ÊLIH – Li navçeya Heskîfê ya 12 hezar salî dema di bin avê de bê mayîn li gel berhem û şûngehên dîrokî û çandî dê 123 cûre sewalên li herêmê jî tune bibe. Her wiha hemû xweşikiya nîgarên dîroka Heskîfê bi set û keviran vedişêrin û welatî nikarin vir ziyaret bikin.
Li ser geliyê ango Çemê Dîcleyê bi salan e projeya Bendava Ilisû ya ku tê gotin temenê wê 50 sal be ber bi dawiyê ve diçe. Dema deriyên bendavê bên girtin dê hezaran donim erd, bi dehan gund, dîrok û çanda navçeya Heskîfê ya 12 hezar sal dê di bin avê de bimîne. Ya herî xemgîn jî dê li ser vê dirêjahiya 100 kîlomîtroyî ya bendavê tesîra herî neyînî li ser xweza û cûreyên sewalan bike. Bi dehan cûreyên çûk û sewalan dê qada jiyana xwe wan wêran bibe û tê gotin ku dê bêcih bimînin û cûreyên wan winda bibe. Tenê dê ne dîrok û çanda Heskîfê wê Çemê Dîcleyê yê ahengî û xweşikiya xemla xwe dide şûngehên dîrokî bê talankirin. Wê çemê Dîcleyê ji statûbûna xwe ya gelî ango çem derkeve û wê tenê bibe golek ku tu kes jê sûs wernagire. Ekolîjîst û saziyên peywîndar didin xuya kirin bi bendavê re dê cûreyê 123 sewalan bi tunebûnê re hevrû bimînin.
BI SET Û BETONÊ XWEŞIKIYA HESKÎFÊ TUNE DIKIN
Ev nêzî du salan e bi wêrankirina dîroka Heskîf re, çiyayê miqabilê wê Çiyayê Ramanê jî tê wêrankirin. Şîrketên ji saziyên dewletê îhale girtin e li qûntarên Çiyayê Ramanê dînamatîn diteqînin û keviran û moloza wê tînin li ber keleha dîrokî ya Heskîfê bi awayek paralel setek dirêj û bilind çêdikin. Çêkirina vê sete hemû xweşikiya bi hezaran şikeft û keleha Heskîfê xera dike. Ev set hemû dîmenên dîrokî û rengîn ê Heskîf û Çemê Dîcleyê tune dike.
BÛYE CIHÊ QADA RANTÊ
Ev set gihîştiye dîwarên mizgefta dîrokî ya El-Rizik. Vê seta ku tê çêkirin û veguhestina berhemên dîrokî veguheriye qada rantê. Li gorî daxuyaniya rayedaran tê gotin 500 milyon TL butçe ji bo vir hatiye veqetandin. Her wiha li gel çêkirina vê setê jî li ber Keleha Heskîfê setek betonê jî hatiye lêkirin.
BERHEMÊN DÎROKÎ JI CIHÊ XWE TÊN RAKIRIN
Din av du salên dawî de berhemên dîrokî yên mîna Tirbeya Zeynelbeg, Hemama Artuklu, Tirbeya Îmam Abdullah, Deriyê Romayê hatin veguhestin. Her wiha niha jî amadekariya minareyên mizgeftên Sultan Suleyman û El-Rizik ji bo bên veguhestin tê kirin û li dora wan îskeleyên înşatê hatine danîn. Bêyî ku li şikeftan kolandina arkeolojîk bê kirin, lê betonê dirêjin şikeftan.
WELATÎ LI DÎMENÊN HILWEŞÎNÊ TEMAŞE DIKIN
Her welatiyên tên serdana Heskîfê “Heyf û sed mixabin heyf” ji rûyê wan dibare û rengê xemgîniyê xwe li ser çavê wan wer dide. Welatî mîna berê nikarin biçin Keleha Heskîfê û şikeftan ziyaret bikin û li xweşikiya dîrokê binêrin. Tenê li Serê Pirê ya li miqabilî keleha Heskîfê li vê dîmena çêkirina setê û hilweşînê dinêrin û dizivirin.
BÊDENGÎ DIDOME
Balkêş e li aliyekî wêrankirina Heskîfê didome û li aliyê din jî bêdengiya ji bo xwedî derketina Heskîfê û parastina wê didome û tu xebatek ji bo parastina dîrok, çand û xwezayê li wir nayê kirin.
MA / Bîlal Guldem - Metîn Yoksu