NAVENDA NÛÇEYAN - Pevçûnên li bajarên başûrê Sûriyeyê û qeraxê behrê dest pêkirin didomin. Di pevçûnên heta niha de herî kêm 100 kesan jiyana xwe ji dest dan.
Li bajarên Latkiye, Tartus, Cebeli, Hums, Hema û Deraayê di navbera komên çekdar û komên girêdayî HTŞ-Colanî-rêveberiya demkî ya Şamê de berdewam in. Şer û pevçûn, ji şevê din ve dijwar bûne. Li gorî agahiyên li ber dest; heta niha herî kêm 100 kesan jiyana xwe ji dest dane. Hat zanîn ku gelek kes birîndar bûne û di pevçûnan de mal hatine şewitandin.
Li gorî nûçeya ANHA’yê; komên çekdar li Latkiye û Tartusê hinek herêmên di destê rêveberiya nû ya Şamê de bi dest xistin.
LATKIYE
Hinek komên çekdar îdia kirin ku wan li Latkiyeyê Balafirgeha Satamo û herêmek leşkerî ya girêdayî Fermandariya Hêzên Deryayî xistine bin kontrola xwe. Piştî demekê jî desthilat Şamê diyar kir ku wan cihê fermandariya hêzên deryayî paş ve girtiye. Di dîmeneke hatiye kişandin de, tê gotin ku komên çekdar endamên rêveberiya Latkiye ya girêdayî deshilata Şamê esîr girtine.
Hat ragihandin ku di pevçûnên li Latkiye, Tertus û Humsê de herî kêm 100 kes hatine kuştin, gelek kes jî birîndar bûne. Di dîmenên hatine parvekirin de, tê dîtin ku cenazeyên gelek kesan li kolanan e.
Li Latkiyeyê seyareyek girêdayî Partiya Turkistan Îslam ket kemîna komên çekdar. Di dîmenên hatine kişandin de kesek bi Tirkî di axive û dibêje ku ew ketine kemînê. Di hinek dîmenên hatine kişandin de jî tê gotin ku gelek endamên hêzên leşkerî yên desthilata Şamê ketine destê komên çekdar.
Hat ragihandin ku li bajarê Humsê malek aydê welatiyên Nasurî hatiye gulebarankirin û şewitandin. Di dîmenek hatiye belavkirin de, gulebarana malê tê dîtin. Di dîmeneke din de, tê dîtin ku kesek bi seyarekê ve hatiye girêdan û li erdê tê kaşkirin.
RÊVEBERIYA ŞAMÊ HÊZÊN XWE VEGUHESTIN QADÊ
Piştî ku pevçûn dijwar bûn, desthilatdariya Şamê, ji Şam, Hema, Idlib, Heleb û Dêrazor gelek hêz leşkerî şandin herêmên şer. Her wiha banga seferberiyê hat kirin û qedexeya derketina derve hat îlankirin.
DEWLETA TIRK LEŞKER SEWQ KIR
Li aliyê din hat gotin ku dewleta Tirk ji Deriyê Sînor ê Bab El Hewa hêzên leşkerî şandine Sûriyeyê. Di dîmeneke ku hatiye parvekirin de seyareyên leşkerî yên Tirkiyeyê tên dîtin.
PEVÇÛN BERDEWAM IN
Li gorî agahiyên çavkaniyan li piraniya herêmên beravê yên Suriyeyê, alozî didome. Pevçûnên di navbera komên çekdar û hêzên desthilatdariya Şamê de berdewam dikin.