AMED – Hevseroka KCD’ê û Parlamentera HDP’ê Leyla Guven a di greva birçîbûnê de got: “AKP neçare hesasiyetên gelê kurd bigire ber çavan. Heke ev rewş dewam bike dê windakirina AKP’ê jî bi xwe re bîne. Divê tecrîd bi dengek hevpar bê şikandin.”
Hevseroka Kongreya Civaka Demokratîk (KCD) û Parlamentera Partiya Demokratîk a Gelan (HDP) a Colemêrgê Leyla Guven bi boneya tecrîdkirina Rêberê PKK’ê Abdullah Ocalan şermezar bike ji 7’ê mijdarê ve di çalakya greva birçîbûnê ya bêdem de ye. Çalakiya Guven 13 roj in didome. Guven bi rêya parêzerên xwe çalakiya xwe ji Ajansa Mezopotamyayê re nirxand.
PIŞTEVANÎ PÊL BI PÊL BERBELAV DIBE
Guven bal kişand ser piştevaniya bo çalakiya xwe û got: “Ez bi bawerim pêl bi pêl wê ev piştevanî berbelav bibe û mezin bibe. Hemû gelê kurd û derdorên demokratîk û parêzvanê mafên mirovan dizanin ku tecrîd sûcê mirovahiyê ye û dizanin ev yek nayê qebûlkirin. Li dijî tecrîdê gelek çalakî tên lidarxistin.
Şertên ku ez ê hîn bibim ka piştevaniya ji bo çalakiyê gelek kêm in. Tenê dikarim ji rojnameyekê geşedanên li derve bişopînim. Girtîgeh 18 televîzyonan dide me lê hemû jî yên medya hawizê ne. Mafê me yê nûçeyên objektîf wergirtinê nîne. Radyo jî tenê li ser pêla FM eyar kirin e. Ev rewş hemû rastiya Tirkiyeyê radixe ber çavan. Her çiqas ez agahiyan nabihîzim jî lê hîs dikim ku piştevanî her diçe mezin dibe. Ez bi bawerim ku her kes dizane ev tecrîd li dijî aştiyê ye. Bi taybetî jin û ciwan di ferqa vê yekê de ne. Ji ber vê yekê jî ez bi bawerim wê xwedî derketinek mezin li çalakiyê bikin.”
'BILA TECRÎDA MUTLAQ BÊ BIDAWÎKIRIN’
Guven bal kişand ser tecrîdkirina Ocalan û çalakiyên ji bo Ocalan hatin û tên lidarxistin û got: “Armanca çalakiya min tenê ne ew e hevdîtinek bi Birêz Ocalan re pêk were. Armanca çalakiya min ew e ku dawî li tecrîda mutlaq bê. Divê di çarçoveya hemû mafên qanûnî yên ji bo Birêz Ocalan de şertên wî bên başkirin. Ji ber vê yekê jî divê çalakiya min di raya giştî de rast bê dîtin û di vê bingehê de bê destekkirin.”
‘EZ GELEK BAŞIM’
Guven ji bo tenduristiya xwe jî got: “Tenduristiya gelek baş e. Personelê revîra hepsê her sibe tê li qawîşê tansiyon, nabz, kîlo û hwd. dipîve. Ez jî xwe baş hîs dikim.”
‘LI HEMBER BIRYARA WALÎTIYÊ ŞAŞ NEMAM’
Guven da zanîn ku ew li dijî biryara qedexeya Walîtiya Amedê ya ji bo piştevaniyê wê şaş nemaye û dixwazin bi van qedexeyan civakê bitirsînin. Guven anî ziman ku gelê kurd tevî hemû zext, astengî, qedexe û zilmê jî xwedî li nirxên xwe derdikeve û AKP jî nikare ji vê polîtîkaya xwe encamê bigire û AKP xwe dixapîne.
‘TECRÎD BI DENGEK HEVPAR DÊ BÊ ŞIKANDIN’
Guven vê peyamê da hikumeta AKP’ê û raya giştî: “APK neçare ku hesasiyetên gelê kurd bigire ber çavan. Heke ev rewş dewam bike, dê AKP dawiyê li xwe jî bîne. Wê ji ser dika siyasetê biçe ser sergo. Hêvî û daxwaza min ew e ku kesên eleqedar bi hişek rastî û polîtîkayên dirûst guh bide daxwaz hevpar a civakê û ji bo nirxên civakê yên hevpar xizmetê bike. Bêguman di vî warî de berpirsyariya herî mezin dikeve ser milê şoreşgeran, derdorên demorkatîk. Heke ev derdor deng bilind bikin wê tecrîd bê şikandin û îdealên hevpar ên gelan pêk bên.”
MA / Ozgur Paksoy