Danasîna namzetên hevşaredariyan ên HDP’ê berdewam dikin. Rêxistina HDP’ê ya Amedê namzetên hevşaredariya Hezroyê bi gel da nasîn. Ji bo danasîna Namzetên Hevşaredariya HDP’ê ya Hezroyê Gulîstan Ektî û Ahmet Çevîk bi şahiyekê hatin nasîn. 

 

Parlamenterên HDP’ê Remziye Tosun, Semra Guzel û Musa Farisogullari, Namzetên Hevşaredariya HDP’ê yên Bajarê Mezin a Amedê Hulya Alokmen Uyanik û Selçûk Mizrakli û şêniyên navçeyê beşdar bûn. Namzetên Hezroyê di têketina navçeyê de ji aliyê gel ve bi kelecanek mezin û berzkirina dirûşman hatin pêşwazîkirin. 

 

Girseyê dirûşmên “Bijî HDP”, “Amed ya me ye” û “Hazro ya me ye” berz kirin. Namzetan li ber avahiya HDP’a Hezroyê gel silav kir. 

 

'EM Ê BERSIVEK BAŞ BIDIN QEYÛMAN’ 

 

Namzet Hevşaredariyê Ahmet Çevîk bi silavkirina greva birçîbûnê ya Leyla Guven dest bi axaftina xwe kir. Çevîk ji bo hilbijartinê got: “Em ê bi hev re bi ser bikevin. Hezro bi mirovatî û lehengiya xwe navçeyek hêja ye. Em ê di sindoqan de bersivek mezin bidin qeyûm û pergalê.” 

 

‘EM Ê ÇONGÊ DANEYNIN’ 

 

Namzeta Hevşaredariyê Gulîstan Ektî jî got: “Em ê her tim layîqî gel û partiya xwe bin. Em ê wek neviyên bapîr û dapîrên xwe tu demê çonga xwe daneynin û serê xwe netewînin. Em û gelê xwe dest bidin destê hev û qeyûm dagirker ji axa Kurdistanê derxînin. Em ê bi ser bikevin. Wê gelê Hezroyê bi ser bikeve.” 

 

UYANIK: EW NIKARIN HÊVIYA ME QÛT BIKIN 

 

Namzeta Hevşaredariya Amedê Hulya Alokmen Uyanik jî xîtabî gel kir û got: “Em ê tu demê li dijî vê zilmê serê xwe netewînin. Ev ax axa me ye. Ev bajar û navçe yên me ne. Heta îro em çawa bi desteka gelê xwe bi ser ketine em ê dîsa jî bi ser bikevin. Cihê wan xera kiriye em ê ji nû ve ava bikin. Wan xwest hêviya me ji gelê me bibirin lê gelê me destûr nedan vê yekê. Ew ê tu carî nikaribûn hêviya me qût bikin.” 

 

ŞIRNEX

 

HDP’ê namzetên hevşaredariya Şirnex û navçeyan bi bernameyên li dar xist bo gel da nasîn. Bernameya danasînê li salona konferansê ya li ber avahiya HDP’a Bajêr a Şirnexê pêk hat. Parlamenterê HDP’ê Huseyîn Kaçmaz, rêveberên HDP’ê û DBP’ê yên bajêr û navçeyan, hevşaredarên qeyûm tayînî şûna wan hatin kirin, Dayikên Aştiyê û bi sedan welatî beşdarî danasînê bûn. Salon tije ma û cih lê nema. Jinan bi cilên herêma Botanê beşdarî danasînê bûn. 

 

Deqîqeyek rêzgirtin pêk hat. Di bernameyê de ewilî Hevserokê HDP’a Şirnexê Zekî Îrmez axivî û bertek nîşanî binçavkirina Namzeta Hevşaredariya Cizîrê Bêrîvan Kutlu û siyasetmedarên jin da. Îrmez destnîşan kir ku ew çalagerên greva birçîbûnê silav dikin û got: “Ev daxwaz û biryar a me ye jî heta tecrîd ranebe em ê têbikoşin.” 

 

KAÇMAZ: EV HILBIJARTIN REFERANDÛM E 

 

Parlamenter Huseyîn Kaçmaz jî axivî û destnîşan kir ku ev hilbijartin gelek girîng e û ji bo bi qasî referandûmê hêja ye. 

 

Piştî axaftinan namzetên hevşaredariyan bi gel dan nasîn û bername bi govend gerandinê xelas bû. 

 

HESKÎF 

 

Rêxistina HDP’ê ya Êlihê jî namzetên hevşaredariya HDP’ê yên Heskîf û Kercewsê bi şahiyan bi gel da nasîn. Namzetên Heskîfê bi karwanê wesayîtan ketin navçeyê û li ber avahiya HDP’ê bernameya xwe li dar xistin. Parlamenterên HDP’ê yên Êlihê Ayşe Acar Başaran û Mehmet Ruştu Tiryakî, Namzetên Hevşaredariya Êlihê Sabrî Ozdemîr û Songul Korkmaz, Namzetên Hevşaredariya Heskîfê Zozan Şîmşek û Mecît Tokdemîr, Namzetên Hevşaredariya Kercewsê Zeynep Aslan û Abdulkerîm Kaya û gelek welatî beşdar bûn. 

 

'EM Ê ŞAREDARIYÊN XWE PAŞ VE BISTÎNIN’ 

 

Parlamenterê HDP’ê Ruştu Tiryakî di bernameya danasînê de axivî û got ew ê şaredariyên xwe paş ve bistînin. Tirkyakî got ew çalakiya Leyla Guven jî silav dikin. Tirkaykî xwest Serokomar Erdogan hurmetê ji vîna gel re nîşan bide. 

 

ŞÎMŞEK-TOKDEMÎR: EM Ê BI SER BIKEVIN 

 

Namzetên Hevşaredariyê Zozan Şîmşek û Mecît Tokdemîr jî gel silav kirin û diyar kirin ku ew ê mal bi mal bigerin û feraseta şaredariyê ji wan re bêjin û ew ê li dijî talangeriya Heskîfê bi ser bikevin. 

 

KERCEWS

 

Piştî bernameya li Heskîfê hemû namzet û rêveberên HDP’ê û karwanê wesayîtan ji gel pêk dihat berê xwe dan navçeya Kercewsê û li navenda Kercewsê gel silav kirin. Danasîn namzetên Kercewsê Zeynep Aslan û Abdulkerîm Kaya li ber avahiya HDP’ê ya navçeyê pêk hat. Di bernameya li vir de jî parlamneter Ayşe Acar Başaran axivî û destnîşan kir ku piştî qeyûm tayînî Şaredariya Kercewsê hatiye kirin avahiya şaredariyê ji gel û xizmetê re hatiye girtin. Acar got: “Ji ber kirinên qeyûman em ê di 31’ê Adarê de şaredariyên xwe ji wan bistînin.” 

 

ASLAN-KAYA: EM Ê ŞAREDARIYÊ RADESTÎ GEL BIKIN 

 

Namzetên Hevşaredariya Kercewsê Zeynep Aslan û Abdulkerîm Kaya jî bi gel dan nasîn û gel silav kirin. Aslan û Kaya dan zanîn ku bi tayînkirina qeyûm Kercewsê veguherandine zîndanê û ew ê bi serketina hilbijartinê carek din şaredariyê radestî gel bikin.