COLEMÊRG - Çalakiya greva birçîbûnê ya Hevseroka KCD'ê Leyla Guven a li dijî tecrîdkirina Ocalan di roja 18'an de berdewam dike. Jinên li Colemêrgê hatin hilbijartin piştgirî dan çalakiya Leyla Guven û wiha gotin: “Tecrid tundî ye. Guven li dijî vê tundiyê têdikoşe. Em piştevaniya Guven xurt û mezin bikin."
Têkoşin û çalakiya Hevseroka Kongreya Civaka Demokratîk (KCD) û Parlamentera HDP'ê ya Colemêrgê Leyla Guven a li dijî tercîdkirina Rêberê PKK'ê Abdullah Ocalan di 25'ê Mijdarê Roja Têkoşîna Navneteweyî ya li dijî Tundiya li dijî jinê ket roja 18'an. Jinên li Colemêrgê hatin hilbijartin bi minasebeta 25'ê mijdarê bal kişandin ser têkoşîn Leyla Guven. Hevşaredara Geverê Adile Kozay ku ji peywirê hatibû girtin, diyar kir ku ji ber zextên îktîdarê demek dirêj e demokrasiyê ji ser vê axê bar kiriye û wiha got: "Berê 3 wekilên me yên hatin hilbijartin, hevşaredarên me û keyayên me ji peywirê hatin girtin. Gelek ji wan hatin binçavkirin û girtin. Hêj gelek hevalên me girtî ne. Ev hevalên me yên girtî bi dengekî pir zêde hatin hilbijartin. Mînak di hilbijartina 24'ê mijdarê de Leyla Guven bû wekîl, lê niha girtî ye. Berê parlamentera HDP'ê ya Colemêrgê Selma Irmak hat hilbijartin û piştre hat girtin û niha girtî ye. Hikûmet dixwaze li Colemêrgê vîna jinê dîl bigire."
Kozay, destnîşan kir ku Guven di 25'ê mijdarê de bi çalakiya grevê pêşwazî dike û wiha axivî: "Li dijî vîna gel û jinê tundiyek heye. Guven bi vê çalakiya xwe nîşan daku vîna jinê dikare li dijî hemû cûreyên tundiyê têbikoşe. Guven li dijî polîtikayên dewletê têdikoşe. Divê em piştevaniya wê mezin û xurt bikin."
ROJA JINÊ PÊŞENGÎ YE
Seroka Meclîsa Bajar a Colemêrgê Gulizar Îliş jî bal kişand ser vîna jinê ya li Colemêrgê û wiha got: "Li Colemêrgê li dijî vîna jinê êrîşek mezin heye. Niha bi gotina 'Hûn hilbijêrin jî em dê dîsa qeyûm tayîn bikin' helwest û feraseta xwe ya li dijî vîna gel aşkere dikin. Selma Irmak wekî vîna jinê hat hilbijartin. Yên ev yek tehamul nekirin ew girtin. Niha Leyla Guven li girtîgehê dîl hatiye girtin. Sedema vê yekê pêşengiya jinê ya li ser vê axê ye. Ji ber rola jinê ya pêşengiye heye îktîdar vê yekê tehamul nake. Ji ber vê yekê êrîşî vîna jinê dike. Divê bêtir em li vîna jinê xwedî derkevin. Yên ji vîn, hêz û hebûna jinê ditirsin û yên ditirsin ku jin jiyana azad bidin civakê hem tuniya derûnî hem jî tund8iya fîzîkî pêk tînin. Lê wekî berxwedana Leyla Guven jî nişan dide ku jin li dijî vê tundiyê serî natewînin. Birêz Leyla Guven li dijî tercîd, tundî, êrîşa li diji demokrasî û jiyanê 18 rojin ketiye grevê. Em jin ji bo dawî li vê tundiyê bînin divê em bêtir piştgiriyê bidin Guven."
GUVEN LI DIJÎ TUNDIYÊ TÊDIKOŞE
Hevseroka Partiya Herêmên Demokratîk (DBP) a Navçeya Geverê Oznûr Evîn jî anî ziman ku dewleta ku hilmendiya mêr serdest e, Leyla Guven a bi dengê deh hezaran jinan hat hilbijartin li girtîghê dîl girtiye û wiha got: "Dewlet bi vê yekê polîtîkayên dijminantiyê li dijî jinê dimeşîne. Jina bi vîna jinê hatiye hilbijartin îro girtî ye. Girtina vîna jinê nayê qebûlkirin. Hem êrişa derûnî, hem êrîşa fîzikî û hem jî êrîşa bîrdozî heye. Niha li dijî vîna jinê êrîşa bîrdozî heye. Tecrîd tundî ye. Guven li dijî vê tundiyê ket grevê. Tundî û tecrîd nayê qemûlkirin. Ev tundî hişmendiya dewletê ya mêr ku naxwaze jin pêşengiyê bike ye. Ji ber vê yekê Îro Selma Irmak û Leyla Guven girtî ne. Guven girtin lê têkoşîna xwe li girtîgehê jî berdewam kir. Divê em têkoşînka wê di nava civakê de jî belav bikin."