Li Osmaniye, Dortyola Hatayê û Ceyhan a Edeneyê bi dirûşmeyên "Rêbertiya Azad Civaka Demokratîk" û "Ji bo azadiyê civaka demokratîk" Newroz hat pîrozkirin. 

 

HATAY/DORTYOL

 

Bi dirûşma "Rêbertiya Azad Civaka Demokratîk" û "Ji bo Azadiyê Civaka Demokratîk" danê sibehê li saheya topê ya Navçeya Altiocak a navçeya Dortyol a Hatayê coşa Newrozê dest pê kir. Pîrozbahiyên li quntara çiyayên Amanosê  ku gelek kes bi kiras-fîstan û şal-şepik tevlî bûn, jin û ciwan bi awayekî girseyî beşdar bûn. Kesên ku beşdarî pîrozbahiyê bûn, li nuqteya lêgerînê ya yekane ya ji aliyê polîsan ve hatibû avakirin, bi berfirehî li ser wan lêgerîn hat kirin. Di pîrozbahiyê de bi sedan welatiyên ji 7 salî heta 70 salî, nûnerên partiyên siyasî û rêxistinên sivîl ên bajêr jî amade bûn. Piştî kêliya rêzgirtinê coşa Newrozê hîn zêdetir bû. Girseyê di kêliya rêzgirtinê de dirûşmên "Bijî Serok Apo", "Şehîd Namirin" û "Jin jiyan azadî" berz kirin. Girseyê bi awazên hunermendên herêmî bi deqeyan govend gerand.

 

Parlamenterê Agirî yê DEM Partiyê Heval Bozdag di axaftineke kurt de diyar kir ku gelê Kurd ji bo pîrozbahiyên Newrozê berdêlên giran dane. Heval Bozdag işaret bi "Banga Aştî û Civaka Demokratîk" a Rêberê Gelê Kurd Abdullah Ocalan kir û diyar kir ku rêya aştiyê ji Îmraliyê derbas dibe û azadiya fîzîkî ya Abdullah Ocalan xwest.

 

Pîrozbahî bi stranan bi dawî bû.

 

EDENE/CEYHAN

 

Li qada Newrozê ya Taxa Belediyeevlerî ya navçeya Ceyhanê ya Edeneyê Newroz bi dirûşmên "Rêbertiya Azad Civaka Demokratîk" û "Ji bo Azadiyê Civaka Demokratîk" hat pîrozkirin. Welatiyên hatin qada ku astengiyên polîsan lê hebûn, ji du noqteyên lêgerînê derbas bûn û tevlî pîrozbahiyê bûn. Li qada ku bi alên DEM Partiyê hatibû xemilandin, gel bi deqeyan govend gerand û bi stranên li ser dikê hatin gotin. Jin û mêr li qadan bi cil û bergên rengîn ên neteweyî bi nîşana serkeftinê û dirûşmên "Newroz pîroz be" û "Bijî Serok Apo" berz kirin.

 

Pîrozbahî bi govendê bi dawî bû.

 

OSMANIYE

 

Li Taxa Yunus Emre ya navçeya navendî ya Osmaniyeyê jî pîrozbahiya Newrozê hat lidarxistin. Bi dirûşmên “Rêbertiya Azad Civaka Demokratîk” û “Ji bo Civaka Demokratîk Newroz  Azadiyê” hate pîrozkirin.  Parlamenterê DEM Partiyê Bedlîsê Huseyîn Olan, Berdevka Komîsyona Hiqûqê ya DEM Partiyê Sevda Çelîk Ozbîngol, aktîvîstên Tevgera Jinên Azad (TJA), endamên Meclîsa Dayikên Aştiyê ya Rihayê û gelek welatî amade bûn. Jin û ciwanên ku hatin qada ku her alî bi alên partiyê yên zer-sor-kesk hatibû xemilandin, di saetên serê sibehê de bi cil û bergên xwe yên neteweyî qad tijî kirin. Kesên beşdarî Newroza ku bi deqeyek rêzgirtinê dest pê kir, dirûşmên "Jin jiyan azadî" berz kirin. Pîrozbahî bi silavkirina gel ji aliyê Komîteya Amadekar a Newrozê û Hevserokên DEM Partiyê yên bajarê Osmaniyeyê  destpê kir.

 

Di pîrozbahiyê de Hevseroka Komîsyona Hiqûqê ya DEM Partiyê Sevda Çelîk Ozbîngol axivî û diyar kir ku gelê Kurd ji bo pîrozbahiya Newrozê berdêlên giran dan û got, "Em rojên dîrokî dijîn. Bila ev bibe destpêka sedsala duyemîn a ku em ê bi aştî, azadî û wekheviyê re bibin yek." Sevda Çelîk Ozbîngol işaret bi 'Banga Aştî û Civaka Demokratîk" a Rêberê Gelê Kurd Abdullah Ocalan kir û got, "Destê ku li Meclîsê dirêj  bû, veguherî banga sedsalê ya li Îmraliyê. Em bi berpirsyariya vê bangawaziyê dizanin. Dem dema guhertin, azadî û demokrasiyê ye. Divê banga Birêz Ocalan bê bersiv nemîne. Ev serdema avakirina aştiyê ye."

