DÎLOK - Hevseroka Giştî ya DBP’ê Çîgdem Kiliçgun Uçar di pîrozbahiya Newrozê ya Dîlokê de axivî û wiha bertek nîşanî gotinên Mansur Yavaş da: “Li dijî têkoşîna azadiyê zimandirêjiyê dike. Em nahêlin kesek zimandirêjiyê li dijî nirxên gelê Kurd bike.”
Li Dîlokê bi dirûşma “Rêbertiya Azad Civaka Demokratîk” û “Ji bo Azadiyê Civaka Demokratîk” pîrozbahiya Newrozê hat lidarxistin. Pîrozbahî, li Qada Stasyonê hat lidarxistin. Hevseroka Giştî ya Partiya Herêmên Demokratîk (DBP) Çîgdem Kiliçgun uçar, Serokwekîlê Koma Partiya Wekhevî û Demokrasiyê ya Gelan (DEM Partî) Sezaî Temellî, Parlamentera Partiya Kedê (EMEP) Sevda Karaca, Hevşaredarê Xelfetî ya Rihayê Mehmet Karayilan ku li şûna wî qeyûm hatiye tayînkirin, wekîlê berê Mahmût Togrûl, endamên Meclisa Dayikên Aştiyê, aktîvîstên Tevgera Jinên Azad (TJA) û gelek kes tev li bûn.
Qada pîrozbahiyê bi rengên kesk, sor û zer hatibû xemilandin û pankarta “Newroza ji bo azadiyê civaka demokratîk” li ser dikê hatibû daliqandin. Welatiyên ku bi cil û bergên xwe yên Kurdî beşdarî pîrozbahiyê bûn, li ber stranên Kurdî govend gerandin. Welatiyên hêj ji saetên zû yên serê sibehê ve herikîn qadê, ji hêla polîsan ve bi hinceta reng û cil û bergên Kurdî hatin astengkirin. Li ser berteka gel, polîs neçar man ku paşvegavê biavêjin. Pîrozbahî, bi rêzgirtinê dest pê kir û piştre jî Komîteya Amadekar û hevserokên DEM Partî û DBP’ê yên bajar gel silav kirin.
‘DÊ MEKANÎKA DERBEYÊ TÊK BIÇE’
Sezaî Temellî di pîrozbahiyê de efsaneya Kawayê Hesinkar bi bîr xist û got: “Tam 10 rojan me tax bi tax, navçe bi navçe Newroz pîroz kir. Ev Newroz ji Newrozên din cuda ye. Me bi vêxistina agirî birêz Ocalan hembêz kir. Em careke din li vir birêz Ocalan silav dikin. Bi salan birêz Ocalan di tecrîdê de girtin lê ew deng bêdeng nebû û bi awayekî xurt rêya çareseriyê vekir. Îro ji bo hemû gelên cîhanê bangekî mezin kir. Têkoşîna wî ji bo pêşeroja Rojhilata Navîn û Tirkiyeyê gelek girîng e. Yên berteka pêwîst nadin vê banga birêz Ocalan jî hewl didin xwe mijûl bikin. Dixwazin ev çerx wiha bigere. Lê ev mekanîka derbeyê dê têk biçe. Hêza me ji fikra me ye. Dê rêwîtiya me ya Rêya Sêyemîn tu caran bi dawî nebe û dê her bidome.”
Piştre jî parlamenterê Dîlokê yê HDP’ê yê berê Mahmût Togrul gel silav kir.
BERTEK NÎŞANÎ MANSUR YAVAŞ DA
Hevseroka Giştî ya DBP’ê Çîgdem Kiliçgun Uçar jî bal kişand ser girîngiya Dîlokê ya di dîroka têkoşîna azadiyê ya gelê Kurd e. Çîgdem Kiliçgun Uçar, wiha domand: “Di serî de birêz Ocalan em ji bo hevalên xwe yên girtî azadiyê dixwazin. Qeyûmên li Kurdistanê, tecrîd û polîtîkayên şerê taybet ên li Kurdistanê ji bo pêşîlêgirtina têkoşîna me di meriyetê de ne. Em bi salan li dijî qeyûman têkoşiyan. Lê çi bû? Bi destê daraza girêdayî îktîdarê, operasyon hate kirin û girtin çêbûn. Em li dijî hemû xespên li dijî vîna gel in. Tevî van jî Şaredarê Bajarê Mezin ê Enqereyê mîkrofon girt destê xwe û ji bo nirxên gelê Kurd dibêje ‘kincir.’ Zimandirêjiyê li têkoşîna azadiyê dike. Em nahêlin kesek zimandirêjiyê li nirxên gelê Kurd bike.
Banga Rêberê Gelê Kurd Abdullah Ocalan ji bo hemû derdorên civakê ye. Di heman demê de ji bo Enqereyê ye. Dewlet dibêje ku em paşvegavê naavêjin. Divê pirsgirêka Kurd were çareserkirin. Çareseriya pirsgirêka Kurd dê bibe çarseriya pirsgriêka sereke ya dewletê. Ji bo welat û pêşerojeke demokratîk em ê bi hev re siyaseta demokratîk bimeşînin û civaka demokratîk bi hev re ava bikin. Hemû kes li bendê ye. Di demeke pêşiya civakê ewqasî hatiye vekirin de divê ciwan û jin pêşengtiya vê bangê bikin.” Di dema axaftinê de gelek caran girseyê dirûşmên “Bijî Serok Apo” û “Jin, jiyan, azadî” berz kir.
Piştî axaftinan, Koma Agirê Zerdeşt û hunermend Cevdet Bagca derketin ser dikê.
Pîrozbahî, bi govend û dirûşman bi dawî bû.