WAN - Parêzer Jiyan Ozkaplan, ji bo doza rojnameger Reyhan Hacioglu ku dê sibê bê darizandin got, "Îdîanameyek bêhiqûqî hatiye amadekirin û ev yek li hemberî rojnamegerekî wekî tacîza darazê tê bikaranîn.”

 

Rûniştina yekem a Reyhan Hacioglu ku di 17’ê Çileyê de li Wanê di çarçoveya lêpirsînekê de hatibû binçavkirin û di 21ê Çileyê de bi îdîaya "endamtiya rêxistinê" hatibû girtin, dê di 13ê Hezîranê de li 2’yemîn Dadgeha Cezayê Giran a Wanê bê dîtin. Parêzera Reyhan Hacioglu Jiyan Ozkaplan û Nûnerê Herêmê yê Komeleya Rojnamegerên Dicle Fırat (DFG) yê Wanê Adnan Bîlen banga tevlîbûna rûniştinê kirin.

 

BERNAME WEK SÛC HAT DÎTIN

 

Jiyan Ozkaplan anî ziman ku bernameyên telewîzyonê yên Reyhan Hacioglu peşkeş kirine bi piranî di îdianameyê de cih girtin û îdianame bi temamî îdianameya bi darê zorê sûc peydakirinê ye û mêvanên ku ew vexwendine û hemû mijarên ku di vê dozê de hatine nîqaşkirin wek sûc hatiye dîtin. Jiyan Ozkaplan bi bîr xist ku her gotineke têkildarî binpêkirinên mafan ên li girtîgehan tên jiyîn û tecrîd di îdianamede wek sûc hatiye bicihkirin û wiha got: "Di îdîanameya hatiye amadekirin de hewl hatiye dayîn ku feraseteke bi temamî hatiye xetimandin bê afirandin. Di rastiyê de mêvanên Reyhan jî weke ' endamên rêxistinê ' hatine nîşandan. Reyhan telefonê dike û dixwaze li Tetwanê bernameyekê organîze bike. Heta vê yekê weke sûc jî dixin nava dozê. Bernameya ku wê mazûvaniya hevşaredaran bike jî dibe sûc. Bernameyek bi sernavê 'Girtîgeh di bin zexteke giran de ne' tê çêkirin û ev sernav jî weke sûc tê dîtin. 

 

TACÎZA DARAZÊ

 

Jiyan Ozkaplan da zanîn ku divê dosyayeke bi vî rengî neyê vekirin û wiha axivî: "Îdîanameyek li derveyî hiqûqê hatiye amadekirin û ev yek weke destdirêjiya dadgeriyê li rojnamevanekî tê kirin. Reyhan hêj girtî ye û divê di rûniştina yekemîn de serbest bê berdan. Divê dawî li tacîza darazê ya li dijî çapemeniya azad bê anîn. Pêdiviya nayê gotin a welatekî demokratîk ew e ku çapemeniya azad bi awayekî azad dinivîse. Bêyî vê yekê welat nikare demokratîk bibe. Lê naxwazin rojnamevan biaxivin û binivîsînin. Rojnameger jî parêzvanên mafan in. Divê mafê gel ê wergirtina nûçeyan bê parastin. Di wê rojê de em li bendê ne ku her kes bi çapemeniya azad re di nava piştevaniyê de be."

 

BERDÊLA RAGIHANDINA RASTIYÊ

 

Adnan Bîlen diyar kir ku ji sala 2016'an û vir ve zextên li ser rojnamevanan zêdetir bûne û got, "Polîtîkayên li Kurdistanê li dijî rojnamevanan tên meşandin, ji ber ku mûxalefeteke xurt nîne, îro li tevahiya Tirkiyeyê belav bûye. Wê demê me weke çapemeniya azad hişyarî da ku eger ev rewş ji nedîtî ve were, wê rojekê her kes deriyê xwe lê bide. Û îro, bi rastî jî em encamên vê dijîn. Di vê çarçoveyê de bi dehan rojnamevan di girtîgehan de ne û hema hema her roj rojnameger li korîdorên edliyeyê tên darizandin. Her kesî berdêla nivîsandina rastiya li vî welatî bi rengekî yan jî bi rêbazeke din da. Bêguman çapemeniya azad jî her nûçeyên ku bi her awayî çêkiriye, gelekî berdêl daye. Buhayê eşkerekirina rastiyê, carna bi kuştina hevalên me yên rojnamevan ên li Rojava û Başûrê Kurdistanê û carna jî bi girtîgeh, sirgûn û dozan re xwe bi şêweyên cuda nîşan da. Tevî vê yekê jî hevalên me dest ji dîtin û nivîsandina rastiyan bernedane."

 

BANGA PIŞTEVANIYÊ

 

Bîlen anî ziman Reyhan Hacioglu li zindanê berdêla nivîsandina rastiyan dioe û wiha got: "Dema ku li îdîanameya hatî girtin dinêrin, ji bo rojnamegerekî her tiştê mecbûrî weke sûc hatiye nîşandan. Wezîfeya rojnamevanekî ew e ku her tiştên weke 'sûc' di wê îdîanemeyê de hatine xêzkirin bi rengekî rast bi cih bîne, ku 'sûc' bike. Bi vê perspektîfê Reyhan û hevalên me yên din sûc nekirine; wezîfeyên xwe bi cih anîne. Reyhan û hevalên me yên din ên rojnamevan divê demildest bên berdan. Divê şert û mercên ku rojnamevan li Tirkiyeyê bi awayekî azad karê xwe bikin bên avakirin. Ji ber vê yekê em bang dikin ku beşdarî rûniştina Reyhan Hacioglu ya di 13'ê Hezîranê de saet di 10.30'an de li 2'yemîn Dadgeha Cezayê Giran a Wanê pêk bê bibin. Em bang li hemû rêxistinên civakî yên sivîl, dostên xwe yên rojnamevan, partiyên siyasî û rojnamevanên xwedî wijdan ên li bajarê me dikin ku di nava piştgiriyê de bin. Em dizanin ku tenê bi hevgirtinê em dikarin ji nava tarîtiyê derkevin û vê pêvajoyê ev yek bi berdewamî nîşanî me da. Em bang li hemû kesî dikin ku piştgiriyê bidin çapemeniya azad û Reyhanê.”