AMED - Înîsîyatîfa Nivîskarên Kurd, bi daxuyaniyekê piştgirî dan hewldanên Platforma Zimanê Kurdî ya ji bo tifaqa kurdan û bang li hemû partiyên siyasî yên kurdan kir ku berjewendiyên xwe nexin pêş tifaqa kurdan.
Înîsîyatîfa Nivîskarên Kurd, têkildarî hewldanên Platforma Zimanê Kurdî û rewşa partiyên siyasî ya der bare tifaqa kurdan de daxuyaniyek nivîskî weşand. Înîsiyatifa Nivîskarên Kurd, di daxuyaniyê de diyar kir ku pêvajoya ku li pêşiya gelê kurd e, gelek girîng dîbînin û wiha got: "Ji ber vê munasebetê jî dixwazin fikir û ramanên xwe bi raya giştî re parve bikin. Di demeke nêz de Platforma Zimanê Kurdî, xebat û erkên gelek girîng da pêşiya xwe. Beriya her tiştî taybetiya herî girîng a vê platformê ew e ku; ji gelek derdorên cuda hatiye avakirin. Bi vê mebestê gelek fikir, raman û derdorên cuda gihîştine hev û li ser daxwazekê bi yekdengî dikarin biqîrin. Em jî wek Înîsîyatîfa Nivîskarên Kurd, xebatên bi vî rengî gelek pîroz dibînin û ji bo ku di her warî de xebat pêş bikevin dixwazin piştgiriya wan bikin."
'HEWLDANA PLATFORMÊ GELEK PÎROZ Û WATEDAR E, LÊ KÊM E'
Înîsiyatifê, bal kişand ser wateya hewldana Platformê û wiha berhdewam kir: "Bi raya me gava herî girîng hatiye avêtin û em vê gavê wek destpêka yekgirtina kurdan dibînin. Gelek girîng, pîroz û watedar e. Lê mixabin têra daxwaz û pêdiviya heyî nake. Rewş û aloza ku gelê me têde ye ji her aliyî ve xeternak e. Di serî de ziman û çanda me kurdan êdî di rewşeke gelek xetere de ye. Ji bo em karibin bergiriyan pêş bixin mixabin em gelek dereng mane. Dixwazin hebûna kurdan bi êrîşa li ser zimanê wan tune bikin, îro ro jî bi kayyûman ev polîtîkayên asîmîlasyonê bi awayekî sîstematîk didome.Hewce ye ku hemû partiyên kurdan li hember vê bikaribin rawestin. "
Înîsiyatifê, destnîşan kir ku hatina gel hev ya derdora zimanê kurdî gelek girîng û watedar e û wiha lê zêde kir: "Ji bo berdewamiya yekgirtina kurdan gava duyem jî vê gavê li pêşiya me ye. Di 31 Adar 2019’an de hilbijartina rêveberiyên herêmî heye. Em dizanin ku ji aliyê tifaqên qirêj yên li dij kurdan dest li ser şaredariyên gelan hatiye danîn. Lewma jî li ser ziman û çanda me polîtîkayên asîmîlasyonê bi destê van kayyûman her ku diçe zêdetir dibin. Lewma li hember van polîtîkayan li ber kurdan yek rê heye ew jî tifaqa navxweyî ye. "
Înîsiyatifê herî dawî bal kişand ser girîngî û wateya tifaqa kurdan û wiha bi dawî kir: "Dema ku em li rabirduya siyaseta kurdan dinêrin mixabin tişta herî kêm tifaq e. Lê em dibêjin divê êdî ev rewşa heyî nebe qedera kurdan. Ji ber vê yekê jî bangawaziya me ji hemû partî û derdorên kurdan re ew e ku, bila tu partî û derdor berjewendiyên xwe nexin pêşiya tifaqa kurd, bila nebin amûrên tukesi. Divê demildest tifaqa navxweyî were avakirin. Di vê rêyê de Platforma Zimanê Kurdî gava yekem e, bila hilbijartinên herêmî bibe gava duyem. Ev tifaqa navxweyî vê gavê ji bo hilbijartinên herêmî pêk were dikare gelek tiştan bi xwe re biguherîne. Bangawaziya me ji hemû partî û derdorên kurdan yek tişt e, ew jî guh bidin gotinên feylezofê nemir Ehmedê Xanî. Xanî dibêje; Ger dê hebûya me îttîfaqek/ Vêkra bikira me înqîyadek/ Tekmîlî dikir me dîn û dewlet / Teshîlê dikir me îlm û hîkmet/ Înîsîyatîfa Nivîskarên Kurd"