NAVENDA NÛÇEYAN – Danasîna namzetên hevşaredariyên HDP’ê dewam dike. Namzetên hevşaredariyê gotin “Em ê pêkanînên antî demokratîk ku hevşaredarên ji wezîfeyê girtin paqij bikin ji van deran.”
Rêxistina Partiya Demokratîk a Gelan (HDP) ya Bajarê Wanê di çarçoveya hilbijartina herêmî ya di 31’ê Adarê de danasîna namzetên hevşaredariyên xwe didomîne.
QELQELÎ
Namzetên Hevşaredariya Bajarê Mezin a Wanê Bedîa Ozgokçe Ertan û Mustafa Avci di çarçoveya bernameya danasîna namzetên hevşaredariyên navçeyan de çûn Qelqelî û Serayê û bi gel re hatin ba hev. Li heyeta HDP’ê ewilî li Qelqeliyê danasîna namzetên hevşaredariyê pêk anî û di têketina navçeyê de bi kêfxweşî hatin pêşwazîkirin. Gel namzetên hevşaredariya xwe bi kelecan pêşwazî kir û eleqe nîşanî wan dan. Tevî hemû hewaya sar jî welatî li hev kom bûn û dirûşma “Bijî berxwedana zîndanan” berz kirin.
‘EM LI VIR IN Û NATIRSIN’
Piştî rêzgirtinê Namzetên Hevşaredariya Qelqeliyê Dîlan Orencî û Yakûp Almaç bi gel dan nasîn û gel silav kirin. Namzeta hevşaredariyê Dîlan Orencî got: “Em jin ji wan natirsin û em ê netirsin. Em carek din ji wan re dibêjin em ji we natirsin. Em li vir in û natirsin. Qeyûm çawa cihê ku jê hatine em dîsa wan bişînin wir. Em bi kêfxweşî xwe ji hilbijartinê re amade dikin. Em ê ji hemû lîstikên vê pergalê re di 31’ê Adarê de bibin bersiv.”
Namzetê Hevşaredariyê Yakûp Almaç jî got: “Em hatine ku yên hevşaredarên me bi rêyên antî demokratîk ji wezîfeyê girtin e ji van deran paqij bikin. Em ê projeyên hevalên xwe temam bikin, Serkeftin ya me ye.”
DÊ SERÊ XWE NETEWÎNIN
Namzeta Hevşaredariya Wanê Bedîa Ozgokçe Ertan jî da zanîn ku ew ê xwe û bajarên xwe birêve bibin û dê tu demê li dijî şidet, zext û zilmê serê xwe netewînin.
Piştî Qelqeliyê namzetên hevşaredariyê derbasî navçeya Serayê bûn.
SERAY
Namzetên hevşaredariyan li navçeya Serayê jî ji aliyê kêfxweşiya gel ve hatin pêşwazîkirin. Namzetên hevşaredariya Serayê bi gel hatin danasîn. Namzeta hevşaredariyê Caziye Duman di axaftina xwe de çalakiya Leyla Guven silav kir. Duman anî ziman ku wê gel di 31’ê Adarê de bersiv bide polîtîkayên şer û dê serdemek nû bidin destpêkirin. Duman got ew ê şaredariyên wan hatine xespkirin ji nû ve bi dest bixin û got: “Em ê vîna xwe paş ve bistînin. Gel wê bi sekna xwe ya rûmet vê pêvajoyê zelal bike. Seray Ya Me Ye.”
Namzetê Hevşaredariya Bajarê Mezin a Wanê Mustafa Avcî jî axivî û diyar kir ku dijberên kurdan tiştek nema bi serê kurdan ve neanîn û ew ê xwe li ser piya bigirin û serkeftin dê ya wan be.
QOSER
Rêxistina HDP'ê ya Mêrdînê jî Namzetên Hevşaredariya Qoserê Salîh Kuday û Nilufer Elîk Yilmaz bi gel da nasîn. Danasîn li avahiya HDP'ê ya Qoserê pêk hat û gelek kes beşdar bû. Nilufer Elîk Yilmaz di bernameyê de axivî û bi bîr xist ku qeyûm peykerê Ugur Kaymaz hilweşandiye û got: "Em ê ji ber xatirê êrîşên li dijî nirxên me bersivê bidin qeyûman. Her deverê Qoserê ya me ye."
Salîh Kuday jî anî ziman ku ew ê xwedî li vîna xwe derkevin. Piştî danasînê namzetên hevşaredariyê esnafan ziyaret kirin û li welatiyan guhdar kirin.
PASÛR
Rêxistina HDP'ê ya Amedê jî Namzetên Hevşaredariya Navçeya Pasûrê ya Amedê Mehmet Emîn Ay û Fatma Ay li navçeyên bi gel dan nasîn. Parlamenterên HDP'ê, namzetên hevşaredariya Amedê û gelek kes beşdarî bernameya danasînê bûn. Namzetên hevşaredariyê bi coşek mezin hatin pêşwazîkirin. Axaftin hatin kirin û pişt re govend hat gerandin. Di dawiya bernameyê de namzetên hevşaredariyê û parlamenter li navenda navçeyên gel ziyaret kirin.