AMED - Endama Meclisa Dayikên Aştiyê Muşeher Ulkeyê bal kişand ser neavêtina gavan ji aliyê dewletê ve û got: "Banga min ji serokkomar re ev e ku li sozên xwe xwedî derkeve. Dema ku te got, 'Bila çekên xwe deynin û gavan biavêjin', wan gav avêtin; niha divê hûn jî bi lez gavan biavêjin."
Pêvajoya ku bi Banga Aştî û Civaka Demokratîk a Rêberê Gelê Kurd Abdullah Ocalan dest pê kir û armanca wê çareserkirina pirsgirêka Kurd e, di 26'ê Cotmehê de, piştî biryarên fesixkirin û bêçekkirinê, bi biryara Tevgera Azadiya Kurd a vekişîna hêzên xwe bo Herêmên Parastina Medyayê, ket qonaxa xwe ya duyemîn. Her çend di qonaxa yekem a pêvajoyê de yekane gava berbiçav ku ji hêla dewlet û partiya desthilatê ve hat avêtin, avakirina Komîsyona Hevgirtina Neteweyî, Xwişk-Biratî û Demokrasiyê li meclisê bû jî, pir caran tê gotin ku gavên ku ji hêla dewletê ve di vê qonaxê de bên avêtin dê ji bo pêşeroja pêvajoyê diyarker bin. Dayikên Aştiyê ku barê şerê 40 salî hilgirtine, bang li dewletê kirin ku gavên ji bo pêşvebirina pêvajoyê bavêje.
Endama Meclisa Dayikên Aştiyê Muşeher Ulkeyê diyar kir ku dewletê bersıv nedaye heman gavên Tevgera Azadiyê ya Kurd û got: "Banga min ji Serokkomar re ev e ku li sozên xwe xwedî derkeve. Dema ku te got, 'Bila çekên xwe deynin û gavan bavêjin', wan gav avêtin; niha divê hûn jî bi lez gavan bavêjin."
'RÊYA AŞTIYÊ DI AMEDÊ RE DERBAS DIBE'
Muşeher Ulkeyê diyar kir ku gava yekem ku divê dewlet bavêje ew e ku azadiya Abdullah Ocalan misoger bike û got: "Azadiya Rêbertî azadiya hemû gelê Kurd e. Rêbertî dibêje; 'Heta ku civak azad nebe ez azad nabim.' Em dibêjin: Bila civak û Rêbertî bi hev re azad bibin û rêyek were vekirin. Rêbertî dema ku azadiyê dixwaze dibêje ku ew dixwaze hêsirên dayikan rawestîne. Wan hêsirên dayikan mîna Dîcle û Firatê herikandin û ew hîn jî dikin. Wekî dayikeke gerîla, ez vê dibêjim: Em li pişta zarokên xwe ne; em ê wan bi tenê nehêlin. Ger ew gav neavêjin, em ê dîsa li pişta zarokên xwe bisekinin. Divê dewlet tavilê gavên jidil bavêje. Em çand, ziman, adet û kevneşopiyên xwe dixwazin. Em aştiyê dixwazin; em li benda gavên rastîn in, ne yên sexte."
'EM AZADIYA ABDULLAH OCALAN DIXWAZIN'
Meryama Tûranê anî ziman ku Tevgera Azadiyê ya Kurd hemû gavên pêwîst avêtine û got: "Gerîlayan hemû gavên pêwîst avêtine. Kongreya xwe li dar xistin, çekên xwe şewitandin û agirbest îlan kirin. Li ber hemû cîhanê agirbest îlan kirin. Gaveke din hatiye avêtin. Îro, em li ser navê Dayikên Aştiyê dibêjin: Tecrîda li ser Rêberê Gelê Kurd Abdullah Ocalan rakin. Em azadiya Ocalan dixwazin. Em azadiya girtiyan û şervanên azadiyê dixwazin. Divê şervanên azadiyê bi azadî werin û beşdarî xebatê bibin."
Afîfe Kartalê jî diyar kir ku divê dewlet tavilê li hember gavên ku ji aliyê Kurd ve hatine avêtin gavan bavêje û got: "Em aştiyê dixwazin, em şer naxwazin. Ji wan re gotin çekan bişewitînin û wan şewitand. Ji gerîlayan re gotin ku ji Tirkiyeyê derkevin, derketin. Divê pêşî Erdogan gavan bavêje. Çima qey Erdogan ditirse? Di serî de rêziknameyên qanûnî demildest divê hemû gav werin avêtin."
MA / Fethî Balaman - Melîk Varol