ENQERE - Li Girtîgeha Rihayê, Arîna biçûk ku tevî diya xwe Esma Yilmaz girtiye, li girtîgehê bû 15 mehî. Ji ber nayê tedawîkirin her diçe rewşa wê xirabtir dibe. Bav Mihdî Yilmaz, bilêv kir ku qawîşa Arîn û hevajîna wê hatiye guherandin û pêdiviyên wê yên sereke nayên dayîn. 

 

Arîna biçûk ku tevî diya xwe Esma Yilmaz di Girtîgeha Tîpa T a Rihayê de ye, bû 15 mehî. Arîn a ku astim lê peyda bibû, ji ber şert û mercên girtîgehê her diçe rewşa wê xirabtir dibe. Ji ber baş nayê xweyîkirin di madeya Arînê de reflude çêbûye û ji bo tedawiya wê heta niha tu tişt nehatiye kirin. Bav Mihdî Yilmaz ku çû girtîgehê, got hîn jî bin çavên Arînê reş in û krîzên wê yên astimê didomin. 

 

ROJÊ SAETEKÊ AV TÊ DAYÎN 

 

Bav Yilmaz, diyar kir ku ji ber derman hestiyên wê dihelînin bi makîneya buharê tê tedawîkirin. Bav Yilmaz, got di hevdîtina dawî de wî keça xwe li pişt camê dîtiye û rewşa wê nebaş bûye. 

 

Yilmaz, destnîşan kir ku Arînê nikare baş şîrê diya xwe vexwe û got: "Hevjîna min û Arîn di qawîşeke 14 kesî de diman, lê wan ji wir derxistin. Qawîşa ku niha lê dimînin gelek kêmasiyên wê hene. Bi taybetî jî betanî, newresim kêm in. Ji bo hejmarê kêm bikin ên di qawîşên din de li hin qawîşên din bela kirin, lê vê carê jî pêdiviyên wan nadin wan. Hîn jî pirsgirêka avê didome. Rojê tenê saetekê avê didin." 

 

Bav Yilmaz, diyar kir ku êdî Arîn dimeşe, lê belê sînorên girtîgehê têra wê nakin û got: "Hevjîna min got, her cara deriyê qawîşê vedibe Arînê dixwaze derkeve derve. Baş nayê tedawîkirin. Ne aram e." Yilmaz, diyar kir ku li girtîgehê kreş hatiye vekirin û xwestine Arînê tenê bibin, lê belê ji ber nexweş e divê tevî diya xwe biçe. 

 

HEVJÎNA MIN JÎ NIZANE DÊ ÇI BIKE 

 

Yilmaz, destnîşan kir ku hevjîna wê keseke hêzdar e, lê belê nexweşîna Arînê zêde tesîrê lê dike û got: "Ji ber Arînê li ber çavê wê dihele, zêde tesîrê jê digire. Vê carê ji min re got 'Em wek miriyan e. Keça min li ber çavê min dihele.' Êdî ew jî nizane dê çi bike." 

 

Yilmaz, diyar kir ku têkildarî van tiştan ne îdareya girtîgehê ne jî saziyên din tiştek çareser nekirine û got: "Ne Komîsyona Mafên Mirovan a Meclîsê ne jî kesên din dengê me nabihîsin. Em bimirin jî ne xema kesî ye." 

 

Têkildarî rewşê me bi Parlementera HDP'ê ya Sêrtê Meral Daniş Beştaşê re hevdîtin çêkir. Beştaş, anî ziman ku wan ji bo rewşa Arînê gelek caran pêşniyazname dane lê belê dîsa jî tiştek nehatiye kirin û got: "Navê vê dijminatî ye, heyfhilanîn e. Deîr mirovatiyê ye. Pitikek nayê tedawîkirin û tevî dayika xwe di girtîgehê de ye, ev ecêbî ye. Ev pitik nexweş e, divê şert û mercên wê bên başkirin. Divê Arîn li derve li nexweşxaneyeke tam teşekullî bê tedawîkirin. Rewşa Arînê, rewşa girtîgehên li Tirkiyeyê nîşan dide. Têkildarî girtîgehên Tirkiyeyê her roj bi dehan kes serî li me didin. Ez ê bang nekim, çimkî ev ne meseleyeke bangkirinê ye. Ev mesele meseleya hiqûq, ehlaq û mirovahiyê ye. Çi hewce be divê bê kirin û heta neyê kirin jî em ê şopdarê wê bin." 

 

MA / Berivan Altan