Hevseroka Kongreya Civaka Demokratîk (KCD) û Parlamentera HDP'ê ya Colemêrgê Leyla Guven piştî şerê li dijî Efrînê bertekên xwe anîn ziman û ji ber li dijî şer nerazûbûn anî ziman hatibû binçavkirin. Guven piştî hat binçavkirin di 31'ê Çile de hatibû girtin û ji wê demê heta niha li Girtîgeha Tîpa E ya Amedê girtî tê darizandin. Guven li ruxmê di hilbijartina giştî ya 24'ê Hezîranê de hat hilbijartin û bû wekîla HDP'ê ya Colemêrgê jî dîsa nehat berdan. Guven ku di 29'ê Heziranê de 1'emîn danişîna wê li 9'emîn Dadgeha Cezayên Giran a Amedê hat dîtin, bi hinceta delîl nehatine komkirin û ji bo delîl bên komkirin nehat berdan û doz hat taloqkirin. Di danişîna ewil de dîsa biryara berdewama girtina Leyla Guven dan. Piştî hilbijartinê li gel Parlamenterê CHP'ê yê girtî dihat darizandin Enis Berberoglu hat berdan jî, lê dîsa Guven ku hat hilbijtin nehat berdan. 

 

Guven ku dozger der barê wê de ji 25 salan heta 46,5 salan cezayê girtîgehê dixwaze, di 7'ê mijdarê de dîsa danişîna wê hat dîtin. Vê carê kelepçe ters xistin destê wê û xwestin bibin danişinê. Lê Guven ev helwest red kir û neçû daniyşînê. Guven bi riya SEGBÎS'ê tev li danişînê bû. Guven, di danişînê de diyar kir ku operasyona li dijî Efrînê dagirkerî ye û ji ber vê yekê li dijî operasyonê derketiye. Guven, destnîşan kir ku niha li dijî Kobanê jî operasyon di rojevê de ye û ger ku bê berdan dê li dijî operasyona Kobane û Rojava derkeve û dê dîsa bêje operasyona li dijî Rojava dagirkerîye.  Guven, destnîşan kiribû ku ew ji paradîgmaya Rêberê PKK'ê Abdullah Ocalan a der barê jinan de bi bandor bûye û dest bi siyasetê kiriye. Heyetê axaftina Guven qut kiribû û gotibû 'Li vir propaganda serokê teroîstann nekin'. Guven bertek nîşanî helwesta dadgehê dabû û gotibû "Hûn nikarin wisa nêzîk bibin. Ew kesê hûn dibêjin terorîst bi Serokomar Erdogan re li ser masaya muzakereyê rûnişt. Hûn wisa bêjin hûn nikarin li ser vê koltûkê rûnên." û bertekên xwe anibû ziman. 

 

 

'EZ DI VÊ OXIRÊ DE MIRINÊ JÎ QEBÛL DIKIM'

 

Guven, bal kişand ser fikrên Rêberê PKK'ê Abdullah Ocalan ên li ser çaraseriya pirsgirêka Kurd û Rojhilata Navîn wiha anîbû ziman: "Birêz Ocalan di çareserî û aştiya Rojhilata Navîn de xwedî rolek mezin e. Îro bi fikrên xwe rê nîşani Rojhilata Navîn dide. Tecrîdkirina Ocalan sûcê mirovahiyê ye." Guven piştî ve parastinê destnîşan kir ku ji bo tecrîdkirina Ocalan bi dawî bibe dest bi greva bêdem dike. Guven, sedema çalalakiyê wiha gotibû: "Ji bo çareserkirina pirsgirêka Kurd rolek girîng û binirx a birêz Ocalan hebû. Çareseriyek ji bo gelê Kurd û Rojhilata Navîn danî holê. Lê tecrîdkirina birêz Ocalan tê kûrkirin. Tecrîd sûcê li dijî mirovahiyê ye. Ez ne wek parlamentera HDP’ê, wek Hevseroka KCD’ê ji îro û pêve dest bi çalakiya greva birçîbûnê ya bêdem û bêdorveger dikim. Ez mirina di vê oxirê de jî qebûl dikim. Ev tecrîd ne li kesekê li tevahiya gel tê kirin. Ez wek neferek gel û ji bo Birêz Ocalan, di oxira wê de mirinê dipejirînim. Ez dikevim greva birçîbûnê ya bêdem û dorveger.” 

 

GEL, HDP Û RÊXISTINAN PIŞTGIRÎ DA GUVEN

 

Pişti Guven dest bi çalakiyê kir, gelê Colemêrgê, HDP; DBP, KCD, TJA, rêxistinên demokratîk piştgirî dan û dest bi çalakiyan kir. Piştî HDP'ê ji hemû rêxitinên bajaran re giştîname şand û li Colemêrg, Wan, Amed, Riha û Edeneyê ji bo 2  rojan dest bi çalakiyên grevê kirin û piştgirî dan Guven. Lê rayedarên hikûmet û dewletê li diji van çalakiyan derket. Walîtiya Amedê bi hikmê OHAL'ê biryar da û di 16'ê mijdarê de heta 15 rojan hemû çalakî li Amed û navçaeyên wê qedexe kir. 

 

Rêxistinên dest bi çalakiyê kirin bang li Konseya Ewropa û Komîteya Astengkirina Îşkence (CPT) kir û xwest hestiyar tev bigere. 

 

CEZAYÊ DÎSÎPLÎNÊ DAN GUVEN 

 

Miduriyeta Girtîgeha Tîpa E ya Amedê li dijî Hevseroka Kongreya Civaka Demokratîk (KCD) û Parlamentera HDP’ê ya Colemêrgê Leyla Guven a ku dest bi greva birçîbûnê kiribû lêpirsîna dîsîplînê da destpêkirin. Girtîgehê lêpirsîna dîsîplînê teblîxî Guven kir. Di daxwaznemeyê de hat xwestin Guven di nava 3 rojan de nivîskî an jî bi devkî parastina xwe bide.  Pişte ji bo Mehekê ceza li Guven birîn. 

 

Guven li Colemêrgê bi rêjeya ji sedî 70,17’an li Colemêrgê weke Parlamentera HDP'ê ya Colemêrgê hatiye hilbijartin. Lê girtî tê darizandin û çalakiya wê di roja 15’emîn de berdewam dike.  Guven a 54 kalî ji ber çalakiya grevê bandorê li ser bedena wê dike rewşa tenduristiya wê xera dibe. Guven dixwaze ku hemû kesên aştî u demokrasiyê dixwaze li dijî tecrîdê denge xwe bilind bikin û piştgiriyê bidin çalakiya wê.