ÎZMÎR - 2 jê girtî 4 girtiyên li Girtîgeha Tîpa M a Manîsayê name ji ÎHD'ê re şandin û bal kişandin ser binpêkirinên mafan ên li girtîgehê.
Li Girtîgeha Tîpa M a Manîsayê, girtiyê nexweş Ozgur Bektaşoglû (43) ku ji sedî 52 berasteng e û felcî ye û girtiyê nexweş Mehmet Tekîn ku tûmor di mêjiyê wî de ye û Şemsettîn Erdem û Ozgur Çelîk name ji Şaxa Komeleya Mafê Mirovan (ÎHD) a Îzmîrê re şandin û bal kişandin ser binpêkirinên mafan ên li girtîgehê.
LÊGERÎNA TAZÎ
Girtiyan di nameya şandin de gotin: "Der barê me de tu cezayê dîsîplînê tune ye, lê îdareya girtîgehê em xistin hucreya A-24 ku jê re dibêje qawîş. Li girtîgehê li qawîşa C-16'an girtiyên siyasî hene. Cih li qawîşa C-16'an heye, lê nahêlin em biçin wir. Kapasîteya qawîşa C-16'an 20 kes e, lê niha 13 kes lê dimînin. Îdareya girtîgehê derpêş dike ku cih lê tune ye. Ji roja ku em anîne Girtîgeha Manîsayê em bi îşkenceya fizîk û derûnî re rû bi rû ne. Ji ber hevalê me Şemsettîn Erdem li hemberî îşkenceya tazî derketiye wî ji ser hiş birine. Bi gefxwarinê lêgerîna tazî li hevalên me yên din jî ferz kirine. Hema bêje her roj di dema jimariyê de bi darê zorê girtiyan radikin ser piya. Carinan li ber çavê midûrê girtîgehê û bi fermana wî em tên îşkencekirin."
'ARMANC ŞEWITANDINA ÎNFAZAN E'
Girtiyan destnîşan kir ku ji bo vê wan serî li Serdozgeriya Komarê daye, lê belê hîn jî serlêdana wan nehatiye bersivandin û gotin: "Hema bêje her roj bi îdiaya em li hemberî jimariyê derdikevin û dirûşmeyan berz dikin lêprisîn tên destpêkirin û cezayê dîsîplînê tê birîn. Heta niha der barê her hevalekî de 7-8 lêprisîn hatine vekirin û herî kêm jî 4 cezayên dîsîplînê. Piraniya cezayan ên ragihandin û serdanê ne. 10 roj cezayê dîsîplînê li hevalê me Şemsettîn Erdem birîn. Li gorî girtekên tên nivîsandin der barê me de gelek lêpirsîn hatine destpêkirin. Wê gelek ceza bên birîn. Bi vê yekê armanca îdareyê ew hem serî bide tewandin hem jî înfazên me bişewitîne. Herî dawî di 2'yê Mijdarê de serê sibehê bi fermana midûrê duyem ê girtîgehê 10 deqeyan em hatin îşkencekirin. Destê me ji paş ve xwar kirin û serê me dan erdê. Wexta me dirûşme berz kirin, careke din îşkence kirin. Heta niha bi vî awayî em 3-4 caran hatine îşkencekirin. Midûrê yekem ê girtîgehê bi hinceta daxwaza me yan jî daxwaznameyên me tune ne, nahêle em hevdîtinê bi dozger re çêbikin. Herî dawî di 5'ê Mijdarê de daxwaza me ya ji bo hevdîtina bi dozger re hat qebûlkirin. Hevalê me Ahmet tekîn ji bo hevdîtinê çû û tiştên tên serê me ji dozger re gotin, lê belê êvarê di heman rojê de gardiyanan bi awayekî tund êrîşî me kirin. Wexta jimariyê bi kamerayan dikevin hudnur û dibêjin 'rabin ser piya' û paşê kamerayê digirin û êrîşî me dikin. vê siehê (7'ê Mijdarê) midûrê duyem tevî çend sergaridyan û 20 gardiyanan hat û heman tiştt kirin."
AVA GERM, SANDALYE TUNE NE
Girtiyan, di nameya xwe de diyar kirin ku êvara 6'ê Mijdarê xwarin nedane wan û sibeha 7'ê Mijdarê jî dest danîne ser sandalyeyên wan. Girtiyan got: "Ev çewisandin her diçe zêdetir dibin. Yanî tu ewlehiya me tune ye. Di mêjiyê hevalê me Mehmet tekîn de tumor heye û di hucreyê de ye. Hevalê me Ozgur Bektaşoglû jî felcî ye û rapora wî ya ji sedî 52 berasteng e heye û di dema jiamriyê de bi darê zorê vî hevalê me radikin ser piya û ew îşkence dikin. Berê jî ji bo evan pirsgirêkan me serî li hin saziyan dabû, lê em nizanin ka ji bo vê tiştek hatiye kirin an na. Lê her roj gef li me tên xwarin. Ji ber ava germ li hucreyê tune ye em bi ava sar serê xwe dişon. Nêzî mehekê ye em niakrin biçin revîrê. Hin derman hene divê em wan bi kar bînin, lê her çend me daxwazname nivîsand jî nadin. Wisa dixuyê piraniya daxwaznameyên me nagihên cihê xwe û yên qetandin."
Girtiyan di nameya xwe de ji bo rewşa navborî bang li raya giştî û saziyên civaka sivîl kirin.
MA / Ruken Demir