SILÊMANIYE - Bafil Celal Talabanî piştî hevdîtina bi Şandeya Îmraliyê re daxuyanî da û got: “Tekane rêya çareseriyê nîqaşên jidil û diyalog e.”
Şandeya Îmraliyê ya Partiya Wekhevî û Demokrasiyê ya Gelan (DEM Partî) îro li Silêmaniyeyê bi Serokê Yekitiya Niştimanî Kurdistan (YNK) Bafil Talabanî, Cîgirê Serokê Herêma Federe ya Kurdistanê Qubat Talabanî û Endama Polîtburoya YNK’ê Şanaz Îbrahîm Ehmed re hevdîtin kir. Ofîsa çapemeniyê ya Bafil Talabanî piştî hevdîtinê daxuyaniyeke nivîskî weşand.
BAL KIŞAND SER MAM CELAL
Di daxuyaniyê de hate gotin ku Serokê Yekîtiya Nîştimaniya Kurdistanê Bafil Celal Talabanî, li Debaşanê pêşwazî li şandeya Îmraliyê ya bi serokatiya Pervîn Buldan û Sirrî Sureyya Onder kiriye.
Di heman daxuyaniyê de hate gotin: “Di hevdîtinê de ku Endamê Polîtburoyê Qubad Talabanî amade bû, şandeya Îmraliyê silav û rêzên birêz Abdullah Ocalan gihandin Serok Bafil Celal Talabanî û biryar, siyaset, bijardeyên xwe der barê bûyerên siyasî yên navçeyê, pirsa aştiyê li Tirkiyê û gotûbêjên xwe bi birêz Ocalan re anîn ziman. Serok Bafil jî tevî ku bi germî pêşwazî li şandeyê kir, her wiha nêrîna xwe û stratejiya YNK’ê ya der barê qonaxa nû ya aştiyê ya li Tirkiyeyê bi zelalî anî ziman û diyar kir ku piştgirî û piştevaniya hemû destpêşxeriyan dikin da ku gelê me li Tirkiyê mafên xwe biparêze û weke YNK jî wê hevkariya serxistina vê hewldana dîrokî bikin ku Serok Mam Celal di sala 1993’an de bingeha wê danîbû.”
Bi domdarî wiha hate gotin: “Di hevdîtinê de Serokê YNK’ê da zanîn, heta pirsa Kurd çareser nebe, aştî û aramiya tevahî li navçeyê bicih nabe û wek berê jî me aniye ziman, pirsa Kurd bi çek û şer çareser nabe û encaman bi dest nayîne. Ji ber ku tekane rêya çareseriyê gotûbêj û diyaloga rasteqîne ye. Em hêvî dikin, hemû alî bi taybetî û ji dil, ji bo serxistina vê derfeta dîrokî, li ser bingeha hevparî, biratî, hewildana aştî û aramiyê bidin. Serok Bafil Celal Talebanî destnîşan kir, baweriya wan bi biratî û jiyana hevpar a aştiyane heye, ti car jî nabîn gef li ser welatên cîran û dixwazin bi aştî û biratî bijîn. Emê îro destpêşxer bin da ku zimanê diyalogê serwer be û emê destê biratiyê dirêj bikin, em hêvî dikin niyetek cidî ji bo biratiya Tirk û Kurdan û serxistina vê hewldana nîştimanî hebe.”