EDENE - 5 meh cezayê girtîgehê ji bo Hevberdevkê HDK’ê Onur Hamzaoglu yê ji ber AKP rexne kir hat darizandin birîn.
Danişîna biryara doza darizandina Hevberdevkê Kongreya Civaka Demokratîk (HDK) ê Prof. Dr. Onur Hamzaoglu, li 25’emîn Dadgeha Cezayê Eslî ya Edeneyê hat dîtin. Hamzaoglu, parêzerên wî û gelek kes beşdarî danişînê bûn. Piştî danasîna nasnameyê danişînê dest pê kir. Hamzaoglu yê bi îdîaya polîtîkayên AKP’ê rexne dike, “Gelê Tirkiyeyê, Dewleta Komara Tirkiyeyê, sazî û dezgehên dewletê biçûk dixe” hat darizandin, di danişînê de parastin kir.
‘MIN GEL AGAHDAR KIR’
Hamzaoglu di parastina kir de wiha got: “Ez di Mijdara 2016’an de weke hevberdevkê HDK’ê beşdarî mîtînga ji bo referanduma derbar guhertina Qanûna Bingehên a li Edeneyê pêk hat bûm. Ez siyasetmedarek profesyonel nînim. Ez akademisyenim. Ez bijîşkim. Ez pisporê tenduristiya gelim. Min li hemberî pêkanên 14 salan ên hikûmeta AKP’ê, axaftinek li gorî daneyan û agahiyên bi zanist amade kir. Min xwest ku ez hemû tiştên hikûmeta AKP’ê bi serê gelên Tirkiyeyê anî danim holê û bêjim paketa guhertina Qanûna Bingehîn ne dûrî van kiryarên AKP’ê ye.”
‘EZ BI ÇI TÊM SUCDAR KIRIN NIZANIM’
Hamzaoglu, da zanîn ku di naveroka axaftina de peyamên aştiyane habûn û wiha got: “Ez hîna jî nizanim bi çi têm darizandin. Niha li dijî min bêmafiyek tê kirin. Ez sucdariyên li ser xwe qebûl nakim. Ji ber vê jî ez vê darizandinê jî qebûl nakim.”
Piştî Hamzaoglu parêzeran parastin kirin, gotin ew tevlî parastina Hamzaoglu dibin û beraeta wî xwestin.
Dadgehê daxwaza beraeta Hamzaoglu red kir û bi îdîaya “Gelê Tirkiyeyê, Dewleta Komara Tirkiyeyê, sazî û dezgehên dewletê biçûk dixe” 5 meh cezayê girtîgehê li Hamzaoglu birî û biryar da ku ceza bê taloq kirin. Dadgehê di heman demê de biyar da ku Hamzaoglu salekê bê kontrol kirin.