, li taxên Eskîcamî û Yenîcamî yên navçeya Edremîtê bi dehan zevî, dikan û sîteyên cuda hatin firotin.

 

Tevî van firotinan jî deynê şaredariyê li şûna ku kêm bibe zêde bû. Şaredarê Bajarê Mezin ê Wanê Abdullah Zeydan ragihand ku deynê şaredariyê di sala 2022'yan de 400 milyon lire bûye û bi tayînkirina Balcî li Şaredariya Bajarê Mezin di sal û nîvekê de deyn bûye 8 milyar û 801 milyon û 703  lire.

 

Hat diyarkirin ku Balcî di Hilbijartina Herêmî ya 31'ê Adara 2024'an da bi 2 milyon û 120 hezar TL'yî şal û bi 721 hezar TL'yî jî çoqlat kirîne. Qeyûm Balcî jî di çarçoveya kirîna mal û malzemeyan de 54 hezar û 604 TL dida TRT Kurdî, di çalakiyên AKP'ê de heqê xwarin û vexwarinênan dida. Balcî di dema qeyûmtiyê de jî ji bo Midûriyeta Karên Tenduristiyê 12 hezar û 636 TL zêr, 30 hezar TL pakêtên dermankirinê û 147 hezar TL alavên kirtasiyeyê kirî.

 

Balcî di 15'ê Sibatê de cara duyemîn wekî qeyûm tayînî şaredariyê hat kirin.