 

Piştre Parlamenterê  DEM Partiyê yê Bedlîsê Huseyîn Olan axivî û diyar kir ku li 4 parçeyên Kurdistanê pîrozbahiyên Newrozê hatin lidarxistin. Huseyîn Olan, anî ziman ku ew di dîrokê de bi tifaqa Kurd-Tirk heta îro hatine û got, "PKK ji destpêka salên 1980'î ve têkoşînê dide. Di tevahiya vê pêvajoyê de gelê Kurd rastî neheqiyeke mezin hat.Bang ji gelên Tirkiyeyê re dibêje ku ji bo civakek demokratîk berpirsiyariya we heye. Her wiha ji dewletê re dibêje ku zemîna têkoşîna siyasî deyne. Bingeha vê têkoşîna siyasî demokratîkbûn û terikandina înkara Kurdan e. Êdî dem hatiye ku bi nasname, ziman û çanda vî gelî re aştî pêk were.”  

 

Piştî axaftinan beşdaran agirê Newrozê pêxistin. Piştî pêxistina agirê Newrozê şahî bi govendê Û bi stranên Kurdî bi dawî bû.

 

AYDIN/GERMENCÎK

 

Li taxa Ortaklar a Germencika Aydinê bi pêşengiya Tevgera Jinên Azad (TJA), (DBP û DEM Partiyê, bi tevlîbûna bi hezaran kesî Newroz hat pîrozkirin. Siyasetmedar û parlamenter tevlî pîrozbahiyê bûn. 

 

Jin bi cil û bergên xwe yên gelekî beşdarî pîrozbahiyê bûn. Piştî rezgirtinê bernameya pîrozbahiyê destpêkiri. Hevserokên DEM Partiyê yê Germencikê Newroza gel pîroz kir. 

 

Parlamenter Sirri Sakik axivî û bal kişand ser peyama Rêberê Gelê Kurd Abdullah Ocalan, banga xwedî li derketina peyamê kir.  Dû re Dayikên Aştiyê agirê Newrozê pêxistin. Pîrozbahiya Newroza 2025'an bi gerandina govendê bi dawî bû. 

 

 

MÛGLA/BODRÛM

 

Li navçeya Bodrumê bi heman dirûşmê newroz li Mumcular Pazaryerî hat pîrozkirin. Hevserokên DEM Partiyê yên Muglayê axivîn û Newroza gel pîroz kirin. 

 

Parlamenter Îbrahîm Akin jî di pîrozbahiyê de bal kişand ser bangewaziya Rêberê Gelê Kurd Abdullah Ocalan û got: "Kî alîgirê demokrasiyê be, hiqûq û edaletê bixwaze, bixwaze ku ev welat çarenûsa xwe ya hevpar bi hev re bijî, gelê Kurd zimanê xwe bi kar bîne û vê yekê weke mafekî demokratîk yê rewa qebûl bike, em ê li kêleka wan li ber xwe bidin û têkoşîna xwe bidomînin."

 

Parlamenter Nejla Demîr jî wiha axivî: "40 sal in em li ber xwe didin. Îrade, çand û zimanê gelê Kurd bizanibin; em azadî û aştiyê dixwazin. Ev bar dikeve ser milê hemû gelê me. Civaka demokratîk wê bibe rizgariya hemû gelan. Jinan bi felsefeya 'Jin jiyan azadî' têkoşîna azadiya jinê ji sînoran wêdetir meşandin. Em bi baweriya biratî û aştiyê vê agirê Newrozê pêdixin. Agirê Newrozê ku bi hezaran sal in pêxistiye, wê dijminahiya zilm, mêtingerî û înkarê bişewitîne, aştî, jiyaneke wekhev, adil û bi rûmet û civaka demokratîk biafirîne. Bi vê baweriyê em bi milyonan tên cem hev û berxwedana xwe mezin dikin.”

 

Piştre agirê Newrozê ji hêla Dayikên Aştiyê ve hat pêxistin. 

 

Gel li ber stranên Grup Golgedekîler û Hozan Şervan govend gerandin û Newroza xwe pîroz kirin. 

 

KONYA/KÛLÛ

 

Li navçeya Kulu ya Konyayê bi pêşengiya Partiya Wekhevî û Demokrasiyê (DEM Patî) bi dirûşmên “Rêbertiya Azad Civaka Demokratîk” û “Ji bo Azadiyê Civaka Demokratîk” Newroz hat pîrozkirin. Parlamenterê DEM Partiyê yê Mêrdînê Mehmet Kamaç weke axaftvan beşdarî çalakiyê bû. Li qada pîrozbahiyê dirûşmên "Bijî Serok Apo", "Be Serok Jiyan Nabe" û "Jin Jiyan Azadî" hatin berzkirin. Gel bi cil û bergên xwe yên neteweyî û alayên "Kesk, Sor û Zer" demeke dirêj govend gerand.

 

Mehmet Kamaç, diyar kir ku Newroza 2025'an wê bibe Newroza ku bi banga sedsalê hat pîrozkirin û got, "Birêz Ocalan banga sedsalê kir û got ' Ez xwedî îradeya çareseriya pirsgirêka Kurd im û ji bo vê amade me' Di pêvajoya 2013 û 2015 Pêvajoya kur li ku derê bûn îro jî li wêderê ne. Şaredariyên ku bi îradeya xwe ya azad hildibijêrin, tên desteserkirin, eger ev qeyrana siyasî neyê çareserkirin, sedema qeyranên civakî û siyasî nebûna maf û hiqûqê ye. Em di wê baweriyê de ne ku ev pêvajo wê li welat veguhere aştiyeke mayînde. Ji bo vê jî em berpirsyariya xwe bi cih tînin. Pêdiviyên banga sedsalê bi cih bînin. Rêbazên ku we bi sedsalan ceribandine tu encam nedane. Hûn nikarin bi rêbaza di destekî de gul û di destê din de xencer çareseriyê pêk bînin."

 

Pîrozbahiya Newrozê bi stranên Koma Ciwan, Hozan Kado, Devrîm Çelîk û Hozan Mîşo bi dawî bû.